Kosalela malamu biloko oyo okoki kolakisa bato

MPO na nini kosalela biloko ya kolakisa bato ntango ozali koteya? Ezali mpo yango ekoki kosala ete mateya na yo esimba mpenza mitema ya bato. Yehova Nzambe na Yesu Klisto basalelaki biloko ya kolakisa bato, mpe tokoki kolanda ndakisa na bango. Soki, na ntango ozali koloba, ozali mpe kolakisa bato biloko, mateya na yo ekokɔta na banzela mibale: na matoi mpe na miso. Yango ekoki kosalisa yo osimba likebi ya bato oyo bazali koyoka yo mpe likanisi na yo ekɔtela bango malamumalamu. Ndenge nini okoki kosalela biloko ya kolakisa bato ntango ozali kosakola nsango malamu? Ndenge nini okoki koyeba ete ozali kosalela yango na ndenge oyo ebongi?

Ndenge bateyi oyo baleki bateyi nyonso basalelaki biloko ya kolakisa bato. Mpo na kopesa mateya ya ntina mingi, Yehova asalelaki biloko oyo moto akoki kobosana yango te. Mokolo moko na butu, abimisaki Abalayama libándá mpe alobaki: “Talá likoló, mpe tángá motuya ya [minzoto] . . . soko okoki kotángá yango. . . . Bana na yo bakozala na motuya bongo.” (Gen. 15:5) Atako na miso ya bomoto likambo yango emonanaki lokola nde ekoki kosalema te, nzokande esimbaki mpenza motema ya Abalayama mpe andimelaki Yehova ete akoki kosala yango. Mokolo mosusu, Yehova atindaki Yilimia na ndako ya moto moko oyo azalaki kosala bambɛki mpe alobaki na Yilimia atala ndenge moto yango azali kobalolabalola mabele ya mbɛki mpo ekóma motindo ye alingi. Liteya wana, oyo emonisaki bokonzi oyo Yehova azali na yango ya kosala nyonso oyo alingi na bato, okoki kobosana yango te! (Yil. 18:1-6) Mpe liteya oyo Yehova apesaki Yona ntango akaukisaki mwa nsinga ya libɔkɛ mpo na komonisa ye ntina ya kozala na motema mawa, Yona akokaki ata moke te kobosana yango. (Yona 4:6-11) Yehova ayebisaki kutu basakoli na ye ete básala mwa bilakiseli ya makambo oyo balobelaki na bansango ya bisakweli mpe básalela mwa biloko mosusu oyo ebongi mpo bato bámona. (1 Mik. 11:29-32; Yil. 27:1-8; Ezek. 4:1-17) Lisusu, hema mpe tempelo ezali mpe biloko oyo, ntango tozali kotala yango, ezali kosalisa biso tókanga ntina ya makambo ya solosolo oyo ezali na likoló. (Ebe. 9:9, 23, 24) Nzambe asalelaki mpe bimonaneli mingi mpo na koyebisa bato makambo ya ntina.​—Ezek. 1:4-28; 8:2-18; Mis. 10:9-16; 16:9, 10; Emon. 1:1.

Bongo Yesu, ndenge nini asalelaki biloko ya kolakisa bato? Ntango Bafalisai mpe bato ya Helode batyelaki ye motambo mpo na kokanga ye na maloba na ye, Yesu asɛngaki bápesa ye denali moko mpe alakisaki bango elongi ya Kaisala oyo ezalaki na mbongo yango ya ebende. Na nsima, alobaki ete biloko ya Kaisala esengeli kopesa Kaisala, biloko ya Nzambe na Nzambe. (Mat. 22:19-21) Lisusu, mpo na koteya bato ndenge ya kokumisa Nzambe na biloko nyonso oyo tozali na yango, Yesu alakisaki bango mwasi moko mobola oyo akufelá mobali. Mwasi yango ayaki na tempelo mpe apesaki likabo ya mbongo mibale ya bibende ya motuya moke mpenza, nyonso oyo azalaki na yango mpo na kobikela. (Luka 21:1-4) Mokolo mosusu, azwaki mwana moko ya moke mpo na kopesa ndakisa ya komikitisa mpe koboya komitombola. (Mat. 18:2-6) Kutu ye moko mpe apesaki ndakisa oyo ebongi mpo na komikitisa: asukolaki bayekoli na ye makolo.​—Yoa. 13:14.

Ndenge ya kosalela biloko ya kolakisa bato. Biso tokoki kosolola na nzela ya bimonaneli te lokola Yehova. Atako bongo, ezali na bafɔtɔ mingi na mikanda ya Batatoli ya Yehova oyo ekoki kotinda moto akanisa. Salelá yango mpo na kosalisa bato oyo basepelaka na solo bámona na makanisi na bango Paladiso oyo Liloba ya Nzambe elaki ete ekozala awa na mabele. Ntango ozali koyekola na moto Biblia, okoki kolakisa ye fɔtɔ oyo ekokani na likambo oyo bozali koyekola mpe tuná ye eloko nini azali komona. Kutu, na ntango Amosa azalaki komona bimonaneli mosusu, Yehova azalaki kotuna ye: “Amosa, omoni nini?” (Amo. 7:7, 8; 8:1, 2) Yo mpe okoki kotuna mituna ya ndenge wana ntango ozali kolakisa moto bafɔtɔ oyo batyá na mikanda mpo na koteya.

Soki osali mituya to ozwi etanda moko oyo epesi molɔngɔ ya badati ya makambo minene ya kala, yango ekoki kosalisa bato bákanga malamumalamu ntina ya bisakweli lokola oyo ya “bantango nsambo” ya Danyele 4:16 mpe oyo ya “bapɔsɔ ntuku nsambo” ya Danyele 9:24. Biloko wana ya kolakisa bato ebimaka na mikanda mingi oyo toyekolaka.

Na boyekoli na bino ya libota, ntango bozali kolobela biloko lokola hema, tempelo ya Yelusaleme, mpe tempelo oyo Ezekiele amonaki na emonaneli, bokoki kokómisa boyekoli na bino pɛtɛɛ soki bosaleli bafɔtɔ to mpe bililingi. Okoki komona bililingi yango na kati ya mokanda Étude perspicace des Écritures, to na apɛndisi ya Saintes Écritures​—Traduction du monde nouveau—​avec notes et références, to mpe na banimero ndenge na ndenge ya Linɔ́ngi ya Mosɛnzɛli.

Ntango ozali kotánga Biblia yo na libota na yo, salelá malamumalamu bakalati ya bisika oyo balobeli. Bótalela malamu nzela oyo Abalayama asalaki mobembo banda na Ulu tii na Alana, mpe tii na Betele. Bótalela mpe nzela oyo ekólo mobimba ya Yisalaele elekaki ntango babimaki na Ezipito mpe basalaki mobembo tii na Mokili ya Ndaka. Bóluka koyeba esika nini mabele ya libula ya libota mokomoko ya Yisalaele ezalaki. Bótalela bandelo ya ekólo Yisalaele na ntango ya bokonzi ya Salomo. Bótalela nzela mobimba oyo Eliya alekaki banda na Yizelele tii na esobe mpe katisá Bele-Seba, mpo na kokima Yezabele oyo azalaki kokanela ye. (1 Mik. 18:46–19:4) Bóluka koyeba bingumba minene mpe bingumba mike epai Yesu asakolaki. Bótalela banzela ya mibembo ya Paulo, ndenge elobelami na mokanda ya Misala.

Biloko ya kolakisa bato esalisaka mpenza mpo na komonisa bayekoli ya Biblia ndenge nini lisangá etambwisamaka. Okoki kolakisa moto oyo oyekolaka na ye Biblia lokasa ya programɛ ya liyangani moko mpe koyebisa ye makambo nini toyokaka na mayangani. Bato mingi bakamwaka ntango otambwisi bango mpo na kotala Ndako ya Bokonzi to betele moko ya Batatoli ya Yehova. Yango ekoki kozala lolenge malamu ya kolongola bato makanisi mabe oyo bazalaka na yango mpo na mosala na biso mpe ntina na yango. Ntango ozali kotambwisa moto mpo atala Ndako ya Bokonzi, monisá ye ndenge nini yango ekeseni mpenza na bandako-nzambe mosusu. Salisá ye amona ete esika yango, atako ezali na biloko ya kokamwa te, ezali esika malamu ya koyekola. Lakisá ye makambo oyo ebongisami mpenza mpo na mosala na biso ya kosakola na ndakisa, bisika ya kokabola bazulunalo, bakalati ya teritware, mpe bakɛsi ya makabo (oyo ekeseni na basaani ya kokɔngɔla mabonza).

Soki bozali na bakasɛti-video oyo ebongisami na Lisangani ya Mikóló-Bakambi, bósalela yango mpo na kosalisa bato bákóma kotyela Biblia motema, mpo na kosalisa bayekoli ya Biblia báyeba mosala oyo Batatoli ya Yehova bazali kosala, mpe kolendisa baoyo bakotala yango básalela makambo oyo Biblia esɛngaka.

Ndenge ya kolakisa biloko yango liboso ya bato mingi. Soki obongisi yango malamumalamu mpe olakisi yango na ndenge oyo ebongi, biloko wana ya kolakisa bato ekoki kosalisa yo mpenza mpo na koteya liboso ya bato ebele. Moombo ya sembo mpe ya mayele azali kobimisa biloko ndenge na ndenge ya kolakisa bato.

Masolo ya boyekoli ya Linɔ́ngi ya Mosɛnzɛli ezalaka mbala mingi na bafɔtɔ mpe bililingi mosusu oyo motambwisi akoki kosalela mpo na komonisa polele makanisi ya ntina, ndenge moko mpe mikanda oyo tosalelaka mpo na Boyekoli ya Mokanda.

Baplan mosusu ya masukulu ya bato nyonso ekoki mpe kotinda yo osalela biloko ya kolakisa bato mpo na komonisa makanisi ya ntina. Kasi bato bakozwa bolamu mingimingi nde soki obendi makanisi na bango na makambo oyo ezali na Biblia, mpo Biblia ezali na mabɔkɔ na bango. Soki omoni ete lisukulu na yo ekosɛnga olakisa fɔtɔ to osala mwa plan ya mokuse esika okokoma makanisi ya minene na kati, luká koyeba libelalibela soki bato oyo bakofanda na bakiti ya nsima bakomona fɔtɔ yango to bakokoka kotánga plan oyo osali. Biloko ya ndenge wana esengeli kosalelama mingimingi te.

Ntango tosalelaka biloko wana ya kolakisa bato na masolo mpe ntango tozali koteya, ezalaka mpo na kosakana te. Soki eloko oyo osaleli mpo na kolakisa bato ezali ya malonga, ekosalisa bato oyo bazali kotala bákanga malamu mpenza makanisi oyo osengelaki mpenza konyata. Biloko wana esungaka mingi ntango olingi komonisa ndimbola ya maloba na yo, ekómisaka yango pɛtɛɛ mpo na kokanga ntina, esungaka mpe ntango osaleli yango mpo na kondimisa ete makambo oyo olobi ezali solo. Soki eloko oyo osaleli mpo na kolakisa bato ezali ya malamu mpe soki osaleli yango na ndenge oyo ebongi, eloko wana ekobunga ata moke te na bɔɔngɔ ya bato mpe liteya oyo opesi ekofanda mbula na mbula na makanisi na bango.

Matoi mpe miso esalaka mosala mingi ntango moto azali koyekola makambo. Kanisá lisusu ndenge Bateyi oyo baleki bateyi nyonso basalelaki miso, matoi mpe bongo na bongo, mpe salá makasi yo mpe osala lokola bango na ntango ozali kosala milende mpo na koteya basusu.