Nani akomaki Biblia?

Bato baboyaka kondima Biblia balobaka ete “etondi na makambo na bongolabongola. Mpe lisusu, ezali koteya makanisi na bato. Na bongo, ndenge nini tokoki kondima ete ekoki kotambwisa biso mpenza na bomoi?”

Yo mpe ozali na likanisi yango? Omonaka ete Biblia ezali mokanda oyo ezali koteya makanisi na bato bazangi kokoka? Ezali yango mwa bakonzi na mangomba bazali kokanisa. Mosuisse Karl Barth, téolojié ya misioni oyo asila kokufa, akomaki kati na mokanda na ye Kirchliche Dogmatik (Bindimeli na Lingomba): “Ata basakoli mpe bantoma, bakokaki kosala libunga na makambo oyo bango balobaki mpe bakomaki.” Ya solo, lisolo elobeli likambo moko kasi ekomami na bato mingi ekoki kozala na mwa mabongwani na oyo etali elobeli. Tokoki mpe komona na bisika bikeseni ya Biblia makambo oyo makeseni kati na yango soko totali yango se likololikolo. Kasi ezali mpenza bongolabongola? Biblia ezali se mokanda euti na bato? Nani akomaki yango?

Eyano ezali mpasi te: “Bato balobaki mpo na Nzambe.” Kasi ndenge nini bayebaki makambo basengelaki koloba mpe kokoma? Ntoma Simon Pierre, oyo touti kotanga maloba na ye, alimboli lisusu ete balobaki “na kopusama na elimo santu”.​—2 Petelo 1:21.

Likambo ya solo ezali boye ete Biblia eyebisi polele mbala mingi ete ezali “liloba ya Nzambe”. Ba versets 176 ya Nzembo 119 emonisi likanisi yango mbala 176! Mokomi nyonso ya mokanda alingaka komiyebisa ete ezali ye nde akomaki yango; nzokande bakomi na Biblia bazalaki kosala bongo te. Lokumu nyonso ezalaki kokenda epai na Jéhovah; ezalaki mokanda na ye kasi ya bango te.​—Tala 1 Batesalonike 2:13; 2 Samwele 23:2.

Ndenge nini “bapusamaki na elimo santu”?

Ndenge nini bato yango “bapusamaki na elimo santu”? Eyano ezwami kati na mokanda moko etindamaki epai na Timoté, moklisto na ekeke na liboso: “Makomi nyonso mapemami na Nzambe.” Elobeli “kopemama na Nzambe” ebongolami na liloba na greke théopneustos, oyo elimboli “kopemama na Nzambe”. Nzambe asalelaki bokasi na ye ezangi komonana, elimo santu na ye, mpo na “kopema” makanisi na ye na elimo na bakomi. Na yango, Jéhovah Nzambe azali Liziba na Biblia, ye nde abimisaki yango. Likanisi na ye ezalaki kotambwisa kokomama na yango, lokola patron moko oyo akosenga epai na sekretere na ye ete akomela ye mikanda.​—2 Timoté 3:16.

Mpe lisusu, tokoki kobelemisa bilobeli oyo mibale “kopemama na Nzambe” mpe “kopusama na elimo santu”. Na ndenge nini? Liloba na greke oyo ebongolami na “kopusama” esalelami mpo na kolobela masuwa oyo matindikami na mopepe. (Tala Misala 27:15, 17) Na yango, lokola masuwa makopusamaka na mopepe, bakomi na Biblia bazalaki kokanisa, koloba mpe kokoma na bopusi na Nzambe, bapusamaki na elimo santu na ye lokola azalaki “kopema” likolo na bango.

Bato oyo Nzambe asalelaki

Bakomi na Biblia bayebisi biso makambo mingi te mpo na bomoi na bango. Na esika ete babenda likebi likolo na bango, bazalaki kotya makasi mpo na kokumisa Nzambe mpe bazalaki komibenda na nsima. Toyebi ata bongo ete bamoko kati na bango bazalaki basali minene, basambisi, basakoli, bakonzi, babateli na mpate, basali bilanga to balobi mbisi-bango banso bazalaki 40. Na yango, ata ezali nsango euti na Nzambe, Biblia ezali na moto, na kokesena ya bomoto mpe ezali mpenza kobenda bato.

Bakomi mingi ya Biblia bayebanaki te bango na bango; bamoko bazalaki na bomoi liboso, bamosusu nsima. Bomoi na bango mpe boyebi na bango ekesenaki mpenza, bakisa mpe esika bazalaki kofanda mpe ndenge bateyamaki. Nzokande, ata bato yango bazalaki bilenge to bakolo na ntango oyo bakomaki Biblia, mosala na bango ezali na boyokani mpe na bomoko. Kokomama na Biblia eumelaki bambula 1600. Mpe moto oyo akotalela malamumalamu mokanda yango akomona ete ezali na bomoko ya kokamwa; ezali komonisa likanisi ya Mobandisi se moko, atako asalelaki bato mingi mpo na kokoma.

Likambo yango ekoki kopusa biso te na “kotya likebi koleka” na Biblia, mokanda oyo ya kokamwa? Tokoki te kokabola likanisi ya Petelo, oyo akomaki: “Yango wana tokoyamba solo mpenza maloba ma baprofeta; maloba ma bango mazali mwinda mokongenge o kati ya molili.”​—Baebele 2:1; 2 Petelo 1:19, Biblia Liloba lya Nzambe.

Kasi tokoloba boni mpo na likanisi oyo ete Biblia ezali na mobulungano kati na yango? Ezali solo? Okoyanola nini?

[Etanda na lokasa 4]

“Oyo nde mokanda kitoko! Ekeseni mpenza na makambo mazwami na kati na yango, nasepeli mingi na ekomeli na yango, oyo ezali kobongola liloba ete ekoma lokola eloko oyo ezalisamaki na Nzambe, lokola nzete, lokola fololo, lokola mai na monana, lokola minzoto, lokola moto mpenza. Ezali kopunzwapunzwa, ezali kotiola, ezali kongenga, ezali koseka, toyebi te ndenge nini, toyebi te mpo na nini, makambo na yango nyonso mazali komonana ete mazali malamu. Ezali mpenza Liloba na Nzambe solo, na bokeseni na mikanda misusu oyo ezali komonisa bobele mayele na bato.”​—Likanisi oyo na ntina na Biblia ebimisamaki na Heinrich Heine, mokomi monene na Alemanye na ekeke na 19.

[Elilingi na lokasa 4]

Lokola masuwa makopusamaka na mopepe, bakomi na Biblia ‘bapusamaki na elimo santu na Nzambe’.