Nsango malamu esakolami na mokili mobimba

BOKONZI na Nzambe ezali koyangela!Tala nsango oyo eleki malamu. Yango wana na 1989, ba Témoins de Jéhovah koleka 3 700 000, oyo bazali lelo na bomoi kati na mokili mobimba basakolaki na molende mpenza “nsango malamu” oyo esakolamaki na Yesu, oyo anzelu ya emonaneli na Yoane asakolaki (Matai 24:14; Emoniseli 14:6.) Na ntina yango ntoma Paulo alobi: “Mingongo ya basakoli eyokani na mokili mobimba, mpe masolo na bango ekendaki mosika tée na bipai binso”. (Baloma 10:18.) Toloba boye ete, bato na mabota nyonso mpe mikili nyonso, mpe minoko nyonso, mpe bikolo nyonso bazali koyanola na esengo mpenza libiangami oyo: “Bobanga Nzambe mpe bokumisa ye!”​—Emoniseli 14:7.

Assurance-vie ekozala lisusu te

Na Angleterre, ezalaki na mobali moko kati na bato oyo bazangi elikya mpo na bomoi na bango. Ken azalaki kosala na esika oyo bapesaka assurance-vie na bato. Mokolo moko Ken akendaki mpe kopesa yango na ndako ya ba Témoins de Jéhovah, baoyo batunaki ye: “okolinga nde kozala na bomoi na mokili oyo epai kuna tokozala na mposa ya kozwa assurance-vie te?” Maloba wana malimboli nini? Ete, engebene Biblia, na nse na boyangeli ya Bokonzi na Nzambe, makambo mingi oyo mazali lelo kolongola elikya ya bomoi, lokola maladi mpe liwa ekozala lisusu te.

Yango ekoki kosalema? Ee, mpamba te Nzambe alaki yango. Na ndakisa Biblia elobi: “Nzambe ye moko akozala elongo na bango (bato). Akolongola mpisoli na miso na bango, mpe kufa ekozala lisusu te, na mawa, na kolela, na mpasi, lisusu mpe te; mpo ete makambo na liboso masili koleka. (Emoniseli 21:3, 4.) Mbongwana yango ekosalema na nzela nini? Na nzela ya Bokonzi na Nzambe, oyo mosika te, engebene Liloba na Nzambe, “ekobuka bikonzi nyonso (bapolitike ya lelo) mpe ekosilisa yango nyonso, mpe yango ekotikala lobiko na lobiko.”​—Danyele 2:44.

Na ntango bazalaki kokokisa mosala na bango ya kosakola, ba Témoins de Jéhovah basili kopesa mikapo ya Biblia lokola oyo wana epai na bamilió mingi na bato ya mokili. Lokola Ken, bato mingi basili kososola ete ezali lokuta te kasi bilembeteli bizali. Bilaka wana na Nzambe bibongi na kotyelama motema mpe mosika te ekokokana.

Kobongwana na mikano

Baoyo bazali koyokamela ba Témoins de Jéhovah na ntango ezali bango kozongela kosakola maloba ya anzelu oyo na esengo, bato yango bazali kososola ete kobanga Nzambe mpe kokumisa ye ezali kosenga mingi koleka bobele kondima mpamba bilaka na Biblia. Ezali nde lolenge na bango mobimba ya kotalela bomoi nde ebongwanaki, mpe elikya na bango ebotami lisusu liboso na ebele na mikakatano oyo bazali kokutana na yango.

Rafael mpe mwasi na ye bamekaki likambo yango. Bango bazali kofanda na Argentine mpe ntango babalanaki, eleki sikawa mibu 40 bamityelaki lokola mokano na bomoi na bango ete basala makasi mpe babomba mosolo mpo ete yango ekoka kosalisa bango na ntango bakokóma mibange. Nzokande, bambula 21 nsima na komona mpasi wana, bazwi bobele mwa ndako moke oyo ezalaki kosenga ntango nyonso ete babongisaka yango. Bazalaki lisusu komiyoka na kimya te lokola oyo na ntango bango babalanaki.

Na nsima, ba Témoins de Jéhovah bateyaki bango nsango malamu mpe balakisaki bango boye ete ezali na bozwi mpe kimya eleki oyo bango bazalaki koluka. Na lisolo na ye likoló na ngomba, Yesu alobelaki yango na ntango alobaki: “Bomibombela biloko na motuya na nse te, awa lopomboli mpe mabanga ekolyaka mpe awa miyibi bakokɔtaka mpe bakobotolaka. Bomibombela biloko na bino na motuya kuna na likoló, wana lopomboli mpe mabanga ekolyaka te, mpe wana miyibi bakokɔtaka te mpe bakobotolaka te”.​—Matai 6:19, 20.

Solo, Biblia ezali koteya biso te ete tozanga komibanzabanza na ntina etali biloko ya mosuni; kasi ezali nde kolendisa biso na kozanga kotya elikya na biso likoló na bozwi. (Mosakoli 7:12.) Na esika ete tosala bongo, tosengeli koluka kozala na bozwi na elimo, na koyekolaka Biblia, oyo ezali kolakisa biso mokano ya Nzambe, mpe na komityela lokola mokano ya liboso mpenza na bomoi na biso, ete tosala mokano na Nzambe. (Matai 6:33.) Rafael mpe mwasi na ye babandaki kobomba bozwi na elimo mpe sikawa bazali komiyoka mpenza ete, bazali na bozwi, solo, yango ezali mpo na misolo na bango te, kasi ngɔlu na boyokani na bango elongo na Nzambe. (Emoniseli 3:17, 18.) Nsango ya Bokonzi na Nzambe, ezalaki nsango malamu mpo na bango.

Libala ebongi

Nsango malamu ezali mpenza na nguya mpo na kosala malamu. Na yango, totanga likambo ya John, oyo azalaki kofanda na Angleterre. Kozanga kolanda ye, mwasi mpe bana bakomaki kosepela na Biblia. Babandaki kosangana na makita oyo ebongisamaki na ba Témoins de Jéhovah wana John azalaki komipesa mingi na komela masangá elongo na baninga na ye. Mpo na yango, John akomaki komela masangá mpe makaya na kolekisa ndelo, mpe asalaki ekobo. Na nsuka, atikaki mwasi na ye mpo na kokende kofanda na mwasi mosusu.

Alukaki nzela na koboma libala. Kasi John azalaki se kokamwa na komona ete mwasi na ye, oyo azalaki komiyokanisa elongo na nsango malamu, mpe azalaki koyekola motindo na etamboli na boklisto, alandaki se kotosa ye. Yango ezalaki likambo oyo John akokaki kolimbola te. Poso misato liboso ete baboma libala, etamboli na boklisto ya mwasi ya John ebotaki mbuma. John amonisaki mbongwana na bosembo, mpe alandaki lisusu koluka nzela ya koboma libala te. Asepelaki na nsango malamu mpe abandaki koyekola Biblia elongo na ba Témoins de Jéhovah. Sikawa, ye mpe azali moklisto; mpe elongo na mwasi na ye, azali kolobela nsango malamu epai na bazalani mosusu.

Na eleko oyo bizaleli malamu ya mabota ezali kobeba, mingi na bato bazali na mposa ya lisalisi oyo nsango malamu ekoki komemela bango, oyo lizwi moboko likoló na Biblia. Kati na mpepo, Témoin de Jéhovah moko ya Pérou, afandaki pembeni ya colonel moko, Ntango lisolo ebandaki, colonel abandaki koyebisa mikakatano ya libota na ye: mwasi na ye, momeli drogue, alingaki kotika ye mpo na kolanda elenge mobali moko. Na mayele nyonso, Témoin wana amonisaki ye ete Biblia ezali na batoli malamu mpe ya nguya mpo na makambo matali mabota, batoli oyo esalisáká ye moko na kosilisa mikakatano ya libota na ye.​—Baefese 5:21 kino 6:4.

Colonel atondaki Témoin de Jéhovah na ntina na maloba wana ya kolendisa mpe, na mposa na ye ya koyeba mpenza nsango malamu, asɛngaki abonema ya La Tour de Garde mpe Réveillez-vous! Na nsima, lokola Témoin akitaki na mpepo mpo na kokende, bilenge babalani oyo bazalaki bango mpe na mpepo, bazwi ye na nzela mpo na koloba elongo na ye. “Bato yango balobi boye ete: biso tofandaki liboso na bino, mpe toyokaki lisolo na bino elongo na Monsieur wana. Biso mpe tolingi kosenga abonema ya bazulunalo yango.” Bango mpe balingaki koyeba nsango malamu oyo ezali kobongola bomoi.

Mbongwana kati na bomoi moko

Ee, nsango malamu oyo ezwi moboko likoló na Makomami, ezali kobongola bomoi na bato. Lokola ntoma Paulo akomaki yango, “Liloba na Nzambe lizali na bomoi mpe na nguya.” (Baebele 4:12.) Yango emonanaki na likambo ya elenge moko, mogreke ya Masedonia. Akamwaki na koyeba ete, engebene Biblia, nkombo ya Nzambe ezali Jéhovah. Asengaki na moninga na ye moko ete, akoka kolukela ye ba Témoins de Jéhovah mpo na kosolola elongo na ye. Masolo mibale ebongisamaki elongo na ba Témoins: lisolo mokomoko eumelaki soko ngonga minei! Mpe elenge mobali yango abandaki boyekoli ya Biblia oyo, na mokolo ya liboso, ekobaki kino ngonga ya mibale ya ntongo!

Kobanda boyekoli ya liboso, elenge mobali yango ayokanisaki bomoi na ye na mitinda ya Biblia, na lombango mpenza. Mpo na Jéhovah, abenisaki ye. Poso oyo abandaki koyekola Biblia, akataki nsuki na ye ya milai. Poso elandaki, atikaki kokende na banganda ya butu mpe bisika ya koyoka mindule, mpo na koluka baninga oyo na bizaleli mabe. Poso ya misato, atikaki likaya mpo na mbala ya nsuka. Nsima na sanza mibale ya boyekoli ya Biblia, abandaki kosakola nsango malamu ya Bokonzi elongo na ba Témoins de Jéhovah. Ee, ezali esengo mpenza lokola ete ba Témoins bamemaki nsango malamu na ngambo na mokili epai kuna elenge wana azalaki kofanda.

Nsango malamu kati na boloko

Ata kati na boloko, nsango malamu ezali se koyokisa nguya na yango ya kopesa bonsomi. Na Espanye, mobali moko na nkombo ya José, azali komona mpasi monene kati na boloko mpo ete, ayibaki na nzela na monduki, mpe asalaki makambo mosusu ya mabe mingi koleka. Kasi, ba Témoins de Jéhovah bateyaki ye nsango malamu, mpe nsango wana na Biblia ebongolaki mpenza lolenge na ye ya kotalela bomoi. Jehovah ‘apesaki ye makasi’.​—Bafilipi 4:13.

Na ntina na etambweli na ye, ekoki kozala ete José, oyo azali elenge, alekisa bomoi na ye oyo etikali bobele kati na boloko, na boumeli na biloko mabe ya ntango oyo. Kasi nde sikawa, azali na ye moklisto mpamba te, kasi asili kobatisama Mwasi na ye azali lisungi monene mpo na ye, mpe azali kosala milende na kopesa mateya na boklisto epai na mwana na bango ya mobali. Sikawa, José azali kosakola nsango malamu epai na bato mosusu ya boloko, baoyo basakoli ya libanda bakokaki kokutana na bango te. Sikawa, moninga na ye ya boloko azali ye mpe moklisto.

Ezali wana bobele mwa bandakisa oyo ezali komonisa matomba ya mosala ya kosakola ya ba Témoins de Jéhovah kati na mokili mobimba. Na solo mpenza, nsango malamu oyo esakolamaki na anzelu, esili kosakolama na ba Témoins de Jéhovah “lokola nsango malamu na bafandi ya mokili, mpe mabota nyonso, mpe mikili nyonso, mpe minoko nyonso mpe bikolo nyonso”.

Ezali nsango oyo eleki malamu, mpe ezali bobele elikya wana moko mpo na bato. Tolendisi yo ete oluka koyeba yango. Lokola Ken mpe John na Angleterre, lokola Rafael mpe mwasi na ye na Argentine, lokola José na Espagne, mpe lokola motuya monene na bato mosusu, tosangani elongo na anzelu mpo na kolendisa bato nyonso na ‘kobanga Nzambe mpe na kosambela ye oyo asalaki likoló, na nse, na mai monene, na maziba na mai’.​—Emoniseli 14:7.