“Mbote! Oyebi nkombo na Nzambe?”

BANA basi mibale ya mapasa oyo bazalaki na mibu 12, oyo bafandi na engumba_ Fortaleza, batindaki mokanda oyo elandi na Filiale ya ba Témoins de Jéhovah na mokili ya Brésil:

“Na 1990, ntango tozalaki na secondaire, eteyelo na biso esalaki ebongiseli ya bolakisi biloko na makambo ya sianse, ya ntóki mpe bokolisi mayele. Tolimbwelaki molakisi na biso ete tolingaki kolakisa biloko bikeseni na oyo basusu bakanaki kosalisa. Lokola asilaki koyoka biso kolobela Jéhovah mpe Biblia, apesaki likanisi oyo ete: ˈBoye bokoki kokoma makambo matali Nzambe na bino!ˈ

“Tomonaki wana libaku ya kopesa litatoli mpe tozwaki ekateli ya kolakisa mikanda mikolimbolaka Biblia oyo mizali kolobela mingi nkombo na Jéhovah. Tobongisaki makomi minene ya maloba na Nzembo 83:18 mpe tobambaki yango na oyo emonisamaki lokola Biblia efungwami. Totandaki lisusu likolo na mesa mabongoli makeseni ya Biblia oyo mazali na nkombo Jéhovah. Likolo, na mesa yango, totyaki molongo molai ya mikanda mikolimbolaka Biblia. Na nsuka ya mesa, totyaki video mpo na kolakisa na batali bandakisa ya film ya sika epai nkombo Jéhovah esalelami.

“Na ntango ya bolakisi, wana moto moko azalaki koya na mesa na biso, tozalaki koloba: ˈMbote! Oyebi nkombo na Nzambe?ˈ Nsima na kotikela moto yango likoki ya koyanola, tozalaki kolanda koloba ete: ˈTala awa! Mabongoli mingi ya Biblia mazali komonisa ete nkombo na ye ezali Jéhovah,ˈ tozalaki kolakisa epai nkombo yango ezali komonana kati na mabongoli makeseni ya Biblia, lokola oyo João Ferreira de Almeida, La Bible de Jérusalem mpe Traduction du monde nouveau. Na nsima tozalaki kofungola video mpo na komonisa esika moto oyo azali kosala makambo mingi kati na film azali komonisa polele ete Jéhovah ezali nkombo ya Nzambe. Ntango bato bazalaki komonisa bosepeli, tozalaki kotikela bango zulunalo moko to trakte moko oyo ezali kopesa bandimbola ya polele.

“Moko na bilenge oyo bayaki na mesa na biso azwaki mokanda Les jeunes sˈinterrogent​—Réponses pratiques. Molakisi na biso azwaki mokanda Ndenge nini okoki kozala na bomoi na libota ya esengo mpe akamwaki ete: ˈOyo nde mokanda kitoko!ˈ Na nsuka ya bolakisi, totikaki mikanda 7, batrakte 18 mpe bazulunalo 67. Tozwaki esika ya misato. Kasi na koleka tozali na esengo ya kozwa libaku ya koyebisa nkombo na Nzambe, Jéhovah.”