Kolendisa bato básalela Biblia

MPOSA na biso ezali ete tósalisa moto nyonso atya likebi na Biblia, Liloba ya Nzambe. Nsango oyo tozali koteya euti mpenza na mokanda mosantu wana mpe tolingi bato báyeba ete makambo oyo tozali koloba euti na biso moko te, kasi euti na Nzambe. Bato basengeli komesene kotyela Biblia motema.

Na mosala ya kosakola. Ntango ozali komibongisa mpo na mosala ya kosakola, ponáká ntango nyonso vɛrsɛ moko to mibale oyo okolakisa bato oyo basepeli koyoka yo. Ata soki obongisi mwa maloba mpo na kolakisa mokanda moko oyo elimbolaka Biblia, ezali malamu mingi otánga mpe vɛrsɛ moko ya Biblia oyo ebongi. Biblia ezali na nguya mingi mpo na kobenda bato oyo bazali lokola bampate, koleka maloba nyonso oyo tokoki kobimisa. Soki likoki ya kotánga Biblia ezali te, okoki koloba maloba ya vɛrsɛ oyo olingi kolobela. Na ekeke ya liboso, bato mingi bazalaki na barulo ya Makomami te. Atako bongo, Yesu na bantoma na ye bazongelaki maloba mingi ya Makomami. Biso mpe tosengeli kosala milende mpo na kokanga bavɛrsɛ na motó mpe kosalela yango malamu na mosala ya kosakola, na bantango mosusu tokoki kozongela kaka maloba na yango.

Soki likoki ya kotánga Biblia ezali, simbá yango malamu mpo moto oyo azali koyoka yo atala mpe alanda ndenge ozali kotánga. Soki moto yango azali kolanda na Biblia na ye moko, akoki mpenza kondima makambo oyo azali kotánga.

Nzokande, osengeli koyeba ete babongoli mosusu ya Biblia babongolaki Liloba ya Nzambe ndenge bango moko balingaki. Na makambo mosusu, mabongoli yango eyokani te na makambo oyo ekomamaki na minɔkɔ oyo bakomaki na yango Biblia na ebandeli. Na mabongoli mingi ya mikolo na biso, balongoli nkombo ya Nzambe, bamonisi malamu te soki bato oyo bakufá bazali wapi, ndenge elobamaki na nkota oyo bakomaki na yango Biblia na ebandeli mpe babombi makambo oyo Biblia elobi na likambo etali mokano ya Nzambe mpo na mabele. Mpo na kolakisa moto likambo oyo bato yango basali, osengeli mbala mosusu kosalela mabongoli ndenge na ndenge ya Biblia to mabongoli ya kala na lokota moko mpo na kokokanisa bavɛrsɛ yango. Na makambo mingi, mokanda Ndenge ya kosolola na bato na Makomami ezali kokokanisa mabongoli ndenge na ndenge mpo na komonisa ndenge bazali kobongola maloba ya bavɛrsɛ oyo tosalelaka mbala mingi. Moto nyonso oyo alingaka solo akozala na botɔndi mpenza soki ayebi makambo yango.

Na makita ya lisangá. Esengeli kolendisa moto nyonso ete asalela Biblia na ye. Yango ezali na ntina na makambo mingi. Esalisaka mpo na kobenda likebi na bango likoló na makambo oyo ozali kolobela. Esalisaka bato bámona bango moko mateya oyo molobi azali kopesa mpo esimba mitema na bango. Esalisaka mpe mpo na kokɔtisa na kati ya makanisi ya bato oyo bayei sika ete mateya na biso euti mpenza na Biblia.

Bato oyo bazali koyoka yo bakolanda na Babiblia na bango bavɛrsɛ oyo ozali kotánga soki yo ozali kolendisa bango básala yango. Ezali malamu mingi kosɛnga bango bákamata Babiblia na bango.

Yo moko nde osengeli kopona vɛrsɛ nini oyo olingi konyata mpe kosɛnga bato ete bátánga yango. Ekozala malamu otánga bavɛrsɛ oyo ekosalisa yo obimisa makanisi ya ntina ya lisolo na yo. Na nsima, soki ntango ezali, bakisá ndambo ya bavɛrsɛ mosusu mpo na kosimba makanisi na yo.

Ya solo, ekoki kaka te kopesa bato mokanda, mokapo mpe vɛrsɛ to kosɛnga bango báluka vɛrsɛ moko. Soki otángi vɛrsɛ moko mpe na nsima okei na mosusu kozanga ete bato oyo bazali koyoka yo bázwa ata ntango ya komona vɛrsɛ ya liboso, yango ekolɛmbisa bango mpe bakotika kotánga na Babiblia na bango. Taláká bango. Soki bato mingi bamoni vɛrsɛ oyo opesi, bandá kotánga yango.

Kanisá liboso. Yebisá libela vɛrsɛ yango, ntango ozali naino koloba, liboso ete otánga yango. Yango ekosala ete olekisa ntango mingi te mpo na kozela bato báluka vɛrsɛ yango. Atako okokoka koloba makambo mingi te soki ozali kotikela bato ntango ya koluka bavɛrsɛ oyo okotánga, yango ezali na ntina mingi, mpamba te epesaka matomba.