Mituna ya Batángi

Engebene Bagalatia 6:8: “sɔkɔ [moto] akokona kati na nzoto, akobuka libebi kati na nzoto; nde ye oyo akokona kati na [elimo, NW] akobuka bomɔi na seko na nzela na [elimo, NW].” “Elimo” oyo elobelami awa elimboli nini, mpe lolenge nini tokoki kobuka bomoi?

Maloba ya Liebele mpe ya Greke oyo mabongolami na “elimo” mazali na ndimbola ekeseni, lokola: (1) nguya ya Nzambe oyo ekosalaka mosala, (2) nguya ya bomoi oyo ezalaka kati na bato mpe banyama, (3) nguya oyo epusaka makanisi ya moto, mpe (4) ekelamu ya elimo to anzelu. Oyo ya liboso​—nguya ya Nzambe oyo ekosalaka mosala​—ezali yango nde elobelami kati na Bagalatia 6:8.

Mpo na kozwa likanisi ya makambo mazwami zingazinga ya mokapo yango, tózonga na Bagalatia 3:2 (NW), epai kuna liloba “elimo” esalelami mpo na mbala ya liboso kati na Bagalatia. Paulo atunaki epai na Baklisto ete: “Bozwaki elimo mpo na misala ya mibeko to mpo na koyoka na nzela ya kondima?” Na nsima, na Bagalatia 3:5, amonisaki boyokani oyo ezali kati na elimo yango mpe kokokisama ya misala ya nguya. Na yango, “elimo” oyo azalaki kolobela ezalaki bongo elimo santu, nguya ya Nzambe oyo ekosalaka mosala.

Mwa mosika, na Bagalatia 5:16, Paulo akesenisaki elimo na nzoto. Totángi ete: “Nalobi ete, Botambola na [elimo, NW] mpe bopɛsa mposa na nzoto nzela tɛ.” Wana alobelaki “mposa na nzoto,” alingaki nde komonisa mposa ya nzoto oyo etondi na masumu. Yango wana, kati na Bagalatia 5:19-23, atángaki “misala ya nzoto” na bokeseni na “mbuma ya elimo.”

Sikawa, kati na Bagalatia 6:8, emonani ete moto oyo azali ‘kokóna kati na nzoto’ azali ye oyo azali komitika kotambwisama na bamposa na ye ya bomoto oyo etondi na masumu, komipesáká na “misala ya nzoto.” Mbala mosusu, azali kozwa matomba mabe ya etamboli wana, mpe soki abongwani te, akozwa bomoi te, ezala kati na Bokonzi ya Nzambe to na nsé ya boyangeli na yango.​—1 Bakolinti 6:9,10.

Mpo na biso oyo tozali baklisto bamipesi, mposa na biso ezali bongo ya ‘kolóna mpo na elimo ya Nzambe.’ Yango ezali kosɛnga kozala na lolenge ya bomoi oyo ezali kopesa nzela na elimo santu ete esala mosala na bonsomi nyonso kati na bomoi na biso, kosalisáká biso ete tómonisa mbuma na yango. Tosengeli kobosana yango te wana tozali kopona oyo tosengeli kotánga to emisyó ya televizyó oyo tosengeli kotala. Tozali kolóna mpo na elimo wana tozali kolanda malamu makita ya lisangá mpe wana tozali kosala makasi mpo na kosalela batoli ya bankulutu, bango baponami na elimo.​—Misala 20:28.

Tósimba likambo oyo ete Bagalatia 6:8 esuki na kopesa elaká oyo ete na kolónáká na boyokani na elimo santu, tokozala na makoki ya “kobuka bomoi na seko kati na elimo.” Ɛɛ, na moboko ya lisiko oyo Klisto apesaki, Nzambe akopesa bomoi ya seko na nzela ya mosala ya elimo santu.​—Matai 19:29; 25:46; Yoane 3:14-16; Baloma 2:6, 7; Baefese 1:7.