Mityá na esika ya basusu
Mokakatano
Soki tozali kotya likebi kaka na bisika oyo tokeseni na bato mosusu, tokomona kaka bambeba to mabe. Yango wana, tokomona ete toleki bato oyo tokeseni na bango. Ntango tozali kokolisa makanisi mabe wana, ekozala mpasi ete tómitya na esika ya basusu. Soki toyebi komitya na esika ya basusu te, ezali mokakatano monene mpo tokokóma kokanisela bango mabe.
Toli ya Biblia
“Bósepela elongo na bato oyo bazali kosepela; bólela elongo na bato oyo bazali kolela.”—BAROMA 12:15.
Elingi koloba nini? Vɛrsɛ oyo ezali koteya biso ete tosengeli komitya na esika ya basusu. Komitya na esika ya moto ezali mpe koyoka ndenge moto yango azali koyoka.
Ntina ya komitya na esika ya basusu
Ntango tozali komitya na esika ya moto, tokomona ete tozali kaka ndenge moko. Tokomona ete ayokaka ndenge tozali koyoka, asalaka makambo ndenge tosalaka. Komitya na esika ya basusu ekosalisa biso tómona ete bato nyonso bazali ndenge moko. Soki tozali koluka koyeba na makambo nini tozali ndenge moko na bato mosusu, tokotika kokanisela bango mabe.
Komitya na esika ya basusu ekotinda biso tópesa bango valɛrɛ. Anne-Marie, mwasi moko oyo afandaka na Sénégal, azalaki kotyola bato oyo bato mingi bazalaki komona ete bazali bato mpamba. Amonisi ndenge oyo komitya na esika ya basusu esalisaki ye: “Ntango nazalaki komona mpasi ya bato oyo bato mingi bamonaka ete bazali bato mpamba, nazalaki komituna boye, ‘Nalingaki koyoka ndenge nini soki nazalaki na esika na bango?’ Mpo na yango, nabandaki komona ete naleki bato yango te, mpo nasalaki eloko moko te mpo naleka bango.” Ya solo, ntango tozali kosala makasi tóyeba mikakatano oyo bato mosusu bazali na yango, tokolobela bango mabe ata moke te.
Oyo okoki kosala
Soki ozali kokanisela bato moko boye mabe, luká koyeba na makambo nini bozali ndenge moko. Na ndakisa, kanisá ndenge bayokaka ntango
Komitya na esika ya basusu ekosalisa biso tómona ete bato nyonso bazali ndenge moko
bazali kolya elongo na mabota na bango
basilisi mosala moko ya makasi
bazali kosolola na baninga na bango
bazali koyoka miziki oyo balingaka
Na nsima, meká komitya na esika na bango. Mituná boye:
‘Nakosala nini soki moto moko azali kotyola ngai?’
‘Nakosala nini soki moto abandi kokanisela ngai mabe liboso ayeba ngai malamu?’
‘Soki nazalaki moto ya ekólo to ya etuluku wana, nakolinga ete bato mosusu básalela ngai makambo ndenge nini?’