Komemya bato

MAKOMAMI eyebisi biso ete ‘tókumisa bato ya ndenge nyonso’ mpe ‘tóloba mabe mpo na moto te.’ (1 Pet. 2:17; Tito 3:2) Ya solo, moto nyonso oyo tozali kokutana na ye ‘asalemá “na elilingi ya Nzambe.”’ (Yak. 3:9) Klisto akufaki mpe mpo na ye. (Yoa. 3:16) Mpe bato nyonso basengeli koyoka nsango malamu mpo básalela yango mpe bábika. (2 Pet. 3:9) Ezali na bato mosusu oyo bazali bakonzi to bato minene oyo tosengeli kopesa bango lokumu koleka.

Mpo na nini bato mosusu balingaka te kopesa bamosusu lokumu ndenge Biblia esɛngi yango? Mbala mosusu mimeseno ya mboka nde ezali kokata soki nani asengeli kozwa lokumu, na kotalela soki azali moto ya lokumu to te, to na kotalela loposo na ye, soki azali mwasi to mobali, soki azali nzoto kolɔngɔnɔ to te, mbula na ye, bozwi na ye to bokonzi oyo azali na yango. Lelo oyo, bato batosaka lisusu bakonzi ya Leta mpenza te mpo balingi kanyaka mingi. Na mikili mosusu, bato balɛmbi mpenza bomoi oyo bazali na yango, mbala mosusu, mpo bazali kosala mingi kaka mpo na kozwa mwa biloko moke oyo bazali na mposa na yango, mpe bafandi esika moko na bato oyo bapesaka bango limemya te. Bilenge balandaka baninga na bango mpo bátombokela balakisi oyo bango balingaka te mpe bakonzi mosusu. Televizyo ezali kolakisa bana oyo bazali na mayele mabe mpe bazali koluka koyangela baboti na bango, mpe mingi bazali kolanda ndakisa wana. Esɛngaka milende mpo na koboya ete makanisi wana ya mokili ebebisa te lolenge na biso ya kotalela basusu. Kasi ntango tozali kopesa bato lokumu, yango esalaka ete tózwa libaku ya kopesana makanisi.

Limemya mpo na kobanda lisolo. Eyebani ete moto nyonso oyo azali kosala mosala ya Nzambe asengeli komonisa limemya na molato na ye mpe na misala na ye. Esika na esika ezalaka na lolenge na yango ya kolata to mimeseno na yango oyo bato bamonaka ete ebongi. Bato mosusu bamonaka ete kosolola na moto ntango olati ekɔti to otii lobɔkɔ na libenga ezali kozanga limemya. Nzokande na bisika mosusu, bato bakoki kondima likambo yango. Mpo na kozokisa bato te, talelá mimeseno ya esika oyo ofandi. Soki osali bongo, yango ekoki kosalisa yo okima makambo nyonso oyo ekoki kopekisa yo koyebisa bato nsango malamu na lolenge oyo ebongi mpenza.

Ezali mpe ndenge moko mpo na lolenge na biso ya kopesa bato mbote, mingimingi mibange. Mbala mingi, bato bamonaka ete ezali mabe soki elenge azali kobenga mokóló na nkombo na ye mpamba, longola kaka soki mokóló yango ye moko apesi ye nzela. Na bisika mosusu, epekisami mpe ete mikóló bábengaka bapaya na nkombo na bango mpamba. Lisusu, na minɔkɔ mingi, lokola na Lifalanse, basalelaka liloba “vous” (bino) to maloba mosusu mpo na komonisa limemya epai ya moto oyo azali mokóló na yo to mpe oyo azali na bokonzi.

Limemya na ntango okutani na bato. Na bamboka ya mike, esɛngaka ete omonisa ete omoni moto oyo okutani na ye, ezala ntango ozali kotambola na nzela to ntango okɔti na ndako moko. Mpo na yango, okoki kopesa ye mbote mpamba, to kosɛka mwa moke, koningisa motó, to mpe kotombola mwa moke nkiki ya miso na yo. Bato bamonaka ete ntango ozali kotyela moto likebi te, ozangi mpenza limemya.

Bato mosusu bakoki komona ete ozali kotyela bango likebi te, ata soki omonisi ete omoni bango. Mpo na nini? Mpamba te bazali komona ete ozali kotalela bango ndenge bazali te. Mbala mingi, bato bazwelaka basusu makanisi na kotalela kaka nzoto na bango. Bato bakimaka mbala mingi baoyo bazali bibɔsɔnɔ to baoyo bazali na maladi. Nzokande, Liloba ya Nzambe ezali komonisa biso ndenge ya kolinga mpe komemya bato ya lolenge wana. (Mat. 8:2, 3) Moto na moto azali na mpasi na ye oyo eutá na lisumu ya Adama oyo tozwá. Okomiyoka ete bato bazali komemya yo soki mpo na koloba na yo bazali ntango nyonso kotánga kaka mbeba na yo? Okolinga nde ete bátalelaka makambo na yo ya malamu, boye te?

Limemya esɛngi mpe kondima bokonzi oyo moto azali na yango. Na bisika mosusu, esengeli naino kosolola na tata liboso ya kopesa litatoli epai ya bato mosusu ya libota yango. Atako Yehova nde apesi biso mokumba ya kosakola mpe koteya, tondimaka ete Nzambe apesi baboti mokumba ya koteya bana na bango, kopesa bango disipilini mpe kotambwisa bango. (Ef. 6:1-4) Yango wana, ntango tokei na ndako moko, ezali malamu mingi kosolola naino na baboti liboso ya kobanda kosolola to koyekola na bana.

Mibange bayebi makambo mingi ya bomoi mpe tosengeli komemya bango. (Yobo 32:6, 7) Yango esalisaki ndeko mwasi moko mobongisi-nzela oyo azali elenge na ekólo Sri Lanka, oyo akutanaki na mobange mobali moko. Na ebandeli, mobange yango aboyaki koyamba ye mpe alobaki boye: “Ndenge nini yo mwana moke boye okoki koteya ngai Biblia?” Kasi elenge wana azongiselaki ye maloba oyo: “Mpo na koloba solo, nayei koteya yo te, kasi nayei nde koyebisa yo makambo nayekoli oyo epesi ngai esengo mingi mpe etindi ngai nayebisa yango bato.” Eyano ya mobongisi-nzela wana, oyo emonisaki limemya, elamusaki mposa ya moto yango. Atunaki ye boye: “Yebisá ngai, oyekolaki makambo nini?” Elenge yango alobaki boye: “Nayekoli ndenge ya kozala na bomoi ya seko.” Mobange yango abandaki koyekola Biblia na Batatoli ya Yehova. Mibange nyonso te nde bakosɛnga ete opesa bango limemya ya motindo wana, kasi mingi kati na bango bakosepela soki osali yango.

Nzokande, ekómaka ete bamosusu bálekisa ndelo na lolenge ya komonisa limemya. Na bisanga ya Pasifike mpe na bisika mosusu, kosalela mimeseno ya mboka mpo na komonisa limemya ntango ozali kosolola na mokonzi ya mboka ekoki kosala ete bato básepela koyoka Batatoli mpe yango ezali kopesa libaku ya kosolola na bakonzi ya mboka mpe bato oyo bango bazali koyangela. Kasi kolɛtɛ bango ezali na ntina te mpe ezali malamu te. (Mas. 29:5) Ndenge moko mpe, minɔkɔ mosusu esɛngaka kosalela bankombo ya lokumu, kasi baklisto basengeli te kolekisa ndelo na likambo yango ntango balingi komonisa limemya.

Limemya na elobeli na biso. Biblia elendisi biso ete tómonisa ntina ya elikya na biso “na elimo ya boboto mpe na limemya makasi.” (1 Pet. 3:15, 16) Na yango, ata tokoki komonisa moto yango mbala moko ete makanisi na ye ezali mabe, ekozala malamu te kosilisa lokumu na ye mpo na komonisa ye yango, boye te? Ekozala malamu mingi koyoka ye naino, mbala mosusu kotuna ye mpo na nini azali kokanisa ndenge yango mpe na nsima, kotalela mayoki na ye ntango tozali kosalela Makomami mpo na kokanisa na ye, boye te?

Limemya oyo tozali komonisa ntango tozali kosolola na moto moko esengeli mpe komonana ntango tozali koloba liboso ya bato ebele. Molobi oyo azali komemya bato oyo bazali koyoka ye akogangela bango te to akozala te na ezaleli oyo ezali komonisa lokola nde azali koloba ete “soki bólingaka, mbɛlɛ bosalelaki toli oyo.” Koloba ndenge wana elɛmbisaka bato. Ekozala malamu mingi kotalela bato oyo bazali koyoka yo lokola lisangá ya bato oyo balingi Yehova mpe balingi kosalela ye! Lokola Yesu, tosengeli komonisa ete tozali komitya na esika ya bato oyo balɛmbi na elimo, baoyo bayebi makambo mingi te, to baoyo bazali koumela mpo na kosalela toli ya Biblia.

Bato oyo bazali koyoka yo bakomona ete ozali komemya bango soki ozali komitya yo moko mpe lokola moto oyo asengeli kosalela Liloba ya Nzambe malamu koleka. Yango wana, ntango ozali komonisa ndenge ya kosalela makomami, ezali malamu te kosalela ntango nyonso liloba “bino.” Na ndakisa, talá bokeseni oyo ezali kati na mituna oyo mibale: “Bozali kosala nyonso oyo ekoki na bino?” mpe “Ekozala malamu mokomoko na biso amituna ete: ‘Nazali mpenza kosala nyonso oyo ekoki na ngai?’” Likanisi ya mituna wana nyonso mibale ezali ndenge moko, kasi oyo ya liboso ezali komonisa lokola nde molobi azali komitya te esika moko na bato oyo bazali koyoka ye. Motuna ya mibale ezali kolendisa moto mokomoko, ezala mpe molobi, ete amitalela ye moko mpe makanisi na ye.

Koluka te kosalela makanisi ya kosɛkisa kaka mpo bato oyo bazali koyoka yo básɛka. Yango elongolaka lokumu ya nsango oyo euti na Biblia. Ya solo, tosengeli kosepela na mosala oyo tozali kosalela Nzambe. Ekoki mpe kozala ete makambo mosusu oyo tosengeli koloba na lisolo na biso ezali ya kosɛkisa. Kasi kokómisa makambo ya ntina lokola makambo ya lisɛki ekomonisa ete ozali komemya bato oyo bazali koyoka yo te mpe ozali komemya Nzambe te.

Tiká ete lolenge na biso ya kobanda lisolo, bizaleli na biso mpe maloba na biso emonisaka ntango nyonso ete tozali kotalela basusu ndenge Yehova ateyi biso tótalelaka bango.