Tobatela kondima na biso kati na Nzambe mpe na Klisto

Ndimbola ya makambo na ntina ya mokanda epai na Bakolose

KONDIMA epai na Jéhovah mpe na Yesu klisto ezali fungola ya lobiko. Kasi kobatela kondima ezali petee te. Ezalaki mpe likambo ya baklisto na Kolose, engumba oyo ezalaki na Est ya Efese, na Asie Mineure. Mpo na ntina nini? Mpo ete balakisi na lokuta bazalaki koteya na molende ete lobiko ezalaki kotalela kokatama ngenga biloko oyo bazalaki kolya mpe kotosa mwa mitinda misusu.

Ya solo, ntoma Paulo azalaki komibanzabanza mpenza mpo na kolongono ya elimo na baklisto na Kolose mpe alingaki mpenza ete babatela kondima na bango epai na Nzambe mpe epai na Klisto. Na bongo, akomelaki bango mokanda moko penepene na nsuka ya bokangami na ye ya liboso na Rome (pene na mibu 60-61 ya ntango na biso) mpo na kokweisa makanisi mabe mpe kolendisa kondima na bango. Totala ndenge nini tokoki, biso mpe, kozwa litomba na maloba na ye matondi na bolingo.

Tokumisa etelemelo na Klisto

Uta ebandeli ya mokanda na ye, Paulo amonisi ntina ya kokumisa etelemelo na Yesu. (1:1 kino 2:12) Akumisi Bakolose mpo na kondima na bango epai na klisto mpe mpo na bolingo na bango epai na bandeko na bango baklisto. Paulo azali kolobela etelemelo monene na Klisto, oyo na nzela na ye biloko nyonso mosusu bizalisamaki, mokonzi na lisangá mpe mobotami ya liboso kati na bakufi. Kozongisa boyokani elongo na Nzambe ekoki kosalema na lisalisi ya klisto, kati na ye mabonza nyonso na mayele mpe na boyebi masili kobómbama. Koyebáká makambo nyonso wana, baklisto basengeli kokende liboso na boyokani elongo na klisto mpe apunza nzela na moto te ete apunza bango na maloba na ye na mayele mabe mauti na bato.

Ezali na nzela na Klisto nde, Nzambe alongolaki Mibeko. (2:13-23) Na elobeli ya elilingi, etyamaki na nzete oyo Yesu akufelaki. Masengami ya Mibeko mazalaki bobele “elilingi na makambo makoya nsima, nde eloko na solo ezali Klisto.” Na kotikáláká mpenza ngwi epai na Klisto, Bakolose bakotika moto te ete alongola likabo na bango oyo ezali bongo bomoi ezangi kufa kati na makoló.

Tokumisa Nzambe mpe Klisto

Na nsima Paulo alendisi Bakolose ete balata bomoto na sika mpe batosa bokonzi na Yesu Klisto. (3:1-17) Na kotyáká elimo na bango na makambo ya likoló, bakopesa na matomba ya elimo esika ya liboso kati na bomoi na bango. Mpo na kosala bongo, esengeli na bango kobwaka bizaleli mpe maloba mabe. Oyo nde mapamboli bakozwa soki bakómi na bizaleli lokola mawa, bosokemi mpe bolingo! Kimya na Klisto ekoyangela kati na mitema na bango soki bazali kosala makambo nyonso na nkombo na Yesu, kokendáká Nzambe na nzela na ye.

Lokumu oyo moklisto azali kopesa epai na jéhovah mpe Yesu Klisto ezali mpe komema bopusi kati na boyokani oyo azali na yango elongo na bamosusu. (3:18 kino 4:18) Basi, mibali bana, baombo mpe bankolo na misala basengeli kokokisa mikumba na bango mpo bazali kobanga Nzambe mpe kondima etelemelo na Klisto. Yango ezali na ntina mingi mpo na kolendendela kati na mabondeli mpe kotambola na mayele nyonso!

Mokanda na Paulo epai na Bakolose ekoki kosalisa biso na kobwaka mateya na lokuta oyo makoki kobebisela biso likabo oyo ezali bongo bomoi na seko. Bokundoli ya ntoma na ntina na koyeba bokonzi ya jéhovah mpe ya Mwana na ye ekoki kozala na bopusi malamu likoló na boyokani na biso elongo na bamosusu. Lisusu, mapamboli mingi mazali kozela biso mpenza soki tobateli kondima na biso epai na Nzambe mpe epai na Klisto.

Mokanda na Laodikia: “Soko mokanda oyo ekotangama kati na bino, bosala ete etangama mpe kati na lisangá na laodikia lokola. Bino mpe botanga yango ekotinda ngai na laodikia.” (Bakolose 4:16) Laodikia ezalaki engumba moko ya bozwi mingi na Ouest ya Asie Mineure, ekangisamaki na banzela na bingumba lokola Filadelefi mpe Efese. Na ntembe te, mosala oyo Paulo asalaki na Efese eyokanaki kino na laodikia, kasi ye moko asakolaki ata mbala moko te kati na engumba yango. Atindaki mokanda epai na Baklisto ya laodikia, atako balimboli mosusu na Biblia bazali kokanisa ete ezali kopi ya mokanda epai na Baefese. Mokanda na laodikia ezwami kati na Biblia te, mbala mosusu mpo yango ezalaki na makambo ya ntina te mpo na biso lelo, to mpe mpo ete ezalaki kozongela makanisi oyo masilaki koyebisama polele kati na mikanda misusu oyo mipemami.

[Elilingi]

Bitika na Laodikia