Epai wapi okoki kozwa bomoi ya malamu?

Na mwa mboka moko na Afrika ya Wɛsti, elenge Josué azali kopɛpa bandeko mpe baninga na ye lobɔkɔ.a Na nsima, asimbi nzela mpe akei na vile mpo na koluka mbongo. Kasi, ntango akómi kuna, amoni ete bilikya nyonso oyo azalaki na yango elimwe lokola molinga; amoni ete kuna, mbongo ekweaka lokola nkasa ya nzete te.

JOSUÉ akómi kobunda etumba mpo amesana na bomoi ya vile, amoni mpenza ete azalaki nde kolɔta ntango azalaki na mboka. Makambo ezali ata moke te ndenge oyo ye azalaki kokanisa. Josué akómi na mposa azonga na mboka epai atikaki bandeko na ye na baninga na ye. Kasi, azali kobanga ete bato mosusu na mboka bakosɛka ye. Azali kokanisa boye: ‘Bakoloba ete nazali mobali te mpo nakoki makambo te na vile.’

Likambo mosusu ezali kopesa ye mpasi na motó ezali soki akanisi ndenge oyo baboti na ye bakolɛmba nzoto. Baboti na ye bazali kotyela ye motema ete akobanda kotindela bango mwa mbongo. Ntango makanisi wana ezali kotambola ye na motó, Josué azali kosala mosala moko ya mongamba oyo ezali kozwa bangonga ebele, kasi bazali kofuta ye mbongo moke. Josué alɛmbi, mosala eleki makasi. Lisusu, ntango oyo asengeli kosala mosala ya Nzambe ezali se kokita pɔsɔ na pɔsɔ; nzokande, mosala yango ezali na ntina mingi mpo na ye. Ye ko mosika na bandeko na baninga na ye, Josué atali likoló, atali na nse, mayele esuki ye, akómi mpenza mwana ya mawa. Amoni ete bomoi ya malamu oyo akanisaki kozwa na vile, azwi yango te.

Na bisika ndenge na ndenge, ebele ya bato bakutanaka na makambo oyo Josué akutanaki na yango. Soki Josué alongwaki na mboka, ezali te kaka mpo na esengo ya kokende epai mosusu, azalaki nde koluka bomoi ya malamu. Azalaki mpenza kokanisa ete soki akei na vile akozala na bomoi ya malamu koleka oyo azalaki na yango na mboka. Ya solo, bato mosusu bakoki kokóma na biloko mingi, kasi yango elingi koloba te ete bomoi na bango ekómaka mpenza malamu. Josué akómaki te na bomoi ya malamu oyo akanisaka. Bato mingi oyo basalaka bongo, basukaka kaka mpe lokola ye. Yango wana, totuni motuna boye: ‘Bomoi ya malamu elimboli nini?’

Bato na bato bazalaka na ndenge na bango ya kotalela bomoi ya malamu. Diksionɛrɛ moko elobi ete bomoi ya malamu ezali bomoi ya moto oyo “azali na libateli” to bomoi ya moto oyo “azali kobanga te to mpe azali komitungisa te.” Bato mingi bazali komona ete na moi ya lelo, “kozala na libateli” na makambo nyonso ekoki kosalema te. Ntango bazali komiyoka ete bomoi na bango ezali malamu, atako mpasi ezali na esika oyo bafandi, bamonaka ete ekoki na bango bongo.

Ezali boni mpo na yo? Okanisaka ete okoki kozwa bomoi ya malamu epai wapi? Bomoi ya malamu ezalaka nde na vile, kasi na mboka te, ndenge Josué azalaki kokanisa? To okanisaka ete soki ozali na mbongo, ata soki ozali kozwa yango wapi mpe na banzela nini, nde okozala na bomoi ya malamu? Moto akómaka na bomoi ya malamu soki akómi moto monene? Ata soki okanisaka epai wapi oyo okoki kozwa bomoi ya malamu, bomoi yango ekoki kozala malamu mpo na ntango boni mpo na yo mpe libota na yo?

Tótalela makambo misato oyo bato mingi balukaka mpo na kozala na bomoi ya malamu: esika ya kofanda, mbongo, mpe mosala ya lokumu. Na nsima, tokotalela epai wapi moto akoki kozwa bomoi oyo ekozala mpenza malamu mpo na libela.

[Maloba na nse ya lokasa]