Liteya 2

Nzambe azali moninga oyo aleki malamu

Kokóma moninga ya Nzambe ezali likambo oyo eleki esengo na bomoi na yo. Nzambe akoteya yo ndenge ya kozala na esengo mpe akobatela yo; akolongola yo na biyambayamba mpe na misala mabe ndenge na ndenge. Akoyoka mabondeli na yo. Akosalisa yo mpo motema na yo ezala na kimya mpe okotyela ye motema. (Nzembo 71:5; 73:28) Nzambe akosalisa yo na ntango ya mpasi. (Nzembo 18:18) Mpe Nzambe azali kopesa yo likabo ya bomoi ya seko.​—Baloma 6:23.

Ntango okokóma mpenza moninga ya Nzambe, okokóma mpe moninga ya baninga na Ye. Bango mpe bakokóma baninga na yo. Bakozala mpenza lokola bandeko na yo ya basi na ya mibali. Bakosepela koteya yo makambo ya Nzambe, bakosalisa yo mpe bakolendisa yo.

Tokokani na Nzambe te. Lokola ozali koluka kokóma moninga ya Nzambe, osengeli koyeba likambo moko ya ntina mingi. Kozala moninga ya Nzambe ezali te lokola kozala moninga ya moto oyo okokani na ye. Nzambe azali mpenza mokóló koleka biso, azali na mayele mpe na nguya mingi koleka biso. Abongi mpenza kozala Mokonzi na biso ya sembo. Yango wana, soki tolingi kozala baninga na ye, tosengeli koyoka ye mpe kosala makambo oyo azali kosɛnga biso. Soki tosali bongo, tokozala ntango nyonso malamu.​—Yisaya 48:18.