Mangomba ya lokuta mazali lokola mwasi ya pite
1. Ndenge nini bato mingi bazali kotalela mosala ya pite?
BAMOKO balobelaka yango ete ezali mosala ya kalakala na mokili. Ezali mosala nini? Oyo ya kozala mwasi ya pite. Na momeseno, liloba mwasi ya pite elakisi mwasi moko oyo azali kotekisa nzoto na ye. Nzokande, kala etamboli motindo oyo ezalaki lokola lokumu.
2, 3. Likeseni nini ezali kati na mosala ya banganga-basi na Babilone ya kala mpe Mibeko oyo Jéhovah apesaki na Bayisraele na ntina etali mosala ya pite, ezala na mibali to na basi?
2 Na ntina yango, tala makambo tozali kotanga kati na mokanda mokomaki professeur S. Hooke, oyo azali na boyebi mingi na ntina na bamboka ya kala etangami na Biblia; ye alobi boye na ntina na bonganga kati na Babilone ya kala: “Bonganga ezalaki bobele mpo na mibali te. Basi mpe bazalaki kosala mosala yango kati na ba tempelo minene. Kozala nganga-mwasi etalelamaki lokola lokumu, mpe toyebi ete mikonzi mingi bapesaki bana na bango ya basi na mosala yango ya bonganga. Basi yango bazalaki basi ya pite, mpenzampenza na bileko ya milulu minene ya kosambela banzambe na bango. . . . Temple ya Ishtar [nzambe-mwasi mpo na makambo matali kobota mingi mpe etumba] ezalaki na ebele na basi ya motindo oyo.”
3 Tala likeseni monene kati na makambo oyo mpe losambo oyo Bayisraele bazalaki kosambela Jéhovah Nzambe. Moko na mibeko mipesamaki na libota yango ezalaki boye: “Mwasi na pite na tempelo akozala kati na bana basi na Yisraele te, mpe mobali na tempelo na kosala pite na babali akozala kati na bana babali na Yisraele te. Okoya na lifuti na mwasi na pite to lifuti na mbwa na kati na ndako na Jéhovah Nzambe na yo te mpo na kofuta likabo na ndai, mpo ete bango mibale bazali mbindo na miso na Jéhovah Nzambe na yo.” (Deteronome 23:17, 18) Epekisamaki bongo komema mosolo ya pite na temple ya Nzambe. Ata esalamaki mpo na makambo ya losambo te, nzokande mosala ya pite ezalaki ntango nyonso mosala ya nsoni. Bayisraele bazwaki etinda oyo: “Okobebisa mwana mwasi na yo na kozalisa ye mwasi na pite te, na ntina ete mokili epengwa na pite mpe etonda na lisumu te.” Mibeko mipekisaki mosala ya pite mpe kosangana mibali na mibali oyo ebengamaki ete “eloko na mbindo”, ezalaki libateli mpo na libota mobimba ya Yisraele na mosuni mpe na elimo.—Levitike 19:29; 20:13.
Pite na elimo: eloko mabe koleka
4. Wapi pite oyo eleki mabe?
4 Nzokande, na miso na Jéhovah, ezali na lolenge mosusu na pite eleki mabe: pite na elimo. Esalamaka na baoyo balobi ete bazali kosambela Nzambe nzokande epai mosusu bamipesi na banzambe mosusu mpe bazali kosambelaka yango. Yelusaleme ya kala esalaki pite makasi na kopesaka makabo epai na mabota oyo bazalaki kosala pite na elimo elongo na ye, kobebisaka bongo losambo ya peto.—Ezekiele 16:34.
5, 6. Na ekeke ya ntuku mibale, banani bazali kosala pite na elimo, mpe yango ebimisi mituna nini?
5 Na ekeke ya ntuku mibale lisusu mangomba ya mokili bazali kosalaka pite na elimo. Boklisto ya mokili oyo ezali eteni eleki monene mpe eleki nguya kati na liboke oyo Biblia ebengi yango “Babilone Monene, mama na basi na pite mpe na makambo nyonso na bosoto na mokili.”—Emoniseli 17:5.
6 Kasi, nsuka na Babilone Monene ekozala nini? Na nini yango etali yo, elongo na balingami na yo? Soki Nzambe akweisaki basali-pite na Yisraele ya kala, ndenge nini akotalela pite ya elimo oyo ezali kosalema na mikolo na biso? Masolo malandi makoyanola mituna oyo mpe na mituna misusu mikangani na yango.