Makambo oyo ezali solo mpe oyo ezali kondimisa

Luka 1:3

NA MOKUSE: Zwá makambo na mikanda to na bisika mosusu oyo ekoki kotyelama motema mpo na kosalisa bato bákóma na likanisi oyo ebongi.

NDENGE YA KOSALA YANGO:

• Zwá makambo na mikanda oyo ekoki kotyelama motema. Makambo oyo okoloba euta na Liloba ya Nzambe, mpe soki esengeli, tángá yango mbala moko kuna na kati. Soki okolobela liteya moko ya siansi, to nsango moko boye, to likambo moko oyo esalemá, to likambo mosusu nyonso, talelá naino soki ozwi yango na esika oyo ekoki kotyelama motema to ezalaka kaka bongo tii lelo.

• Lobelá makambo ndenge ezali mpenza. Ndimbola nyonso oyo okopesa na vɛrsɛ esengeli koyokana na lisolo mobimba epai yango euti, to na nsango mobimba ya Biblia, to mpe na makanisi oyo ezali na mikanda ya “moombo ya sembo mpe ya mayele.” (Mat. 24:45) Likanisi nyonso oyo ozwi na mokanda ya mokili esengeli koyokana na lisolo mobimba epai yango euti mpe na makanisi ya moto oyo akomaki yango.

• Salisá bato bákanisa. Soki otángi vɛrsɛ moko to otángi maloba ya mokanda moko, tuná mituna oyo ebongi to pesá ndakisa moko mpo na kosalisa bato bákóma na likanisi oyo ebongi.