Batatoli ya Yehova kati na mokili na Bahamas

BAHAMAS, ekólo oyo eyangelamaki kala na Grande-Bretagne​—etuluku ya bisanga 3 000 mpe bisanga ya mikemike​—etandami lokola mayaka ya pauni na bolai ya bakilomɛtɛlɛ 900 ya mai monene na langi bulé, katikati na Florida mpe Cuba. Kati na bafandi na yango 267 000, ezali na etuluku ya bayembi basakoli na Bokonzi oyo ezali sé kokóla. Loyembo na bango ya makumisi ezali kokundola [maloba ya] Yisaya 42:10-12, ete: “Boyembela [Yehova] loyembo na sika, mpe lisanjoli kosanjola ye longwa na ndelo na mokili; bino bokokitaka kino mai na monana mpe yɔnsɔ ikotondisaka yango, [bino bisanga mpe bino bafandi na yango, NW]. . . . Banganga na epai na likolo na ngomba. Bakumisa [Yehova] na nkɛmbo, batatola lisanjoli na ye na kati na [bisanga, NW].”

Kondima ya sika emekami

Na Yulí 1992, mobongisi-nzela moko ya sanza na sanza (mosakoli ya Bokonzi ya ntango nyonso) apesaki búku Okoki kozala na bomoi ya seko na mabele oyo ekobongwana paradis epai na moto moko ya mombongo. Nsima na kotanga mokanda yango, mobali wana amilobaki ete, ‘Lingomba oyo ezali eloko oyo nasengeli koyekola malamumalamu.’ Na Mikolo mibale ya Eyenga oyo milandaki, ayanganaki na makita na Bandako mibale ya Bokonzi ya Batatoli ya Yehova na bisika bikeseni. Na nsima, boyekoli ya Biblia ebandaki elongo na ye. Kasi, bobele poso motoba uta boyekoli yango ya Biblia ebandaki, komekama ebimi likoló na kondima na ye ya sika​—bilambo ya bokumisi mikolo ya mbotámá.

Libota ya moto wana ya mombongo emipesaki mingi mpenza na bilambo ya motindo wana, kasi bolingo na ye mpo na Liloba ya Nzambe epusaki ye na kolanda koyekola Biblia. Lokola boyebi ya Makomami ya solo ezalaki kokóla, bososoli na ye ezalaki mpe kokóla likoló na bilambo ya bokumisi mikolo ya mbotámá mpe mikolo mosantu mpe likoló na lolenge oyo Yehova azali kotalela yango.

Ntango mwasi ya mobali wana abongisaki elambo moko mpo na Mokolo ya Eyenga ya misato oyo eponami na sanza ya Yúni mpo na Elambo ya bokumisi batata, ye aboyaki koyangana na yango na bonkondé nyonso. Atako bongo, mwasi akanisaki ete mobali alingaki ye lisusu te mpe azalaki kotya lingomba na ye liboso ya [mwasi] na ye mpe libota na ye. Alimbolaki na boboto nyonso ete kosalela makambo oyo azalaki koyekola uta na Biblia ezalaki kosalisa ye na kobongwana mpo na kokóma mobali malamu mpe tata malamu. Na nsima, mwasi ayaki kosepela mingi mpo na bolingo ya [mobali] na ye epai na solo ya Makomami mpe andimaki koyekola Biblia. Sikawa, azali kotambwisa boyekoli ya Biblia elongo na libota na ye. Mpe azalaki mpenza na esengo monene na Liyangani ya Etúká “Mateya mauti na Nzambe” oyo esalemaki na mbula oyo euti koleka. Mwasi na ye mpe mwana na ye ya mwasi bazalaki wana mpe bamonaki wana azalaki kozwa batisimo.

Bautá bayoki loyembo ya sika

Bankóto mingi ya bautá ya mboka Haïti, basangani na bato ya mboka Bahamas. Bazali na mposa monene ya koyoka loyembo ya sika ya solo ya Bokonzi. Batatoli oyo bafandi na Bahamas bazali na esengo mingi mpo na boyei ya babalani minei ya Haïti na mokili ya Amerika. Bato wana bapesaki lisungi mpo na kolendisa bituluku oyo biutaki kosalema sika mpo na bautá ya Haïti, na bisanga ya Bahama Monene mpe Abaco.

Mpo na kobakisa lisungi mosusu epai na bato bautá mboka Haïti, baoyo bazalaki kosepela na nsango ya Bokonzi, liyangani ya liboso ya etúká lisalemaki na lokótá lolobamaki na bautá ya Haïti, kobanda Yulí 31 kino Augústo 1, 1993. Ezalaki na bayangani 214, elongo na bato misato oyo bautaki komipesa na kozwáká batisimo. Bato mingi ya Haïti baoyo bayekolaki solo na Bahamas bazongaki bongo na bisanga epai bautaki to bakendaki kofanda bipai mosusu mpo na kobakisa mingongo na bango likoló na oyo ya Batatoli ya bamboka wana na kosanzoláká Yehova na loyembo ya makumisi.

[Etanda na lokasa 8]

MAKAMBO MATALI EKÓLO

Mbula ya mosala 1993a

MOTUYA YA BATATOLI: 1 294

BOKOKANISI: Motatoli 1 mpo na bato 197

MOTUYA YA BAYANGANI NA EKANISELI: 3 794

MWAYENE YA BABONGISI-NZELA: 186

MWAYENE YA BOYEKOLI YA BIBLIA: 1 715

MOTUYA YA BATISIMO: 79

MOTUYA YA MASANGÁ: 22

FILIALE: NASSAU

[Maloba na nse ya lokasa]

[Elilingi na lokasa 9]

Ndako ya Bokonzi ya liboso, elongo na biro ya filiale mpe ndako ya bamisionere

[Elilingi na lokasa 9]

Batatoli bazali kosakola nsango malamu na molende nyonso

[Elilingi na lokasa 9]

Milton G. Henschel mpe Nathan H. Knorr elongo na bamisionere na Nassau, soko mibu 45 misili koleka

[Elilingi na lokasa 9]

Biro ya sika ya filiale, efungolamaki na Febwáli 8, 1992