Masoló ya Basakoli ya Bokonzi

“Bótɛmɛlaka Zábolo, mpe akokima longwa na bino”

NA EKEKE ya liboso, etuluku moko ya bato oyo bamipesaki mingi na “misala ya bondɔki” kati na engumba Efese, bandimaki nsango ya boklisto na kotumbáká babúku na bango ya bondɔki liboso ya bato banso. (Misala 19:19) Motuya ya mosolo ya babúku yango ezalaki palata 50 000. Soki lisoló ya Biblia lilobeli denali, palata ya Baloma, esengelaki kozala soko na motuya ya badolare 37 000!

Lelo oyo ezali mpe na bato mingi oyo bazalaki kala na mikanda oyo mizalaki na boyokani na bondɔki, kasi bamonisaki ekateli motindo moko na bato ya Efese na ntango ya kala. Tótalela likambo lilandi oyo lisalemaki na mboka Canada.

Esili koleka soko mibu mitano, Motatoli ya Yehova moko azalaki kosakola ndako na ndako wana mwasi moko na nkombo Nora abendaki ye mpenza kati na ndako. Nsima na kolekisa bambula mingi ya bolukiluki ya makambo ya elimo, Nora azwaki babúku mingi ya makambo ya losambo mpe ya bondɔki, kasi azalaki na mposa ya koyeba oyo Biblia ezalaki koloba na ntina na elikya mpo na bakufi. Motatoli apesaki ye trakte Elikya nini ezali mpo na balingami na biso oyo basili kokufa? Biyano bipesamaki na mituna oyo Nora azalaki na yango, mpe andimaki kosala abonemá ya bazulunalo Linɔ́ngi ya Mosɛnzɛli mpe Lamuká!

Na nsima akendaki esika mosusu mpe akutanaki lisusu na Batatoli ya Yehova te. Nzokande, alandaki kozwa bazulunalo na nzela ya pósita na adresi na ye ya sika. Asɛngaki mpe kozwa mikanda mikolimbolaka Biblia oyo milobelamaki kati na bazulunalo. Nsima na mwa ntango, Motatoli ya Yehova moko ayaki na ndako na ye. Akamwaki na komona ete mpo na koyanola na mituna, Motatoli azalaki mbala moko kosalela Biblia, Nora ayambaki ye malamu mpe asɛngaki ye ete azongela ye mpo ete básolola lisusu mingi.

Nzokande, ezalaki mpasi mpo na Motatoli ete akutana lisusu na Nora. Azalaki kozongela ye mbala na mbala na bantango ekeseni na mokolo moko mpe na bantango ekeseni na boumeli ya pɔ́sɔ, kasi azalaki komona ye te. Atako bongo, na nsima, kolendendela na ye ezwaki mbano, mpe azwaki matomba malamu. Babandaki boyekoli ya Biblia, oyo Nora asɛngaki na etingya nyonso ete esalemaka mbala misato na boumeli ya pɔ́sɔ. Makambo oyo azalaki koyekola epusaki ye na kolobela yango na baninga na ye mpe na basangani ya libota na ye, litomba na yango ezalaki ete misato kati na bango basɛngaki koyekola Biblia elongo na Batatoli ya Yehova.

Na lisalisi ya boyekoli na ye, Nora ayaki kososola ete mangomba ya lokuta mazali mingi mpe basakoli ya lokuta bazali mingi, kasi bobele nzela moko nde ezali komema na bomoi. Na boumeli ya bambula mingi azalaki koluka biyano na mituna na ye kati na mangomba ya lokuta, kasi nsima na koyekola oyo Biblia ezali koloba na ntina na bademó, asalaki lokola bato ya Efese na ntango ya kala oyo balobelami na Misala 19:19. Apɛtolaki bibliotɛkɛ na ye mpe, na boumeli ya mikolo mingi, abebisaki koleka babúku nkóto oyo ezalaki na boyokani na bondɔki mpe na mateya ya lokuta ya mangomba. Kati na mikanda oyo abebisaki, moko oyo ekabwanaki na bavolimi minei ezalaki na motuya ya badolare 800!

Ezali polele ete bademó basepelaki te na makambo oyo Nora asalaki, batungisaki ye na boumeli pene na bapɔ́sɔ mibale. Atako bongo, bilimu mabe wana balóngaki te na kopekisa ye ete atika boyekoli na ye ya Biblia mpe bosangani na ye elongo na lisangá ya Yehova oyo ezali na mikolo na biso.

Makambo oyo mamonisi polele bosolo ya maloba oyo ya Biblia: “Na bongo, botosaka Nzambe. Bótɛmɛlaka Zábolo mpe akokima longwa na bino.”​—Yakobo 4:7, NW.