“Bópusana penepene na nzambe, mpe ye akopusana penepene na bino”

Liboso mpe nsima bomoi na ye ebongwanaki

BOMOI ya Matsepang ezalaki lisusu ata na ntina moko te! Ye azalaki elenge mwasi moko ya Lesotho, ekólo oyo ezali na kati ya Afrika ya Sudi. Akolaki na Lingomba ya Katolike. Na esika bamamelo básalisa ye apusana penepene na Nzambe, bazalaki nde kosala na ye makambo ya nsɔni, bazalaki kopesa ye mbongo mpo asala na bango makambo ya mbindo; likambo yango eumelaki bambula ebele.

Makambo wana esalaki ete Matsepang atika kotyela makambo ya losambo motema mpe azalaki lisusu kondima te ete ezali na Mozalisi ya bolingo oyo amibanzabanzaka mpo bikelamu na ye. Makambo wana ya nsɔni oyo basalaki ye ebebisaki makanisi na ye mpe akómaki komiyoka ete azali ata na ntina moko te. Ntango akolaki, akómaki nkandankanda. Yango wana akómaki moto ya mobulu.

Matsepang akómaki kotambola na baninga ya mobulu mpe bazalaki koyiba na bingbunduka. Bakangaki ye na Afrika ya Sudi mpe batyaki ye na bolɔkɔ. Na nsima, bazongisaki ye na ekólo na ye Lesotho, epai azongelaki lisusu makambo na ye ya mobulu, ya kolangwa masanga, kobunda bitumba, mpe kosala kindumba.

Na ntango moko oyo azalaki kotungisama mingi na makanisi, Matsepang abondelaki Nzambe asalisa ye. Alakaki ete: “Nzambe, soki nakómi malamu, nakosala nyonso mpo nasalela yo.”

Eumelaki te bamisionɛrɛ Batatoli ya Yehova basololaki na Matsepang. Basɛngaki ye báyekola na ye Biblia. Boyekoli ya Biblia esalisaki ye ayeba ete Nzambe akangaka miso te na bampasi na biso mpe amibanzabanzaka mpenza mpo na biso. Akangaki mpenza ntina ete ezali Satana, “tata ya lokuta” nde asalelaka mayele mabe mpo na kondimisa bato mosusu ete bazali na ntina te mpe ete Yehova akoki kolinga bango ata moke te.​—Yoane 8:44; Baefese 6:11.

Matsepang abɔndisamaki mingi ntango ayekolaki ete biso moko tokoki kopesa nzoto na biso kilo soki totiki kosala masumu, tobongoli motema, tosɛngi Nzambe alimbisa biso mpe tosali makasi mpo na kosepelisa ye. Basalisaki ye na koyeba ete “Nzambe azali monene koleka mitema na biso mpe ayebi makambo nyonso” mpe ndenge oyo atalelaka biso ekeseni mpenza na ndenge oyo biso moko tomitalelaka.​—1 Yoane 3:19, 20.

Matsepang asepelaki mingi ntango atángaki maloba ya Davidi oyo: “Yehova azali penepene na baoyo bazali konyokwama na mitema; abikisaka baoyo bazali kotungisama na elimo.” (Nzembo 34:18, NW) Lokola ye moko azalaki “kotungisama na elimo,” amonaki mpenza ete Yehova asundolaka basaleli na ye te, ata soki bazali lisusu na esengo te to bazali komiyoka ete bazali na ntina moko te. Ayokaki esengo mingi na motema na koyeba ete Yehova abatelaka bampate na ye nyonso mpe asungaka bango na ntango ya mpasi. (Nzembo 55:22; 1 Petelo 5:6, 7) Likambo oyo esimbaki mpenza motema na ye ezali maloba oyo: “Bópusana penepene na Nzambe, mpe ye akopusana penepene na bino.”​—Yakobo 4:8.

Eumelaki te, nguya ya Liloba ya Nzambe ekómaki kosala mosala na yango na bomoi ya Matsepang. Akómaki koyangana na makita nyonso ya lisangá mpe atikaki makambo nyonso ya mabe oyo Makomami eboyi. Nini esalemaki? Amiyokaka lisusu te ete Nzambe akoki kondima ye te to kosepela na ye te. Banda azwá batisimo mpe akómá Motatoli ya Yehova, asili kolekisa bankóto ya bangonga na mosala ya kosakola nsango malamu ya Bokonzi. Atako Matsepang atikalá na bilembo mabe na makanisi, azali sikoyo na bomoi ya malamu mpe bomoi na ye ezali na ntina. Yango ezali komonisa ete Liloba ya Nzambe ezali na nguya ya kobongola bato!​—Baebele 4:12.

[Likanisi ya paragrafe na lokasa 9]

“Nzambe, soki nakómi malamu, nakosala nyonso mpo nasalela yo”

[Etanda na lokasa 9]

Mitinda ya Biblia ezali kobongola bato

Na mitinda ya Biblia oyo elendisaki bato mosusu oyo bazalaki konyokwama, tokoki kotánga oyo:

“Ntango makanisi ya kobulunganisa etondelaki ngai, mabɔndisi na yo [Nzambe] ekómaki kobondela molimo na ngai.” (Nzembo 94:19, NW) “Mabɔndisi” ya Yehova oyo ezali na Liloba na ye ekitisaka mpenza motema. Komanyola mpe kobondela likoló na yango esalisaka biso tólongola makanisi mabe mpe tótalela Nzambe ete azali Moninga oyo ayebi mpenza komitya na esika na biso.

“[Yehova] azali kobikisa baoyo bazali konyokwama na mitema; azali kokanga mpota na bango ya mpasi.” (Nzembo 147:3, NW) Soki tozali na botɔndi mpo na motema mawa ya Yehova mpe mpo na ebongiseli azwi ya kolimbisa masumu na biso na nzela ya mbeka oyo Yesu apesaki mpo na kosikola biso, tokoki kopusana penepene na Nzambe mpe motema na biso ekokweisa biso lisusu te. Yango ekoki kolendisa biso mpe kopesa biso kimya ya elimo oyo eleki kimya nyonso.

“Moto moko akoki koya epai na ngai te soki Tata, oyo atindaki ngai, abendi ye te; mpe ngai nakosekwisa ye na mokolo ya nsuka.” (Yoane 6:44) Na nzela ya mosala ya kosakola mpe na elimo santu na ye, Yehova ye moko azali kobenda biso penepene na Mwana na ye mpe azali kopesa biso elikya ya bomoi ya seko.