OYO OKOKI KOSALA NTANGO NTALO YA BILOKO EZALI KOMATA

Zalá lobɔkɔ pɛtɛɛ

Soki ozali komitungisa ndenge ntalo ya biloko ezali se komata, okoki kokanisa ete ekozala mpasi mpo okabela basusu. Kasi, okoki komona ete kokabela basusu ekoki kosalisa yo oyika mpiko ntango ntalo ya biloko ezali komata. Okoki kokabela basusu mpe kobatela mbongo na yo.

MPO NA NINI EZALI NA NTINA?

Kokabela basusu ata mwa eloko ya moke oyo tozali na yango, ekosala ete tózala na esengo mpe tómiyoka malamu. Kutu, minganga bamonisi ete kokabela basusu ekoki kosalisa biso tózala malamu na nzoto mpe na makanisi. Na ndakisa, ekoki kosalisa biso mpo tómitungisaka mingi te, tónyokwamaka na makanisi te, ekoki kokitisa tension oyo tozali na yango, motó mpasi oyo tozali koyoka, ata mpe mpasi. Ekoki mpe kosalisa biso tólalaka malamu.

“Esengo ya kopesa eleki esengo ya kozwa.”—Misala 20:35.

Ntango tokabelaka basusu, ezala mbongo to biloko mosusu oyo basengeli na yango, ekozala mpasi te tóndima lisalisi ya basusu ntango tozali na bosɛnga. Howard, oyo afandaka na Angleterre alobi boye: “Ntango ngai ná mwasi na ngai tokabelaka basusu mpe tosalisaka bango, toyokaka mabe te soki ekómi mpe ngala na biso ya kozwa lisalisi epai ya basusu.” Na ntembe te, bato oyo bazalaka na ezaleli ya kokabela basusu, basalaka yango te mpo na nsima, bato mosusu mpe bákabela bango. Kasi bazwaka nde baninga ya solosolo oyo bakoki mpe kosalisa bango ntango bazali na mposa ya lisalisi.

“Bózala na momeseno ya kopesa mpe bato bakopesa bino.”—Luka 6:38.

OYO OKOKI KOSALA

Kabeláká basusu. Ata soki ozali kaka na mwa eloko moke, okoki kokabela yango bato mosusu, na ndakisa, mwa bilei. Mobali moko na nkombo Duncan ná bato ya libota na ye oyo bafandaka na Ouganda, bazali mpenza babola, atako bongo, bazalaka kaka na ezaleli ya kokabela basusu. Duncan alobi boye: “Mikolo nyonso ya lomingo, ngai ná mwasi na ngai tobengisaka moto moko epai na biso mpo na kolya mwa eloko. Tosepelaka kolekisa ntango elongo na basusu.”

Na ntembe te, osengeli kozala na bokatikati ntango ozali kokabela basusu. Osengeli te kotika libota na yo ekelela.—Yobo 17:5.

Meká kosala boye: Kabelá moto moko mwa eloko ya kolya to ya komɛla. Soki ozali na biloko oyo osalelaka lisusu te, okoki kokabela yango baninga to bato ya kartye na bino oyo bazali mpenza na mposa ya eloko yango mpe bakoki kosepela yango.

Lolenge mosusu ya kokaba. Makabo mosusu oyo eleki motuya esɛngaka mbongo te. Na ndakisa, tokoki kopesa ntango mpe likebi na biso soki tozali kosala eloko oyo ekosalisa basusu. Ata maloba ya boboto ekoki mpe kozala likabo. Na yango, yebisáká basusu ndenge osepelaka na bango to olingaka bango.

Meká kosala boye: Salisáká basusu na mwa misala ya ndako, kobongisela bango ndako to mpe kokende kosombela bango biloko. Komeláká bango mwa maloba ya kolendisa na karte to mpe tindelá moninga moko mwa mesajɛ, ata mpo na koloba kaka ete ozali kokanisa ye.

Soki ozali kokabela basusu biloko, okozala na esengo mingi koleka.

“Bóbosana te kosala malamu mpe kokabela basusu biloko.”—Baebre 13:16.

Mwasi moko ná mobali na ye bazali kosalisa mobange moko na kokombola libándá ya lopango na ye. Apesi bango eloko ya komɛla ya mɔtɔ ntango bazali kokongola matiti.