Kosala bajɛstɛ mpe kosalela elongi

EZALI na bamboka oyo bato bameseni kosala bajɛstɛ mingi ntango bazali koloba. Kasi soki totali malamu, biso nyonso ntango tolobaka tosalelaka bilongi na biso mpe tosalaka mwa bajɛstɛ, ezala ntango tozali kosolola na moto to ntango tozali koloba liboso ya bato.

Ata Yesu na bayekoli na ye ya liboso bazalaki mpe kosala bajɛstɛ. Mokolo moko, moto moko ayebisaki Yesu ete mama na ye mpe bandeko na ye balingi kosolola na ye. Yesu azongisaki boye: “Nani azali mama na ngai, mpe banani bazali bandeko na ngai?” Na nsima, Biblia elobi lisusu boye: “Mpe kosemboláká lobɔkɔ na ye epai na bayekoli na ye, alobaki ete, ‘Talá! Mama na ngai ná bandeko na ngai!’” (Mat. 12:48, 49) Mpe lisusu, Biblia emonisi na Misala 12:17 mpe 13:16 ete ntoma Petelo na ntoma Paulo basalaki mpe bajɛstɛ ntango bazalaki kosolola na bato.

Ezali kaka mongongo te nde emonisaka makanisi na biso mpe ndenge tozali koyoka na motema. Yango emonanaka mpe na bajɛstɛ mpe na elongi na biso. Soki moto azali kosala bajɛstɛ te mpe azali kosalela elongi na ye te, bato bakoki kokanisa ete ye moko azali kosepela te na makambo oyo azali koloba. Kosala bajɛstɛ mpe kosalela elongi esalisaka moto ntango azali kosolola na bato mosusu mpe ntango moto azali kosala yango malamu, ekosala ete ateya bato malamu mpenza na lisolo na ye. Ata ntango ozali kosolola na telefone, soki ozali kosala bajɛstɛ malamu mpe elongi na yo, mongongo na yo ekomonisa polele ntina ya nsango oyo ozali kopesa mpe ndenge oyo yo moko ozali kotalela makambo oyo ozali koloba. Yango wana, ezali na ntina mingi ete osalaka bajɛstɛ mpe osalelaka elongi na yo, ezala ntango ozali koloba makambo oyo euti na motema na yo, to ntango ozali kotánga na mokanda, ezala bato bazali kotala yo to bazali kolanda na Babiblia na bango ntango ozali kotánga.

Bajɛstɛ oyo okosala mpe ndenge okosalela elongi na yo esengeli koya yango moko. Ndenge ya kosɛka to ndenge ya kosilika, bayekolaka yango te. Bajɛstɛ esengeli mpe komonisa mayoki na yo. Bajɛstɛ na yo ekozala malamu mpenza soki ezali koya yango moko.

Bajɛstɛ ezali lolenge mibale: bajɛstɛ mpo na kolakisa ndenge eloko ezali mpe bajɛstɛ mpo na konyata makanisi ya ntina. Bajɛstɛ mpo na kolakisa ndenge eloko ezali emonisaka likambo oyo moto azali kosala, to elakisaka ete eloko yango ezali monene, moke, molai to mokuse mpe esika oyo yango ezali. Ntango basɛngi yo osala bajɛstɛ na eteyelo, kosuka kaka te na kosala jɛstɛ moko to mibale. Ntango ozali kosala lisolo na yo, meká kosala bajɛstɛ ndenge omeseni kosala yango ntango osololaka na bato. Soki ozali kokoka te, okoki koluka maloba oyo ezali komonisa nzela, soki eloko yango ezali pene to mosika, soki ezali monene to moke, to esika oyo yango ezali. Nzokande mbala mingi, likambo oyo osengeli kosala ezali kaka ete otya makanisi na yo nyonso na lisolo oyo okosala, komitungisa te soki bato bakotalela yo ndenge nini, kasi lobá mpe salá ndenge omeseni kosala mokolo na mokolo. Soki ozali kobanga te, bajɛstɛ ekoya yango moko, ndenge omeseni kosala yango.

Bajɛstɛ mpo na konyata makanisi ya ntina emonisaka mayoki oyo moto azali na yango mpe emonisaka kondima oyo azali na yango. Bajɛstɛ yango esalisaka mpo na konyata makanisi ya ntina, kosala ete esepelisa bato mpe esimba mitema na bango. Ezali na ntina mingi kosala bajɛstɛ mpo na konyata makanisi ya ntina. Kasi kebá! Okoki kokangama na bajɛstɛ yango mpe ekómeli yo momeseno. Soki ozali kosalela kaka jɛstɛ moko mbala na mbala, bato bakoki kotya likebi na bango kaka na jɛstɛ yango, na esika ete bátya likebi na bango na lisolo. Soki mokɛngɛli na eteyelo ayebisi yo ete ozali na mokakatano yango, salá makasi osuka naino na kosala bajɛstɛ oyo elakisaka ndenge eloko ezali. Nsima ya mwa ntango, okoki kobanda lisusu kosala bajɛstɛ mpo na konyata makanisi ya ntina.

Mpo na koyeba ndenge nini osengeli kosala bajɛstɛ mpo na konyata makanisi ya ntina mpe mpo na koyeba lolenge ya bajɛstɛ oyo ebongi kosalela, talelá mayoki ya bato oyo bazali koyoka yo. Soki ozali kolakisa bango mosapi, mbala mosusu bakomiyoka malamu te. Na bamboka mosusu, soki mobali azali kosala bajɛstɛ mosusu, na ndakisa, soki atii lobɔkɔ na monɔkɔ mpo na kokamwa, bato bakomona ete azali kosala makambo lokola mwasi. Na bisika mosusu, soki mwasi azali kosala bajɛstɛ ebele na mabɔkɔ na ye, bato bakomona ye lokola asilá nsɔni. Yango wana, na bisika ya ndenge wana, bandeko basi basengeli kosalela elongi na bango na lolenge ya malamu mpenza. Na mikili mingi, soki ozali kosala bajɛstɛ ebele ebele liboso ya bato, bakomona yo lokola ozali kosakana.

Mokemoke, ntango okomesana koloba kozanga kobanga, bajɛstɛ nyonso oyo okosala mpo na konyata makanisi ya ntina ekomonisa mpenza mayoki na yo, ekomonisa kondima mpe bosembo na yo. Yango ekosala mpenza ete lisolo na yo ezala kitoko.

Salelá elongi na yo. Mbala mingi elongi nde emonisaka mpenza mayoki na yo, koleka biteni nyonso mosusu ya nzoto na yo. Miso na yo, ndenge ozali kofungola monɔkɔ mpe ndenge ozali kotɛngisa motó, nyonso wana ezali komonisa yango. Ata olobi liloba moko te, elongi na yo ekoki komonisa ete ozali kosepela te na eloko moko, oyini yango, ozali komitungisa, kokamwa to ozali na esengo. Ntango elongi na yo ezali komonisa makambo oyo mpe obakisi maloba, bato bakomona yango mpe ekosimba mpenza mitema na bango. Mozalisi atii misisa mingi na elongi na yo: misisa koleka 30. Ntango ozali kosɛka, ozali kosalela misisa yango soki 15.

Ezala ozali koloba na lisangá to ozali na mosala ya kosakola, ozali kosala makasi ete oyebisa bato nsango moko ya kitoko, nsango oyo ekoki kosepelisa mitema na bango. Okomonisa yango soki ozali kosɛka mwa moke, na esengo mpenza. Kasi soki okangi elongi na yo to soki ozali kaka mawamawa, bato bakomituna soki yo moko ozali mpenza kondima makambo oyo ozali koloba.

Kutu soki ozali kosɛka mwa moke, bato bakomona mpenza ete ozali na boboto. Yango ezali mpenza na ntina mingi na ntango oyo tozali, mpamba te bato bakómá kobanga kosolola na bato oyo bayebi bango te. Ntango ozali kosɛka mwa moke, yango ekoki kosalisa bato bákitisa motema mpe bándima makambo oyo ozali koyebisa bango.