Yesu, bomoi na ye mpe mosala na ye

Yesu akoti na nkembo nyonso na Yelusaleme

NA NTONGO ya mokolo elandaki dimanche le 9 Nisan, Yesu alongwe na Béthanie elongo na bayekoli na ye; bakei na Yelusaleme na nzela na ngomba na Olive. Mosika te, bakomi pene na Bethphagé, oyo ezali pene wana. Yesu alobi epai na mibale kati na bayekoli na ye:

“Bokenda na mboka liboso na bino mpe nokinoki bokomona mpunda ekangami mpe mwana na mpunda na ye elongo. Bokangola bango mpe boya na bango epai na ngai. Soko moto alobi likambo nini na bino, boloba ete, Nkolo azaili na bosenga na bango mpe akotinda bango nokinoki.”

Na ebandeli, bayekoli bakangi ntina te ete malako yango mazali na boyokani na kokokisama na esakweli moko ezwami na Biblia, kasi bakokanga ntina na yango na nsima. Na bongo, mosakoli Zakaria asakolaki ete Mokonzi oyo alakamaki na Nzambe akokota kati na Yelusaleme likoló na mwana na mpunda. Salomó mpe amataki likoló na mwana na mpunda ntango akendaki kopakolama mafuta.

Na bongo, bayekoli bakei na Bethphagé, bazwi mwana na mpunda mpe mama na ye, kasi bamoko na baoyo bazali wana batuni bango: “Bozali kosala nini?” Eyoki bango ete nkolo nde asengi banyama yango, bato yango batiki bayekoli ete bamema banyama epai na Yesu. Na nsima, bayekoli batandi bilamba likoló na mama mpe mwana na mpunda, kasi Yesu akomata nde likoló na mwana na mpunda.

Wana Yesu azali kobelema na Yelusaleme, bato mpe bazali se kobakama. Mingi kati na bato oyo bayei bazali kotanda bilamba na bango na nse mpe bamosusu bazali kokata bitape na nzete mpo na kotanda yango na nse. Bazali konganga boye: “Mokonzi oyo azali koya na nkombo na Nkolo [Jéhovah] asanzolama! Kimya na Likoló, mpe nkembo na bisika-bileki-Likoló!”

Bafalisai bazalaki mpe kati na bato yango mpe basiliki mpo na lokumu wana mpe balobi yango epai na Yesu. Balobi na ye ete: “Molakisi, pamela bayekoli na yo!” Kasi Yesu ayanoli bango ete: “Nalobi na bino ete soko baoyo bakozala nye, mbele mabanga makonganga.”

Ebelemi ye na Yelusaleme, Yesu amoni engumba yango mpe abandi kolela mpo na yango kolobaka ete: “Soko na mokolo oyo oyebaki yo mpenza makambo makopesa kimya; nde sikawa mabombami na miso na yo.” Lokola Yesu asakoli yango sikawa, Yelusaleme esengeli kozwa etumbu mpo na kozanga botosi na yango:

“Bayini na yo [Baromé oyo batambwisami na général Titus] bakosala lopango monene, mpe bakozinga yo kokangisa yo na bipai binso, mpe bakobwka yo na nse na bana na yo na kati na yo, mpe bakotika libanga moko na likoló na libanga mosusu kati na yo te.” Kobomama na Yelusaleme oyo esakolamaki na Yesu esalemaki mbula 37 na nsima, na mobu 70.

Eleki se mwa baposo, bato mingi oyo bazaili kati na etuluku na bato wana, bamonaki ndenge Yesu asekwisaki Lazare. Sikawa babandi koyebisa yango epai na bato mosusu. Yango wana ntango Yesu akoti na Yelusaleme, engumba mobimba eningani. Batuni boye: “Ye azali nani?” Ebele yango na bato bazongisi ete: “Oyo azali mosakoli Yesu uta na Nazareth na Galilai.” Emoni bango bongo, Bafalisai bamitungisi, mpamba te bakoki lisusu kosala eloko te; lokola balobi yango bango moko, “Bato nyonso balandi nsima na ye”.

Ndenge asalaka mbala nyonso oyo akendaka na Yelusaleme, Yesu akei koteya na temple. Kuna, bakufi-miso mpe bibosono bayei epai na ye mpe abikisi bango! Emoni banganga-nzambe mpe bakomeli makambo kitoko oyo Yesu azali kosala mpe eyoki bango bilenge mibali konganga na temple ete: “Osana epai na Mwana na Davidi!” bayoki nkanda, balobi na ye ete, Oyoki nde oyo ekolobaka bango?”

“Yesu ayanoli bango ete: “Ee, botangi naino te ete, Longwa na minoko na bana mpe baoyo bakomelaka mabele, obimisi lisanzoli na malamu nyonso?”

Yesu azali se koteya, mpe azali kotala baoyo nyonso bazali kati na temple. Mpe lokola ntango eleki, akei elongo na bazomi na mibale, mpe azongi na Béthanie, na ntaka na bakilomètre soko misato. Alalaki kuna na butu ya mokolo na Lomingo, ekokaki kozala na ndako ya moninga na ye Lazare. Matai 21:1-11, 14-17; Malako 11:1-11; Luka 19:29-44; Yoane 12:12-19; Zakari 9:9.

◆ Ntango nini mpe na ndenge nini Yesu akoti na Yelusaleme lokola Mokonzi?

◆ Ezali na ntina ete bibele bakumisa Yesu?

◆ Yesu ayoki ndenge nini wana emoni ye Yelusaleme mpe esakweli nini asakoli?

◆ Likambo nini esalemi ntango Yesu akendaki temple?