Nsango malamu mpo na bato nyonso

“NAMONAKI anzelu mosusu kopumbwa na nzanga, mpe azalaki na nsango malamu na seko mpo na mabota nyonso, mikili nyonso, na minoko nyonso, bikolo nyonso.” (Emoniseli 14:6) Na maloba wana, ntoma Yoane oyo akomaki mokóló, akomi emonaneli na esakweli oyo ezali kokokana na mikolo na biso. Awa koboma, kobeba na mopepe, mobulu, bitumba mpe bongolabongola kati na makambo ya nkita ezali se kokola, biso tozwi esengo na koyeba ete, nsango malamu ezali. Kasi, nsango nini oyo ekoki kozala mwa malamu oyo esengeli ete anzelu moko asakola yango, mpe mpo ete esakolama na mabota nyonso mpe bikolo mpe minoko mpe bibele nyonso?

Mpo na koyanola na motuna oyo, tokanisa naino na libaku mosusu oyo anzelu moko asakolaki ye mpenza, nsango malamu. Ekeke ya liboso oyo ya ntango na biso, ekomaki na nsuka na yango. Penepene ya ekeke moko na nsima, Yoane asengelaki kozwa emonaneli. Pene na Beteleme, babateli na mpate bazalaki kosenzela bitonga na mpate na bango, nde anzelu moko abimelaki bango mpo na koyebisa mbotama na Yesu. Alobi: “Nayeli bino nsango malamu oyo ekosepelisa ekolo mobimba, na butu ya lelo, baboteli bino Mobikisi na mboka na Davidi.​—Luka 2:10, 11.

Ya solo mpenza, mbotama na Yesu ezalaki “nsango malamu ya esengo monene”. Na nsima, akomaki Klisto mpe Mobikisi na ndaka oyo apesaki bomoi na ye ya kokoka mpo ete bato na mitema malamu babika. Yesu asengelaki kozala lisusu Mokonzi na Bokonzi ya Nzambe, “Nkolo na kimya”, oyo na nse na boyangeli na ye, bato bakozwa boyengebene mpe kimya. (Yisaya 9:6; Luka 1:33.) Mbotama na ye ezalaki mpenza nsango malamu oyo ebongaki kosakolama.

Yesu azali Mokonzi

Na ekeke ya liboso ya ntango na biso, Yesu akokisaki bisakweli mingi biyokanaki na mokano oyo Nzambe azwaki na ntina na ye, kasi, akómaki Mokonzi na eleko wana te. Lokola Mosenzeli ezongelaki koyebisa yango mbala mingi, likambo yango esalemaki na 1914. Kokokisama ya bisakweli emonisi ete Bokonzi etyamaki na makóló na mbula yango. (Emoniseli 12:10, 12) Atako 1914 emonisamaki na nsango moko ya mabe, mpo ezali na mbula wana nde matata ya liboso ya mokili mobimba ebimaki, kobotama ya Bokonzi na Nzambe, mpo na yango, ezalaki nsango oyo eleki malamu. Yango wana Yesu asakolaki esakweli oyo etali eleko na biso: “Nsango malamu oyo na Bokonzi ekosakolama na mokili mobimba lokola litatoli na mabota nyonso, mpe bongo na nsima nsuka ekoya.”​—Matai 24:14.

Esakweli wana na Yesu esilaki kokokana? Ya solo mpenza! Emonaneli na esakweli na Yoane mpe ekokani lokola. Ezali solo ete tokoki komona anzelu oyo ye alobelaki te. Nzokande, moto nyonso akoki komona ba Témoins de Jéhovah, kosakola nsango malamu oyo epesamelaki na anzelu yango epai na “na mabota nyonso, mikili nyonso mpe minoko nyonso, mpe bikolo nyonso.” Mongongo ya baklisto yango ezali koyokama na mikili 212 mpe bisanga mpe ebele na bato bazali koyamba nsango yango na esengo. Oyo ekómaki na bato mosusu, emonisi ete mpo na bango nsango na ntina na Bokonzi na Nzambe ezalaki nsango malamu.