Masolo ya Basakoli ya Bokonzi

Bamposa na ye ya elimo ekokisamaki

CHYPRE ezali esanga moko oyo ezwami na litumu ya nɔrdi-ɛsti ya Mai Monene ya Méditerranée. Na ntango ya kala, Chypre eyebanaki mingi mpo na kwivre na yango mpe mabaya na yango ya kitoko. Na mobembo na bango ya liboso ya misionɛrɛ, Paulo na Balanaba basakolaki nsango malamu ya Bokonzi na esanga yango. (Misala 13:​4-12) Lelo oyo, nsango malamu ezali kaka kobimisa matomba malamu na bomoi ya bafandi mingi ya Chypre. Bosolo ya likambo yango emonani epai ya Lucas, mobali moko oyo azali na mbula koleka 40. Ye alobi boye:

“Nabotamaki na libota moko ya bana nsambo; tozalaki kofanda na ferme na biso, esika tozalaki kobɔkola bangɔmbɛ. Banda bomwana mpenza, nazalaki kosepela mingi kotánga mikanda. Buku oyo nazalaki kolinga mingi ezalaki Makomami ya Grɛki ya Boklisto oyo ebimisamaki lokola buku moko ya moke. Ntango nazalaki na mbula zomi, ngai na baninga na ngai mosusu tosalaki mwa etuluku mpo na koyekola Biblia. Kasi, etuluku yango eumelaki te mpo mikóló mosusu ya mboka bakómaki kobenga biso bapɛngwi.

“Na nsima, na ntango oyo nazalaki kotánga na États-Unis, nakutanaki na bato ya mangomba mingi. Yango elamwisaki lisusu mposa na ngai mpo na makambo ya elimo. Nalekisaki mikolo mingi na bibliotɛkɛ ya iniversite mpo na koyekola mangomba ndenge na ndenge. Nakɔtaki mpe na mangomba ebele, kasi atako nasalaki milende nyonso wana, bamposa na ngai ya elimo ekokisamaki te.

“Nsima ya kosilisa kelasi na ngai, nazongaki na Chypre mpe nazwaki mosala; nakómaki mokambi ya laboratware moko ya minganga. Mobali moko ya mokóló, nkombo na ye Antonis, oyo azalaki Motatoli ya Yehova, azalaki koya kotala ngai na esika na ngai ya mosala. Kasi, lokola azalaki koya mbala na mbala, yango esukaki na kobenda likebi ya Lingomba ya Ɔrtɔdɔksɛ ya Grèce.

“Mosika te, moto moko ya teoloji ayaki kotala ngai mpe alɛmbisaki ngai nzoto mpo natika kosolola na Batatoli ya Yehova. Lokola bayebisaki ngai banda bomwana ete Lingomba ya Ɔrtɔdɔksɛ ya Grèce nde ezalaki na mateya ya solo, nandimaki toli yango, natikaki kosolola na Antonis mpe nakómaki kosolola masolo ya Biblia na moto yango. Nakendaki mpe kotala bamonastɛrɛ mingi ya Chypre. Nasalaki kutu mobembo na nɔrdi ya Grèce mpo na kotala Ngomba Athos, oyo bato ya Lingomba ya Ortɔdɔksɛ ya bipai nyonso batalelaka lokola ngomba oyo eleki bosantu. Atako bongo, nazwaki kaka biyano te na mituna oyo nazalaki komituna likoló ya Biblia.

“Na nsima, nasambelaki Nzambe mpo asalisa ngai nayeba solo. Eumelaki te, Antonis ayaki lisusu kotala ngai na esika na ngai ya mosala, mpe namonaki ete yango ezalaki eyano na libondeli na ngai. Na bongo, natikaki kosolola na moto wana ya teoloji mpe nabandaki koyekola Biblia na Antonis. Nalandaki kokola, mpe na sanza ya Ɔkɔtɔbɛ 1997, nazwaki batisimo mpo na komonisa ete namipesi epai ya Yehova.

“Na ebandeli, mwasi na ngai mpe bana na biso mibale ya basi ya liboso, oyo na ntango wana moko azalaki na mbula 14 mpe mosusu na mbula 10, bazalaki kotɛmɛla ngai. Kasi mpo na etamboli na ngai ya malamu, mwasi na ngai azwaki ekateli ya kokende na likita moko na Ndako ya Bokonzi. Boboto ya Batatoli mpe ndenge bamibanzabanzaki mpo na ye ekamwisaki ye mingi. Eloko ekamwisaki ye mingi koleka ezalaki lolenge na bango ya kosalela Biblia. Mpo na yango, mwasi na ngai mpe bana na biso mibale ya basi ya liboso bandimaki koyekola Biblia na Batatoli ya Yehova. Kanisá esengo oyo nazalaki na yango ntango bango nyonso misato bazwaki batisimo na Liyangani ya etúká “Liloba ya esakweli ya Nzambe” oyo esalemaki na mobu 1999!

“Ya solo, mposa na ngai ya kozwa mateya ya solo ekokisamaki. Sikoyo libota na biso mobimba, elingi koloba mwasi na ngai mpe bana na biso minei, tosangani na losambo ya pɛto ya Yehova.”