Liteya 10

Misala oyo Nzambe ayini

Osengeli kokanisa nini na ntina na makambo oyo Nzambe alobi ete ezali mabe? (1)

Etamboli ya lolenge nini ezali mabe na makambo matali mibali mpe basi? (2)

Lolenge nini moklisto asengeli kotalela lokuta? (3) masano ya mbongo? (3) koyiba? (3) mobulu? (4) bikelákela? (5) molangwa? (6)

Lolenge nini moto akoki komilongola na misala mabe wana? (7)

1. Basaleli ya Nzambe balingaka oyo ezali malamu. Kasi basengeli mpe koyekola koyina oyo ezali mabe. (Nzembo 97:10) Yango elimboli koboya misala misusu oyo Nzambe ayini yango. Wapi mwa ndambo ya misala yango?

2. Pite: Kosangisa nzoto liboso ya kobalana, ekobo, kosangisa nzoto na banyama, kosangisa nzoto na moboti to na ndeko, mpe kosangisa nzoto mibali na mibali, to basi na basi, nyonso wana ezali masumu minene na miso ya Nzambe. (Levitike 18:6; Baloma 1:26, 27; 1 Bakolinti 6:9, 10) Soki bato mibale babalani te kasi bazali kofanda esika moko, basengeli to kokabwana to kobalana na boyokani na mibeko.​—Baebele 13:4.

3. Lokuta, masano ya mbongo, koyiba: Yehova Nzambe akoki kobuka lokuta te. (Tito 1:2) Bato oyo balingi ete bándimama epai na ye basengeli koboya lokuta. (Masese 6:16-19; Bakolose 3:9, 10) Masano nyonso ya mbongo mapusami na lokoso. Na yango baklisto basengeli te kosangana na mitindo nyonso ya masano ya mbongo, na ndakisa loteri, kobɛta mondengé mpo na mbangu ya mpunda, mpe bingo. (Baefese 5:3-5) Mpe baklisto basengeli koyiba te. Basombaka te biloko oyo bayebi ete ezali ya moyibi mpe bakamataka eloko ya moto te kozanga ndingisa.​—Exode 20:15; Baefese 4:28.

4. Nkanda makasi, mobulu: Nkanda makasi ekoki komema na kosala misala ya mobulu. (Genese 4:5-8) Moto na mobulu akoki te kozala moninga ya Nzambe. (Nzembo 11:5; Masese 22:24, 25) Ezali mabe kobekola to kozongisa mabe na makambo oyo basusu bakoki kosalela biso.​—Masese 24:29; Baloma 12:17-21.

5. Misala ya maji mpe bikelákela: Bato mosusu balukaka nguya ya bikelákela mpo na komeka kosalisa maladi. Basusu basalelaka bondɔ́ki mpo na kobwakela banguna na bango maladi ata mpe koboma bango. Nguya oyo ezali nsima na misala nyonso wana ezali bongo Satana. Na yango, moklisto asengeli te kosangana na misala wana. (Deteronome 18:9-13) Kobɛlɛma epai na Yehova ezali libateli lileki malamu na misala ya bondɔ́ki oyo basusu bakoki kobwakela biso.​—Masese 18:10.

6. Molangwa: Ezali mabe te komela mwa moke vinyo, bière, to masanga mosusu ya makasi. (Nzembo 104:15; 1 Timoté 5:23) Kasi kolekisa ndelo na komela mpe kolangwa ezali mabe na miso ya Nzambe. (1 Bakolinti 5:11-13; 1 Timoté 3:8) Komela mingi ekoki kobebisa kolɔngɔ́nɔ́ ya nzoto na yo mpe ekoki kobulunganisa libota na yo. Ekoki mpe komema yo nokinoki na masɛnginya mosusu.​—Masese 23:20, 21, 29-35.

7. Bato oyo basalaka makambo oyo Nzambe alobi ete ezali mabe ‘bakosangola bokonzi ya Nzambe te.’ (Bagalatia 5:19-21) Soki olingaka mpenza Nzambe mpe olingaka kosepelisa ye, okoki komilongola na misala wana. (1 Yoane 5:3) Yekolá koyina makambo oyo Nzambe alobi ete ezali mabe. (Baloma 12:9) Zalá elongo na bato oyo bazali na bizaleli ya kobanga Nzambe. (Masese 13:20) Baninga baklisto oyo bakɔmɛli bakoki kozala liziba ya lisalisi. (Yakobo 5:14) Oyo eleki mpenza, luká lisalisi ya Yehova na nzela ya libondeli.​—Bafilipi 4:6, 7, 13.

[Bililingi na lokasa 20, 21]

Nzambe ayini molangwa, koyiba, masano ya mbongo, mpe misala ya mobulu