Mituna na batangi

◼ Kati na 1 Bakolinti 15:5, banani bazali “bazomi na mibale” oyo Yesu amonanaki epai na bango?

Komonana oyo elobelami kati na 1 Bakolinti 15:5 ezali yango moko mpe na oyo eyebisami kati na Yoane 20:26-29, epai eyebisami ete Thomas mpe azalaki wana. Kasi liloba “bazomi na mibale” elimboli etuluku ya bantoma mpe tokoki kotanga kati na yango Matthias.

Kolobelaka mpo na lisekwa, Paulo amonisi ete nsima na kosekwa na bakufi, Yesu amonanaki epai na mwa bato. Ntoma alobi ete “Klisto amonanaki epai na Céphas mpe nsima epai na bazomi na mibale”. Na nsima amonanaki epai na bandeko nkama mitano na ntango moko”.​—1 Bakolinti 15:5, 6.

Yesu aponaki bantoma 12 kati na bayekoli na ye. (Matai 10:2-5) Yuda Moiskariote te, moko kati na bazomi na mibale, atekaki ye, mpe amibomaki. (Matai 26:20-25; 27:3-10) Yango wana, na ntango na kufa mpe lisekwa na Klisto, bantoma ya sembo batikalaki bobele 11 kati na 12. Longwa na eleko ya lisekwa na ye kino ntango abutaki na likolo, Yesu amonanaki epai ya bayekoli na ye mingi. Nzokande, ezali mpenza nsima na makambo wana bantoma bamonaki ntina ya kotya moto mosusu na esika na Yuda. Na lisungi na Nzambe, Matthias aponamaki, mpe “abakisamaki na bantoma zomi na moko”.​—Misala 1:6-26.

Na yango, bamoko bazali komituna mpo na nini Paulo alobaki ete Yesu amonanaki epai na “bazomi na mibale”, mpamba te na ntango yango Yuda asilaki kokufa mpe Matthias aponamaki naino te lokola ntoma. Na solo mpenza, ezalaki se na “bantoma zomi na moko” kati na baoyo baponamaki na ebandeli mpe batindamaki na Yesu.​—Luka 6:13-16.

Ata moto moko azangi, ezalaka likambo ya kolongobana mpo na kolobela etuluku. Yango wana elobamaka mingimingi: “Batambwisi bazwaki ekateli . . . ; “lisangani ya bankulutu ekoyangana . . .” Ekoki kosalema ete elobeli yango “bazomi na mibale” esalemaki mpo na kolobela bantoma nyonso, ata moko to mibale kati na bango bazalaki te. (Misala 6:1-6) Ntango Yesu amonanaki mpo na mbala ya liboso epai na bayekoli oyo bazalaki kati na ndako oyo bikuke na yango ekangamaki, “Thomas, moko na bazomi na mibale, . . . azalaki na bango elongo te”. Mikolo mwambe na nsima, azalaki na bango elongo mpe ntembe na ye nyonso esilaki. (Yoane 20:19-29) Ata Matthias aponamaki naino te mpo na kozwa esika na Yuda, azalaki moyekoli na Klisto uta kala. (Misala 1:21, 22) Lokola azalaki mpenza moninga na bantoma mpe mwa ntango moke na nsima “abakisami” na bango, atangamaki solo kati na “bazomi na mibale” oyo lisolo na Paulo elobeli, lisolo oyo akomaki mpo na komonana na Yesu.