Moto oyo ayekolaki mingi

“BANDEKO, botala libyangi na bino. Bato na mayele na mosuni babyangami mingi te, mpe bato mingi na nguya te, bato mingi na mabota na lokumu te.” (1 Bakolinti 1:26) Lokola maloba oyo mamonisi yango, komikotisa mozindo kati na mayele to etelemelo ya lokumu ya mokili oyo, ezali likama. Makambo motindo wana makoki kopekisa moto na kondima nsango malamu.​—Masese 16:5; Malako 10:25.

Atako bongo, na eleko ya Paulo mwa ndambo na bato ya mayele na mosuni bandimaki solo mpe, Paulo azalaki moko na bango. Atako ayekolaki mingi mpe mbala mosusu autaki na libota moko ya lokumu, Paulo azalaki mopalanganisi ya molende ya nsango malamu. Na bongo, amonisaki ete bato ya lokumu ya mokili oyo bakoki kosalela Jéhovah soki motema na bango mozali sembo. Bakoki mpe kosalela makoki na bango ya mosuni mpo na mosala ya Jéhovah.​—Luka 16:9.

Moto ya Talasi

Paulo abotamaki na Talasi, “mboka eyebani malamu,” lokola alobelaki yango na nsima. (Misala 21:39) Emonani ete ezali mpenza na mboka wana nde ayekolaki minoko mikeseni​—mingi mpenza monoko ya Greke—​oyo ezalaki na ntina mingi kati na mosala na ye ya missionnaire. Wana afandaki na Talasi, Paulo amipesaki bobele na bizaleli ya Bayuda te, kasi lisusu na bizaleli ya Bapakano, likambo oyo lisalisaki ye na nsima kati na mosala na ye lokola ntomá ya bapakano. Ayebaki komonisa solo na motindo mobongaki na kokanga ntina na yango. (1 Bakolinti 9:21) Na ndakisa, tala lisoló oyo asalaki epai na bato ya Atene, oyo lizwami na Misala mokapo 17. Kati na yango, Paulo amonisaki mpenza losambo ya bato na Atene na lolenge ya mayele, wana alakisaki solo mpe atangaki ata maloba ya moko na bakomi nzembo na bango.

Citoyen Moloma

Paul azalaki na litomba mosusu kati na mosuni. Azalaki citoyen Moloma, mpe asalelaki yango mpo na kokólisa nsango malamu. Na Filipi, ye mpe baninga na ye babetamaki mpe batyamaki na boloko kozanga ete basambisa bango. Kosala bongo epai na citoyen Moloma eyokanaki na mobeko te, mpe ntango Paulo alimbolaki yango epai na bakonzi, bapesaki ye nzela ya kofanda mpe kosala mosala na lisangá liboso ete akende na mboka mosusu.​—Misala 16:37-40.

Na nsima, ntango asambisamaki liboso na guvernere Festus, Paulo asalelaki lotómo na ye ya citoyen Moloma mpo na kosenga ete akende kosamba liboso na Kaisala. Na yango, ayebisaki nsango malamu liboso na mokonzi oyo alekaki monene kati na bokonzi ya Loma.​—Misala 25:11, 12; Bafilipi 1:7.

Paulo ayekolaki mosala ya maboko oyo, na nsima emonanaki na ntina mingi. Mbala mosusu ayekolaki kosala hema epai na tata na ye. Mpo na yango, akokaki kolanda kokokisa mosala na ye ya kosakola wana azangaki mosolo. (Misala 18:1-3) Ayekolaki mpe mateya mingi ya lingomba. Abokwamaki lokola “Mofalisai, mwana ya Bafalisai.” (Misala 23:6) Ya solo, alakisamaki na Gamaliele, moko na bateyi ya lokumu mingi ya Bayuda. (Misala 22:3) Motindo na koyekola wana, oyo mbala mosusu ekokani lelo na mateya ya université, ezali komonisa ete libota na ye lizalaki na mwa bozwi.

Likanisi libongi

Na kotalela makambo ya bomoi na ye mpe makambo oyo ayekolaki, ekokaki kokómisa Paulo moto monene kati na lingomba ya Bayuda, na mikolo mizalaki liboso. Akokaki mpenza kokóma na lokumu monene. Kasi, wana ayokaki ete Yesu azali Masiya, mikano ya Paulo mibongwanaki. Ntango akomaki mokanda epai na Bafilipi, amonisaki mwa matomba ya mosuni oyo azalaki na yango: “Biloko nyonso oyo bizalaki mpo na ngai litomba, nazali kotanga yango ete ezali mpamba mpo na Klisto. Ɛɛ, nazali kotanga biloko nyonso mpamba mpo na likambo lileki malamu, yango koyeba Klisto Yesu Nkolo na ngai.”​—Bafilipi 3:7, 8.

Moto wana ayekoli mingi azalaki na mawa te na kokanisáká mpo na oyo akokaki kosala na boyebi na ye ya mosuni; lisusu asalelaki te “boyebi monene” na ye mpo na kokamwisa bato mosusu. (Misala 26:24; 1 Bakolinti 2:1-4) Kasi, atyaki motema na ye mobimba epai na Jéhovah Nzambe, alobaki na ntina na mikano ya kala, ete: “Awa esili ngai kobosana makambo mazali na nsima mpo na kolanda yango ezali liboso, nazali kolanda kopota epai na nsuka na emekaneli na mbango mpo na kozwa libonza oyo ezali bongo libyangi na Nzambe kuna na likoló, kati na Klisto Yesu.” (Bafilipi 3:13, 14, MN) Paulo apesaki mituya mingi na makambo ya elimo.

Atako bongo, Paulo asalelaki boyebi na ye ya kala kati na mosala ya Jéhovah. Wana alobaki na ntina na Bayuda ete, “nazali kotatwela bango ete bazali na molende mpo na Nzambe,” alobelaki nde makambo matalaki bomoi na ye moko. (Baloma 10:2) Lokola azalaki Mofalisai ya molende, na ntembe te azalaki na molende mingi mpo na Nzambe mpe mpo na Makomami. Nsima na kokóma moklisto, molende ya Paulo mosalelamaki elongo na boyebi ya solo, mpe akokaki kosalela makambo oyo ayekolaki liboso mpo na mokano ya sembo. Na ndakisa, kati na mokanda epai na Baebele, asalelaki boyebi na ye mozindo ya lisoló ya Yisraele mpe ya tempelo, mpo na komonisa motuya monene ya ebongiseli ya boklisto.

Lelo oyo, bamoko na bato na mayele ya mokili bazali kondima nsango malamu. Bato na boyebi ndenge na ndenge, mpe baoyo bayebi misala ndenge na ndenge, basili kondima solo mpe bazali kosalela boyebi na bango kati na mosala ya Jéhovah. Atako basalaki bakelasi nini, oyo ezali na ntina mingi kati na makanisi ya baklisto ezali boyebi ya elimo. Wana ezali “makambo maleki ntina” mpamba te yango ekoki komema biso na bomoi ya seko.​—Bafilipi 1:10.