Mikakatano ya mabota oyo ezali na bana ya libala mosusu

MABOTA OYO EZALI NA BANA OYO BABOTAMI NA LIBALA MOSUSU EKOKI KOZALA NA ESENGO! NDENGE NINI?

Mabota oyo ezali na bana oyo mwasi to mobali to mpe bango mibale babotaki na libala mosusu ekómi komonana na bisika mingi na mokili. Nzokande, mabota yango ezalaka na mikakatano na yango oyo ezali na mabota mosusu te. Na ntembe te, mokakatano oyo eleki monene ezali ya kobɔkɔla bana. Kasi, lokola tokomeka komonisa yango na masolo mibale oyo elandi, bato bakoki kolonga kobɔkɔla bana na libota ya ndenge yango.

NA MOMESENO, BATO BALOBAKA KAKA MABE MPO NA BATATA NA BAMAMA BABƆKƆLI. NTANGO TOZALAKI bana mike, mingi kati na biso toyokaki mitindo ndenge na ndenge ya lisapo ya Cendrillon, oyo anyokwamaki mingi na mama mobɔkɔli moko ya motema mabe. Na Mpoto, bana bayekolaka lisapo ya Blanche-Neige et les sept nains. Mama mobɔkɔli ya Blanche-Neige akómaki elima!

Masapo ya ndenge yango elakisaka mpenzampenza ndenge oyo mabota oyo ezali na bana oyo bauti na libala mosusu ezalaka? Batata to bamama babɔkɔli nyonso bazalaka mitema mabe? Te. Mingi balingaka ete bana ya moto oyo basali na ye libala bázala malamu. Kasi, bakutanaka na mikakatano oyo ezali na mabota mosusu te.

Mikakatano ya kobɔkɔla bana

Mbala mingi soki libala ya liboso ekufi, ezalaka mpo ete babalani bakolaki naino na makanisi te. Na libala ya mibale, bana bakoki kobebisa boyokani ya babalani. Ezali na balapolo oyo emonisi ete soki tozwi mabala 10 oyo ezali na bana oyo babotamaki na libala mosusu, mabala 4 ezali kokufa liboso ekokisa mbula mitano.

Mbala mosusu, bato oyo babalani sika bakoki koyeba te ete bana bazali na mobulungano, to mitema na bango ekabwani, bazali koyokela mwasi to mobali oyo abalani na moboti na bango zuwa mpe nkanda. Bana bakoki komona lokola ete tata to mama na bango abosani bango mpe apesi bolingo nyonso epai ya mobalani na ye ya sika. Lisusu, moboti oyo atikali ye moko akoki koyoka mabe na ndenge oyo bana bazali ntango nyonso kolinga moto oyo aboyi ye. Elenge mobali moko amekaki kolimbola mpo na nini ayokanaka malamu na tata na ye. Alobaki boye: “Mama, nayebi malamu ete Papa asalaki yo mabe, kasi asalelaka ngai makambo malamu!” Maloba ya ndenge oyo, atako ezali sembo, ekoki kosala ete mama ayokela tata ya mwana na ye nkanda.

Tata mobɔkɔli moko alobaki boye: “Namibongisaki mpenza te mpo na kolonga mikakatano ya kobɔkɔla bana ya mwasi na ngai. Nakanisaki ete lokola nabali mama na bango, mbala moko nakómi mpe tata na bango. Nakanisaki ete ekozala mpasi te! Nazalaki koyeba te mpo na nini bana bazalaki kaka kolinga tata na bango. Yango wana, nasalaki mabunga mingi.”

Matata ekoki kobima mingimingi na likambo ya disipilini. Bana babongi na disipilini oyo ezali kopesama na bolingo, kasi mbala mingi basepelaka na yango te ata soki euti na moboti na bango mpenza. Ezalaka mpasi mingi lisusu bándima disipilini ya tata mobɔkɔli! Mbala mingi, ntango bazali kopesa ye disipilini motindo wana, mwana ya tata mosusu abimisaka maloba lokola oyo: “Yo moto obotaki ngai te!” Maloba motindo oyo ekoki kolɛmbisa tata mobɔkɔli oyo alingi bolamu ya mwana!

Bana bakoki kobɔkwama malamu na libota oyo moko na moboti na bango abalani na moto mosusu? Batata to bamama babɔkɔli bakoki mpenza kosala ete libota ya ndenge wana ezala malamu? Eyano na mituna oyo mibale ezali ɛɛ soki bato nyonso bazali kolanda toli ya Biblia, Liloba oyo epemami na Nzambe.

[Elilingi na lokasa 3]

“Yo moto obotaki ngai te!”