Yesu, bomoi na ye mpe mosala na ye

Liteya ya komikitisa na Elekeli na ye ya nsuka

NA BOYOKANI na malako na Yesu,Petelo mpe Yoane basili kokoma na Yelusaleme mpo na kosala bibongiseli ya Elekeli. Yesu akomaki nsima na midi, mbala mosusu elongo na bantoma mosusu zomi. Na ntango bazalaki kokita na ngomba ya Olive mpe kokatisa lobwaku ya Cédron, moi elalaki. Ezalaki mbala ya nsuka Yesu amonaki engumba yango na moi, liboso na lisekwa na ye.

Nokinoki, Yesu mpe bantoma na ye bakoti kati na engumba mpe bakei na ndako epai kuna basengeli kosala Pake. Bamati na eteni monene na ndako na likoló, epai kuna biloko bisili kobongisama mpo ete basala elambo bango moko. Yesu azalaki mpenza kozela eleko wana na motema móto, mpamba te alobi ete: “Nazalaki na mposa mingi ya kolya Elekeli oyo elongo na bino, naino ezwi ngai mpasi te.”

Engebene momeseno, bato bayanganaki mpo na Pake bazalaki komela kopo minei ya vinyo. Nsima na komela moko na bakopo yango, ekokaki kozala kopo ya misato, Yesu abondelaki mpe alobaki ete: “Kamata oyo mpe kabola yango kati na bino; mpamba te nazali koloba ete, longwa sikawa nakomela lisusu mai na miwiti te kino ekoya bokonzi na Nzambe.”

Wana ezalaki bango kolya, Yesu atelemi, alongoli bilamba na ye ya likoló, azwi epanguseli moko mpe atondisi mai kati na saani moko monene. Na momeseno, mokolo na ndako azalaki kosenzela ete makolo ya babyangami na ye masukolama. Kasi na libaku oyo, lokola mokolo na ndako azali te, Yesu ye moko azwi mokumba yango. Moko kati na bantoma akokaki kosala yango; kasi emonani lokola mwa kowelana ezali naino kati na bango, mpamba te moko te kati na bango asepeli kosala yango. Ntango Yesu abandi kosukola bango makolo, yango etungisi bango mingi.

Ntango Yesu akomi epai na Petelo, Petelo aboi mpe alobi: ’’Te, okosukola makolo na ngai te.”

Yesu alobi na ye ete, “Soko nakosukola yo te, ozali kosangana na ngai te’’.

Petelo alobi ete: “Nkolo, bobele makolo na ngai te, kasi na maboko na motó mpe lokola”.

“Ye oyo asili kosukola mai asengi kosukola bobele makolo na ye mpo ete azali peto nyonso. Bino bozali peto nde nyonso te.” Alobi bongo mpamba te ayebi ete Yuda azali komibongisa mpo na kokaba ye.

Esili ye kosukola makolo ya bantoma 12, na Yuda mpe lokola, ye oyo akokaba ye, Yesu alati lisusu bilamba na ye ya likoló mpe afandi lisusu na mesa. Atuni bango ete, “Bososoli nde likambo lisili ngai kosala bino? Bino bokobyanga ngai ‘Molakisi’ mpe ‘Nkolo’, mpe bozali koloba sembo ete nazali bongo. Soko nde ngai Nkolo mpe Molakisi nasukoli makolo na bino, ekoki na bino ete bosukolana makolo. Mpamba te napesi bino etaliseli ete bino mpe bosala pelamoko esili ngai kosalela bino. Solo solo, nazali koloba na bino ete, moombo aleki mokolo na ye te, mpe ntoma aleki motindi na ye te. Soko boyebi makambo oyo, bokozala na esengo soko bokosala yango.’’

Oyo nde liteya kitoko! Bantoma basengeli te koluka bobele esika ya liboso komimonaka ete bazali na ntina mingi na boye ete basengaka ntango nyonso epai na bamosusu ete basalela bango. Basengeli kolanda ndakisa na Yesu. Ezali likambo ya kosala lokola molulu ya kosukola makolo te, kasi nde mposa ya kosalisa bamosusu kozanga koponapona, ata soko mosala oyo osengeli kokokisa ezali moke to ezali kosepelisa yo te. Matai 26:20, 21; Malako 14:17, 18; Luka 22:18; 7:44; Yoane 13:1-17.

◆ Wana Yesu akomi na Yelusaleme, akoti epai wapi mpo na kosala Pake. mpo na nini libaku yango ekeseni mpenza na mosusu?

◆ Ezali bango kosala Pake, kopo ya boni emonani ete Yesu apesi epai na bantoma 12 nsima na kopambola yango?

◆ Na eleko na Yesu, mosala nini mokolo na ndako azalaki kokokisa epai na babyangami na ye, mpe mpo na nini ezali bongo te wana Yesu azali kosala Elekeli elongo na bantoma na ye?

◆ Na mokano nini Yesu ye moko akokokisa mosala na kosokema oyo etali kosukola makolo ya bantoma na ye?