Biyano na mituna na bino

◼ Mpo na nini ezali na ntina ete bayangani bálukaka mikapo na Biblia na bango ntango ndeko oyo azali kosala lisukulu asɛngi bango ete batánga mokapo?

Makambo lokola lolenge ya lisolo oyo azali kosala, mpe soki lisolo yango ezali kosɛnga kolimbola vɛrsɛ mokomoko ya mokapo moko ya Liloba ya Nzambe, nde ekomonisa soki molobi asengeli kosɛnga bayangani mbala boni ete bátánga mikapo ya Biblia.

Tosengeli kobosana te ete ntina oyo totángaka mikapo ya Biblia ezali mpo tómona ete makambo oyo molobi azali koloba ezali kouta na Biblia. (Mis. 17:11) Ntina mosusu ezali ya komonisa mikapo ya Makomami oyo ezali mpenza kosimba makambo oyo molobi azali koloba mpe yango ekolendisa kondima ya bayangani nyonso. Soki bayangani bango moko bamoni likambo oyo Biblia elobi na mokapo moko ya ntina oyo molobi atángi, yango ekosimba mpenza makanisi na bango. Longola likambo ya kotánga mikapo ya Biblia, tokozwa mpe litomba mingi soki tozali kozwa banɔti mpe kolanda malamu makanisi oyo molobi azali kobimisa.

Mikapo mingi ya Biblia oyo ezalaka na plan ya la Société ezali mpo na kosalisa molobi, ntango azali kobongisa lisukulu na ye. Mikapo yango ekoki kosalisa ye mpo ayeba makambo mosusu malamu mpe ekoki kosalisa ye mpo akanga mpenza ntina ya mitinda ya Makomami na makanisi na ye mpe ayeba ndenge ya kotya makanisi ya lisolo na ye na molɔngɔ. Molobi akoyeba mikapo oyo ezali na ntina mingi mpo na lisukulu na ye mpe akosɛnga na bayangani ete bálanda ye ntango azali kotánga mikapo yango mpe kolimbola yango. Ezali na ntina te ete bayangani báluka na Biblia na bango mikapo mosusu oyo ezali mpe kosimba makambo oyo molobi azali koloba, ntango azali kolobela mikapo yango to ntango azali bobele koloba maloba oyo ezali na kati ya mikapo yango.

Molobi asengeli kotánga mikapo oyo azali kopesa na kati ya Biblia na ye, kasi asengeli te kotánga yango na lokasa oyo abimisi na ordinatɛrɛ to abɛti na masini. Ntango asɛngi na bayangani ete bátánga elongo na ye, molobi asengeli koyebisa polele mokanda, mokapo, mpe vɛrsɛ ya Biblia oyo bakotánga. Soki apemi moke mpo na kotuna motuna moko to kopesa ndimbola mokuse mpo na komonisa ntina oyo bazali kotánga mokapo yango, akopesa bayangani ntango bámona mokapo yango. Soki ayebisi lisusu mokapo yango, ekosalisa bayangani báyeba epai ezali. Nzokande, esengeli te kopesa nimero ya lokasa epai mokapo yango ezali, mpamba te bayangani nyonso bazali na Biblia ya ndenge moko te. Ntango bayangani bazali koluka mikapo ya Biblia soki molobi asɛngi bango ete báluka, yango ekosalisa bango ete bázwa litomba na nguya ya Liloba ya Nzambe ndenge molobi azali kolimbola yango na boumeli ya lisukulu na ye.​—Ebe. 4:12.