Mokapo 17

Oyo nasengeli koyeba na ntina etali kosala boninga na kelasi

“Soki namoni bilenge bazali kotambola elongo, na motema na ngai nalobaka boye: ‘Bazali mpenza baninga malamu. Nazali na mposa ya baninga ya boye.’”​—Joe.

“Kozwa baninga na kelasi ezalaki mpasi te mpo na ngai. Kasi, yango nde ebendelaki ngai mikakatano.”​—Maria.

MOTO nyonso alingaka kozala na baninga, oyo akoki kosepelaka elongo na bango na ntango ya bisengo mpe akoki koyebisa bango makambo na ntango ya mpasi. Yesu azalaki na baninga, mpe azalaki kosepela kolekisa ntango ná bango. (Yoane 15:15) Na nsima, mwa moke liboso akufa likoló ya nzete ya mpasi, moninga na ye Yoane, “moyekoli oyo ye alingaki mingi,” azalaki pembeni na ye. (Yoane 19:25-27; 21:20) Osengeli mpenza na baninga ya ndenge wana, oyo bakozala na yo ntango nyonso, ezala na bisengo to na mpasi!

Mbala mosusu okanisaka ete omoni baninga ya ndenge wana na kelasi​—mwana moko to bana mibale oyo oyokanaka na bango malamu. Yo ná bango bozali na mikano ndenge moko mpe bobɛtɛlanaka masolo. Mpo na yo, omoni ete bazali te “baninga mabe.” (1 Bakorinti 15:33) Elenge mwasi moko na nkombo Anne alobi boye: “Omonaka bilenge yango mikolo nyonso. Mpe soki okutani na bango, omiyokaka malamu. Ezali te lokola ntango tozalaka ná bandeko ya lisangá, epai esɛngaka kokeba na makambo oyo ozali kosala. Na kelasi, okoki kosala makambo na motema mpiɔ.” Lisusu, mbala mosusu mpe okoki kokanisa lokola Loïs, elenge moko oyo alobaki boye: “Nalingaki te baninga na ngai ya kelasi bámona ete Batatoli ya Yehova bazali ndenge bato mosusu bakanisaka; nalingaki bámona ete tozali bato lokola bato nyonso.” Makambo nyonso wana esengeli kotinda yo okóma mpenza na baninga na kelasi?

Mpo na nini esengeli kokeba?

Tótala likambo ekómelaki Maria, oyo tolobeli na ebandeli ya lisolo oyo. Lokola azalaki moto ya boboto, ezalaki mpasi te mpo azwa baninga; kasi azalaki na mokakatano ya koyeba banani bazali baninga ya mabe. Alobi boye: “Nazalaki kolinga moto nyonso asepela na ngai, ezala mwana mwasi to mwana mobali. Nsukansuka, nabendamaki mpenza na makambo mabe ya mokili oyo.” Loïs mpe akutanaki na likambo ya ndenge wana. Alobi boye: “Nakómaki mpenza na bizaleli ya baninga na ngai. Nabandaki kosala makambo lokola bango.”

Tokoki kokamwa te ete bilenge wana bakómaki bongo. Na ntembe te, mpo na kozala moninga ya motema ya moto moko, bosengeli kozala na mikano mpe bizaleli ndenge moko ná ye. Soki okómi moninga ya motema ya bato oyo bandimaka te mateya mpe mibeko ya Biblia oyo yo ondimaka, nsukansuka baninga yango bakobebisa bizaleli na yo. (Masese 13:20) Mpo na ntina yango nde ntoma Paulo akomaki ete: “Bókangana te na ekanganeli ya mabe esika moko na bato oyo bazali bandimi te.”​—2 Bakorinti 6:14.

Oyo okoki kosala

Toli ya Paulo emonisi nde ete osengeli kokimaka bana-kelasi na bino mpe kofandaka kaka yo moko? Te! Mpo na ‘kokómisa bato bayekoli na bikólo nyonso,’ bakristo basengeli koyokana na bato nyonso: basi to mibali, bato ya mposo nyonso, mangomba nyonso, mpe bikólo nyonso.​—Matai 28:19.

Na likambo yango, ntoma Paulo apesaki ndakisa malamu mpenza. Ayebaki kosolola na “bato ya ndenge nyonso,” ata baoyo bazalaki bato ya mangomba mosusu. (1 Bakorinti 9:22, 23) Yo mpe okoki kolanda ndakisa na ye. Zaláká na boboto epai ya baninga na yo ya kelasi. Bósololaka malamu. Kasi, kolinga te ete maloba mpe ezaleli na yo ezala ndenge moko na oyo ya baninga na yo ya kelasi. Kasi, ntango kaka bokutani, yebisá bango na limemya nyonso ntina oyo otosaka mibeko ya Biblia.​—2 Timote 2:25.

Ya solo, bakomona ete okeseni na bango, mpe ezali pɛtɛɛ te kozala bongo. (Yoane 15:19) Kasi, kanisá naino likambo oyo: Soki ozali na kati ya bwato, ozali komona bato bazali kozinda, likambo nini ya malamu okoki kosala mpo na kosalisa bango? Okotika bwato mpo yo mpe omibwaka na mai? Soki moke te!

Ndenge moko mpe, na kelasi okutanaka na bilenge oyo Yehova abatelaka te mpo bazali te baninga na ye. (Nzembo 121:2-8) Soki otiki mibeko ya Yehova kaka mpo okóma moninga ya motema ya bana-kelasi na bino, okobebisa boninga na yo ná Nzambe. (Baefese 4:14, 15; Yakobo 4:4) Ekozala malamu soki omeki kosalisa baninga na yo ya kelasi báyeba ndenge oyo bakoki kosalela Yehova mpo bango mpe bákɔta na bwato ya elilingi mpe bábika. Na ndenge yango, okoki mpenza kozala moninga ya solo!

VƐRSƐ OYO EKOSALISA YO

“Nazali kosala makambo nyonso mpo na nsango malamu, mpo nasakola yango elongo na bamosusu.”​—1 Bakorinti 9:23.

TOLI

Soki baninga na yo mosusu basepeli koyeba mateya ya Biblia oyo ondimaka, osengeli kopesa bango ntango bámonisa makanisi na bango. Yokáká bango malamumalamu. Ntango ozali koloba, saláká yango “na boboto mpe na limemya makasi.”​—1 Petro 3:15.

OYEBAKI YANGO . . . ?

Bato mingi oyo bazali lelo basaleli ya Yehova bayekolaki Biblia epai ya moninga moko ya kelasi oyo abangaki te mpo na kolobela bango mateya ya Biblia oyo andimaka.

MAKAMBO OYO NAKOSALA

Soki namoni ete boninga na ngai ná mwana-kelasi moko ebandi kokóma makasi, nako ․․․․․

Soki mwana-kelasi moko azali kosɛka lingomba na ngai, nakosala boye: ․․․․․

Na mokapo oyo, nakosepela kotuna moboti (baboti) na ngai boye: ․․․․․

OKANISI NINI?

● Mpo na nini okanisi ete emonanaka lokola kozwa baninga na kelasi ezali pɛtɛɛ koleka na lisangá?

● Makama nini ekoki kobima soki ozali kolekisa ntango ná moninga moko oyo azali Motatoli te nsima ya kelasi?

● Matomba nini okoki kozwa soki oyebisi baninga na yo ya kelasi ete ozali Motatoli ya Yehova?

[Likanisi ya paragrafe na lokasa 143]

‘‘Nazalaki kolanda kaka ndenge oyo bilenge mosusu bazalaki kosala na kelasi, yango wana ezalaki mpasi te mpo nazwa baninga. Kasi, mikakatano oyo ekómelaki ngai na nsima eteyaki ngai. Lelo oyo, nazali na baninga na lisangá, bato oyo nakoki kotyela motema.’’​—Daniel

[Elilingi na lokasa 146]

Mpo na kosalisa moto oyo azali kozinda na mai, ekosɛnga omibwaka na mai to okobwakela ye eloko oyo ekoki kosalisa ye?