Makambo oyo baboti basengeli kosalela bana
NDENGE oyo mwana abotamaka ezali likambo moko oyo moto akoki kolimbola yango mpenza malamu te. Mwana autaka na nzoto ya tata ná ya mama. Kosangana ya bango mibale nde esalaka ete moto oyo azali na bomoi akola na libumu ya mama. Na yango, ezali likambo ya kokamwa te koyoka bato bazali koloba, ntango mwana abotami, ete kobotama ya mwana ezali mpenza “likamwisi.”
Kobota bana ezali kaka ebandeli ya mokumba ya baboti. Na ebandeli, baboti to mikóló mosusu nde bakokisaka bamposa ya bana mike, kasi wana bana bazali kokola, bakómaka mpe na mposa ya makambo mosusu. Bazalaka na mposa ya lisalisi mpo bákola malamu na makanisi, na mayoki, na bizaleli mpe na elimo.
Mpo bana bákola malamu, esengeli baboti na bango bálingaka bango mingi. Basengeli kolinga bango kaka na maloba te, kasi mpe na misala. Bana basengeli komonaka ndakisa malamu ya baboti na bango. Esengeli kolakisa bango bizaleli malamu mpe mitinda oyo basengeli kolanda. Basengeli na makambo wana banda bazali naino bana mike mpenza. Soki bamposa wana ya bana ekokisami nokinoki te, makambo oyo ebimaka na nsima ekoki kolɛmbisa mpe elɛmbisaka mpenza.
Mitinda oyo eleki malamu ezali nde na Biblia. Mateya ya Biblia epesaka matomba oyo ekokani na mosusu te. Mateya yango esalisaka bana báyeba ete oyo bazali koteya bango ezali maloba ya Mozalisi na bango, Tata na bango ya likoló, kasi ezali maloba ya bato te. Yango nde esalaka ete toli oyo bazali kopesa bango ezala na nguya oyo ekokani na mosusu te.
Biblia ezali kolendisa baboti ete básala makasi mpo na kokɔtisa mitinda ya sembo na makanisi ya bana na bango. Nzokande, ntango bana bazali kokola, mbala mingi ekómaka mpasi mpo baboti básolola na bango makambo oyo eleki ntina. Buku Yekolá epai ya Moteyi Monene ekomami mpo na kosalisa bango bázala na mokakatano wana te. Na buku oyo, okokuta makambo ya elimo oyo yo ná bana na yo bosengeli kotánga. Na koleka, buku oyo ezali kolendisa bana básololaka mingi na baoyo bakotánga yango elongo na bango.
Okomona ete buku oyo ezali na mituna oyo ezali kosɛnga bana bápesa biyano. Okokuta ebele ya mituna oyo esengeli. Ntango okómi na mituna yango, okomona mwa mokɔlɔtɔ (—). Mwa mokɔlɔtɔ yango ezali kosɛnga yo opema mwa moke mpe ezali kolendisa mwana apesa likanisi na ye. Bana basepelaka bápesaka mpe makanisi na bango. Soki te, bakolɛmba kolanda lisolo.
Kasi, likambo ya ntina koleka yango oyo: mituna wana ekosalisa yo oyeba makanisi ya mwana. Na ntembe te, na bantango mosusu mwana akoki kopesa biyano oyo ezali malamu te. Kasi makambo oyo elandi motuna mokomoko ebongisami mpo na kosalisa mwana ayeba kokanisa malamu.
Bililingi koleka 230 oyo ezali na buku oyo ezali mpenza kobenda likebi. Mingi kati na bililingi yango ezali na mituna pembeni na yango, oyo ezali kolendisa mwana apesa makanisi na ye, na kolanda makambo oyo amoni mpe oyo atángi. Talelá bililingi yango elongo na mwana. Bililingi yango ezali esaleli moko ya malamu mpenza mpo na koteya mpe kokɔtisa na makanisi ya mwana mateya oyo boyekoli.
Ntango mwana ayebi kotánga, lendisá ye atángelaka yo buku yango mpe atángaka yango ye moko. Soki azali kotánga yango mingi, toli malamu oyo ezali na kati ekokɔta mpenza na makanisi na ye mpe na motema na ye. Kasi mpo bolingo mpe limemya ezala makasi kati na yo ná mwana, salá nyonso oyo esengeli mpo otángaka buku oyo elongo na ye, mpe saláká bongo mbala na mbala.
Makambo oyo bana bazali komona mpe koyoka lelo, lokola makambo ya kosangisa nzoto, misala ya bilimo mabe mpe makambo mosusu ya nsɔni, ezali makambo oyo na bambula oyo euti koleka, bana bakokaki komona mpe koyoka te. Na bongo, esengeli kobatela bango, mpe buku oyo ekosalisa yo oyeba ndenge ya koteya makambo yango na limemya mpe polele. Lokola ezali bongo, esengeli mpenza koteya bana mpo báyeba Ye oyo apesaka bwanya nyonso, Tata na biso ya likoló, Yehova Nzambe. Yango nde Yesu, Moteyi Monene, azalaki kosala ntango nyonso. Tozali mpenza kolikya ete buku oyo ekosalisa yo mpe libota na yo ete bózala na bomoi oyo ekosepelisa Yehova, mpo na bolamu na bino ya seko.