Biblia ezali mpenza mosantu?

BATO boni na mikolo na biso bazali naino kotalela Biblia lokola mosantu, lokola Liloba na Nzambe? Na eleko oyo makambo na Nzambe mazali kotyolama mingi, ezali na bato mingi oyo bazali kotalela yango lokola ete esila ngala to mpe ezali mpenza na ntina lisusu te mpe bazali kondima te ete ezali mpenza mosantu. Bakonzi mosusu na mangomba na boklisto ya lokuta bakómi kino koteya ete Biblia etondi na masapo mpamba. Bazali komituna soki ‘moto na mayele akoki mpenza kondima makambo Biblia ezali koloba na ntina na lisoló na bato.’​—The lnterpreter’s Dictionary of the Bible, Volume 2, page 611.

Balimboli na lokumu na Biblia bazali kobeta ntembe ete Biblia ezali Liloba na Nzambe te mpe bazali kokakatana te mpo na koloba yango. Moko kati na bango alobaki ete, “soki moto alingi kosalela elobeli lokola Liloba na Nzambe, ayeba ete elobeli oyo ebongi mpenza mpo na komonisa Biblia ezali ete Liloba na Yisraele, Liloba na mwa baklisto ya lokumu na ekeke na liboso.” (The Bible in the Modern World, de James Barr) Okanisi nini? Biblia ezali Liloba na Nzambe? Ezali mpenza mosantu?

Nani akomaki Biblia?

Lisoló na bato limonisi ete Moĩse, Moebele oyo azalaki na bomoi esili koleka pene na mibu 3 500, nde akomaki Genese, mokanda ya liboso na Biblia. Engebene Biblia yango moko, ezali mibali ntuku minei na ezalela ya makambo ekeseni nde basanganaki na kokomama ya Makomami mosusu. Mosala yango mobimisaki liboke ya mikanda 66, to biteni bisali bongo Biblia. Atako bongo, mibali yango bazalaki komitalela te lokola babandisi mpenza ya Biblia. Moko na bango alobaki ete: “Makomami nyonso mapemami na Nzambe.” (2 Timoté 3:16) Mosusu alobaki na ntina na bakomi na Biblia ete: “Ezali na kopusama ya elimo santu nde bato balobaki na ntina na Nzambe.’’​—2 Petelo 1:21.

Maloba oyo mazali kotya bakomi na molongó ya bakomeli, basekretere oyo batambwisamaki na Nzambe. Engebene Biblia, mokomi akokaki koyebisa makambo oyo mautaki na Nzambe na motindo na elobeli na ye moko. (Habakuku 2:2) Ezali mpo na yango nde tozali kokuta bilobeli mingi kati na Biblia. Kasi kokomama esalemaki ntango nyonso na litambwisi na Nzambe.

Ezali solo, likambo oyo bakomi yango bandimaki ete bakomaki na nsé na kopemama na Nzambe, ezali mpenza elembo te ete Biblia ezali nsango oyo Mozalisi atindaki epai na bato ya mokili. Ntembe ezali te ete boyekoli ya sikisiki mpe ya malamu na mokanda yango, esengeli kopesa nzela na kosukisa soki Oyo aleki​—Likoló azali, to te, Mobandisi na Biblia. Biblia ezali kopesa bilembeteli ete yango euti na Nzambe? Tokoki mpenza koloba na motema mobimba ete Biblia ezali mosantu?