Masolo ya Basakoli ya Bokonzi

Akutaki mateya ya solo na esika oyo akanisaki te ete akokuta yango

MOKANO ya Nzambe ezali ete “bato ya ndenge nyonso bábika mpe bákóma na boyebi ya sikisiki ya solo.” (1 Timote 2:​3, 4, NW) Mpo na kokokisa mokano wana, Batatoli ya Yehova babimisi mpe bakaboli bamilio ya Babiblia mpe mikanda oyo elimbolaka Biblia. Na bantango mosusu, mikanda yango esalisaki bato ya motema sembo báyekola solo na ndenge oyo bakanisaki yango te. Mpo na yango, basakoli ya Bokonzi na Freetown, na ekólo Sierra Leone, bayebisi lisolo oyo.

Osman azalaki mwana ya mibale na libota ya bana libwa. Lokola akolaki na libota oyo balingaki makambo ya Nzambe, azalaki kokende losambo elongo na tata na ye. Kasi, Osman azalaki komitungisa mingi mpo na makambo oyo lingomba na ye ezalaki koteya mpo na lifelo. Azalaki kokanga ntina te oyo Nzambe ya motema mawa asengeli kotumbaka bato na mɔ́tɔ mpo na konyokola bango. Bandimbola nyonso bapesaki Osman mpo na kosalisa ye akanga ntina ya liteya ya lifelo ya mɔ́tɔ ekitisaki ye motema te.

Mokolo moko, ntango Osman akómaki na mbula 20, amonaki mokanda moko ya langi ya bule ekundami na ekunde. Lokola azalaki kolinga kotánga mikanda mingi, alɔkɔtaki yango, apangusaki yango, mpe amonaki motó ya likambo na yango ete Solo oyo ezali komema na bomoi ya seko.a

Osman amitunaki ete: ‘Solo nini wana?’ Lokola azalaki na mposa ya koyeba likambo yango, Osman amemaki mokanda yango na ndako mpe abandaki mbala moko kotánga yango tii asilisaki yango. Asepelaki ntango ayebaki ete nkombo ya Nzambe ezali Yehova. (Nzembo 83:18) Osman ayekolaki lisusu ete bolingo ezali ezaleli ya Nzambe oyo eleki monene mpe ayini ata likanisi mpamba ya konyokola bato na mɔ́tɔ. (Yilimia 32:35; 1 Yoane 4:⁠8) Na nsuka, Osman atángaki ete etikali moke Yehova atya paladiso awa na mabele epai bato bakozala na bomoi ya seko. (Nzembo 37:29; Emoniseli 21:​3, 4) Talá mateya kitoko ya solo oyo euti na Nzambe ya motema mawa mpe ya bolingo! Osman atɔndaki Yehova mingi ndenge asalisaki ye ete akuta mateya ya solo na esika oyo akanisaki te.

Nsima ya mwa mikolo, baninga na ye mosusu balakisaki ye Ndako ya Bokonzi ya Batatoli ya Yehova mpe akendaki na makita mpo na mbala ya liboso. Kuna, asɛngaki Motatoli moko ayekola na ye Biblia. Atako bandeko na ye baboyaki mpenza ete ayekola, Osman alandaki kokola na elimo mpe azwaki batisimo. (Matai 10:36) Lelo oyo, azali nkulutu na lisangá. Ezali mpenza esengo ete makambo nyonso wana esalamaki mpo amonaki na kati ya ekunde mokanda oyo ezali kolobela makambo ya Biblia.

[Maloba na nse ya lokasa]