Mituna na Batangi

Soki moklisto moko azali na bokono to na mobembo mpe akoki te koyangana na Ekaniseli, asengeli kosala yango nsima na sanza moko?

Na Yisraele ya kala, Pasika ezalaki kokumisama mbula na mbula mokolo ya le 14 ya sanza ya liboso, oyo ebengami Nisan (to, Abib). Nzokande, tozali kokuta ebongiseli moko ya sipesiale kati na Mituya 9:10, 11: “Lobela bato na Yisraele ete: ˈSoko moto kati na bino to kati na bana na bina azali na mbindo na ntina ya komama ebembe, to azali mosika na mobembo, ye akotosa Elekeli na Jéhovah. Na sanza ya mibale [ebengami Iyyar to Ziv], na mokolo na zomi na minei na mpokwa bakotosa yango. Bakolya yango na limpa lizangi mfulu, mpe na ndunda ya bololo.ˈ”

Emonani polele ete mokapo oyo elobeli te mikolo mibale mikeseni (le 14 Nisan to le 14 Ziv), mpo na kokumisa Pasika, lokolo nde Moyisraele moko na moko to libota moko ezalaki na bonsomi ya kopona moko na yango engebene oyo ye alingi. Kokumisama ya Pasika na sanza ya mibale ezalaki mpenza likambo lizalaki kosalema mingi te: na ndakisa, wana Moyisraele moko azalaki peto te engebene mibeko to soki azalaki na mobembo mosika na mboka epai milulu misengelaki kosalema.

Mbala bobele moko oyo tozoli kotanga kati na Makomami ete ebonigiseli oyo esalelamaki na bato mingi, ezalaki ntango mokonzi ya sembo Ezekiase azongisaki elambo ya mampa mazangi mfulu. Bayisraele bazalaki na ntango ya komibongisaki te mpo na sanza ya liboso (banganga bamilengelaki naino te mpe bato bayanganaki naina te), yango wana esalemaki mokolo ya le 14 na sanza ya mibale.​—2 Ntango 29:17; 30:1-5.

Soki likambo ya motindo yango lizalaki te, Bayuda bazalaki kokumisa Pasika na mokolo molakamaki na Nzambe. (Exode 12:17-20, 41, 42, Levitike 23:5) Yesu mpe bayekoli na ye bakumisaki elambo yango lokola Mibeko mizalaki kosenga; basakanaki na mokolo moponami te. Mpo na yango, Luka alobi ete: “Mokolo na mampa mazangi mfulu mokomaki, mokolo mokokaki na koboma mwana na mpate ya Elekeli; bongo Yesu atindaki Petelo na Yoane, mpe alobaki ete: ‘Kenda kobongisa Elekeli mpo na biso ete tolya yango.’”​—Luka 22:7, 8.

Ezalaki na libaku wana nde Yesu abongisaki molulu ya mbula na mbula oyo baklisto bayebi yango na nkombo ya Elambo ya Nkolo. Ntina ezali te ya koloba mingi ete baklisto basengeli koyangana na elambo yango. Mpo na ba Témoins de Jéhovah ezali likambo lileki ntina kati na mbula. Maloba oyo ya Yesu mazali komonisa yango: “Bosalaka boye mpo na ekaniseli na ngai.” (Luka 22:19) Mpo na yango, basanza mingi na liboso, Témoin de Jéhovah moko na moko asengeli kokamata bibongiseli ete mokolo wana eloko moko epekisa ye te. Elambo ya Nkolo ekokumisama mardi le 6 avril 1993, nsima ya kolala na moi na esika bozali.

Atako yango esalemaka mbala mingi te, ekómaka ete likambo likanami te, lokola bokono to mikakatano ya mobembo, ekoki kopekisa moklisto moko na koyangana na Ekaniseli lokola akanaki yango. Asengeli kosala nini na ntango yongo?

Na boumeli ya molulu yango, balekisaka limpa lizangi mfulu mpe vinyo; ezali bobele baoyo bapakolami na elimu santu mpe baponami mpo na bomoi na likolo nde bakolyaka limpa mpe bakomelaka vinyo yango. (Matai 26:26-29; Luka 22:28-30) Soki moklisto moko oyo alyaka yango mbula na mbula azali na bokono na ndako na ye to na lopitalo, bankulutu ya lisangá na ye bakozwa bibongiseli mpo ete moko na bango amema mwa limpa mpe vinyo epai na mobeli, bakotalela mwa mikapo yo Biblia oyo miyokani na likambo yango mpe bakolakisa ye limpa mpe vinyo. Soki moklisto moko mopokolami azali mosika na lisangá na ye, asengeli kokamata bibongiseli mpo na koyangana na Ekaniseli na lisangá oyo ezali penepene na esika azali na ntango yango.

Na yango, esengeli mpenza kozala na mabaku mingi te oyo ekosenga ete moklisto mopakolami moko abongisa Elambo na Nkolo mikolo 30 na nsima, na boyokani na etinda oyo ezali kati na Mituya 9:10, 11 mpe na ndakisa epesami na 2 Ntango 30:1-3, 15.

Baoyo bazali basangani ya etuluku ya “bampate mosusu” ya Yesu mpe bazali na elikya ya bomoi ya seko kati na paradis na mabelé bazwaki te etinda ya kolya limpa mpe komela vinyo. (Yoane 10:16) Ya solo, ezali na ntina mingi mpo no bango ete bayangana na elambo wana ya mbula na mbula, kasi bazali kolya limpa te mpe komela vinyo te. Mpo na yango, soki moko na bango azali na bokono to na mobembo, mpe atangolami mosika na lisangá moko na mpokwa wana, akoki, kotanga biteni ya Makomomi oyo biyokani na likamba yango (bakisa lisoló ya kobongisama ya elambo yango na Yesu) mpe akobondela Jéhovah ete apambola ebongiseli wana kati na mokili mobimba. Kasi, na likambo lolenge yango, ntina ezali te ya kokamata bibongiseli mpo na likita mosusu to botangi mosusu ya Biblia nsima na sanza moko.