Bilenge, bósanzola Yehova!
“Bósanzola [Yehova] awa na mokili, . . . bilenge mpe baseka lokola.”—NZEMBO 148:7, 12.
1, 2. (a) Makambo nini bilenge mingi bayebaka ete bazali naino na ndingisa ya kosala yango te? (b) Mpo na nini bilenge basengeli komona mabe te ntango baboti na bango bazali kopekisa bango kosala makambo mosusu?
BILENGE mingi bayebaka malamu makambo nyonso oyo bapesi bango naino ndingisa ya kosala te. Soki otuni bango, mingi balobaka mbala moko ete bayebisá bango basengeli naino kokokisa mbula boye to boye liboso bákóma kokatisa balabala ya monene bango moko to mpo bátinda bango lisusu te bákende kolala na ngonga moko boye to mpo bápesa bango ndingisa ya kokumba motuka. Elenge akoki komona ete soki azali na mposa ya kosala likambo moko boye, mbala mingi bayebisaka ye kaka ete, “Zelá naino okóma mokóló.”
2 Bilenge, boyebi malamu ete baboti na bino bamonaka ete ezali malamu bátyela bino mibeko wana, mbala mosusu mpo na kobatela bino. Na ntembe te, boyebi mpe ete Yehova asepelaka ntango bozali kotosa baboti na bino. (Bakolose 3:20) Kasi, bomonaka lokola nde bomoi na bino ebandi naino te? Bokanisi ete mpo bósala makambo nyonso ya ntina bosengeli kaka kozela tii ntango bokokóma mikóló? Ezali bongo te! Ezali na mosala moko oyo ezali kosalema lelo oyo, mosala oyo ezali na ntina mingi koleka makambo nyonso oyo bozelaka bokóma naino mikóló liboso ya kosala yango. Bino bilenge mpe bozali na ndingisa ya kosala mosala yango? Ɛɛ, kutu Nzambe Oyo-Aleki-Likoló ye moko azali kosɛnga bino bósala mosala yango!
3. Yehova azali kosɛnga bilenge básala mosala nini ya ntina mingi, mpe mituna nini tokotalela?
3 Tolingi kolobela mosala nini? Tótalela mokapo oyo esimbi lisolo oyo: “Bósanzola [Yehova] awa na mokili, . . . bilenge mpe baseka lokola, [mibange] mpe bana elongo.” (Nzembo 148:7, 12) Talá libaku monene oyo bozali na yango: Bokoki kosanzola Yehova. Yo elenge, osepelaka kosala mosala yango? Mingi basepelaka. Mpo na koyeba ntina oyo ebongi kosepela na mosala yango, tiká tótalela mituna misato. Ya liboso, mpo na nini osengeli kosanzola Yehova? Ya mibale, ndenge nini okoki mpenza kosanzola Yehova? Ya misato, ntango nini ebongi kobanda kosanzola Yehova?
Mpo na nini kosanzola Yehova?
4, 5. (a) Nzembo 148 emonisi ete tozali liboso ya likambo nini ya kitoko? (b) Ndenge nini bikelamu oyo elobaka te mpe ekanisaka te esanzolaka Yehova?
4 Ntina monene ya kosanzola Yehova ezali ete azali Mozalisi. Nzembo 148 ezali komonisa malamu likambo yango. Kanisá naino: Soki ozali pembeni ya ebele ya bato oyo bazali koyemba nzembo moko kitoko, oyo maloba na yango ezali mpenza kosimba motema, okoyoka ndenge nini? Okanisi boni soki maloba ya nzembo yango ezali solo, ezali kolobela makanisi ya ntina, ya esengo, mpe oyo ezali kolendisa? Okoyoka mposa ya koyekola nzembo yango mpe koyemba na bato yango? Mingi kati na biso bakosala bongo. Nzembo 148 emonisi ete ozali liboso ya likambo ya ndenge wana; kutu, yango ezali malamu koleka. Nzembo yango elobeli ebele ya bikelamu oyo bazali bango nyonso kosanzola Yehova. Kasi, soki otángi nzembo yango, okomona likambo moko ya kokamwa. Likambo nini?
5 Bikelamu mingi oyo Nzembo 148 elobeli, elobaka te mpe ekanisaka te. Na ndakisa: Moi, sanza, minzoto, mbula-mpɛmbɛ, mopɛpɛ, bangomba milai mpe mike. Ndenge nini biloko yango oyo ekanisaka te ekoki kosanzola Yehova? (Nzembo 148 Vɛrsɛ 3, 8, 9) Kaka ndenge banzete, bambisi, mpe banyama esalaka yango. (Nzembo 148 Vɛrsɛ 7, 9, 10) Osilá komona ndenge moi emonanaka kitoko ntango ezali kolala to sanza oyo ebimi mobimba na kati ya ebele ya minzoto na likoló to mpe osilá kotala banyama bazali kosakana, to mpe osilá kozwa libaku ya kotala zamba moko kitoko? Boye tokoloba ete ‘oyokaki’ loyembo ya masanzoli ya bikelamu wana. Biloko nyonso oyo Yehova asalá ezali komonisa biso ete azali Mozalisi oyo azali na nguya nyonso mpe ete na molɔ́ngɔ́ mobimba, ezali na moto mosusu te oyo azali na nguya, na bwanya, to na bolingo lokola ye.—Baloma 1:20; Emoniseli 4:11.
6, 7. (a) Nzembo 148 elobeli bikelamu nini oyo ezali kosanzola Yehova? (b) Mpo na nini tokoki koyoka mposa ya kosanzola Yehova? Pesá ndakisa.
6 Nzembo 148 elobi mpe ete bato ná baanzelu bazali kosanzola Yehova. Na Nzembo 148 vɛrsɛ 2, balobi ete “bibele” nyonso ya Yehova kuna na likoló, elingi koloba baanzelu, bazali kosanzola Nzambe. Na vɛrsɛ 11, bazali kosɛnga bato minene mpe ya nguya, na ndakisa bakonzi mpe bazuzi, ete bango mpe básanzola Nzambe. Soki baanzelu, bikelamu ya nguya mingi, basepelaka kosanzola Yehova, ezali nde na likambo moko oyo moto akoki koloba ete ezali na ntina mingi koleka kosanzola Yehova? Na nsima, na Nzembo 148 vɛrsɛ 12 mpe 13, basɛngi mpe bino bilenge bósanzola Yehova. Motema na yo eyokaka mposa ya kosala yango?
7 Tózwa ndakisa moko. Soki ozali na moninga moko oyo ayebi malamu kosala likambo moko boye, na ndakisa ayebi kobɛta bale to lisano mosusu, to ayebi kobɛta miziki to koyemba, okobanda te kobɛta lisolo na ye epai ya bandeko ná baninga na yo mosusu? Na ntembe te okosala yango. Ndenge moko mpe, koyekola makambo nyonso oyo Yehova asali ekoki mpe kotinda biso tósala ndenge wana. Na ndakisa, Nzembo 19:1, 2 (NW) elobi ete minzoto na likoló etindaka na ‘kobimisa maloba.’ Soki tokanisi makambo ya kokamwa oyo Yehova asalá, tokoyoka kaka mposa ya koyebisa bato mosusu makambo oyo etali Nzambe na biso.
8, 9. Mpo na bantina nini Yehova alingaka tósanzola ye?
8 Ntina mosusu ya monene ya kosanzola Yehova ezali ete ye moko alingi tósala yango. Mpo na nini? Ezali nde mpo azalaka na mposa ya masanzoli ya bato? Te. Biso bato tozalaka ntango mosusu na mposa bákumisa biso, kasi Yehova azali likoló mingi koleka biso. (Yisaya 55:8) Ayebi malamumalamu ete azali Nzambe mpe azali na bizaleli nyonso ya malamu. (Yisaya 45:5) Kasi, alingi ete biso tósanzola ye mpe asepelaka ntango tozali kosala yango. Mpo na nini? Tótalela bantina mibale. Ya liboso, ayebi ete tozalaka na mposa ya kosanzola ye. Akelá biso na mposa ya kosambela. (Matai 5:3) Yehova asepelaka ntango amonaka biso tozali kokokisa mposa wana, ndenge kaka baboti na bino basepelaka ntango bamonaka bino bozali kolya bilei oyo ekotonga nzoto na bino.—Yoane 4:34.
9 Ya mibale, Yehova ayebi ete bato mosusu bazalaka na mposa ya koyoka biso tozali kosanzola ye. Ntoma Paulo akomelaki elenge Timote boye: “Kebá ntango nyonso mpo na yo moko mpe mpo na mateya na yo. Kangamá na makambo yango, mpamba te na kosaláká bongo okobikisa ná yo moko ná baoyo bazali koyoka yo.” (1 Timote 4:16) Ntango ozali koteya bato makambo ya Yehova Nzambe, elingi koloba ozali kosanzola ye, bato yango mpe bakoki koyeba Yehova. Boyebi yango ekoki komemela bango lobiko ya seko!—Yoane 17:3.
10. Mpo na nini toyokaka mposa ya kosanzola Nzambe?
10 Kasi, ezali mpe na ntina mosusu oyo tosengeli kosanzola Yehova. Kanisá lisusu ndakisa ya moninga na yo oyo ayebi malamu kosala likambo moko. Soki oyoki bato bazali koloba makambo ya lokuta mpo na ye, bazali kobebisa lokumu na ye, motema na yo ekotinda yo te okumisa ye lisusu koleka? Ndenge oyebi yango, na mokili oyo bazali kosambwisa nkombo ya Yehova na ndenge ya koloba te. (Yoane 8:44; Emoniseli 12:9) Yango wana, bato oyo balingaka ye bamonaka ete basengeli koloba solo mpo na ye mpe na ndenge yango kosembola makambo. Yo mpe olingi kolakisa bolingo mpe botɔndi na yo epai ya Yehova mpe komonisa ete olingi ye azala Mokonzi na yo, kasi Satana te, monguna monene ya Nzambe? Okoki kosala nyonso wana soki ozali kosanzola Yehova. Yango wana, motuna oyo tosengeli komituna yango oyo: ‘Ndenge nini tokosanzola ye?’
Ndenge oyo bilenge mosusu basanzolaki Yehova
11. Biblia elobeli ndakisa ya banani oyo emonisi ete bilenge bakoki mpenza kosanzola Yehova?
11 Biblia emonisi ete mbala mingi bilenge bayebaka mpenza kosanzola Yehova. Na ndakisa, ezalaki na elenge mwasi moko Moyisalaele oyo bato ya Sulia bamemaki na boombo. Elenge yango abangaki te kobɛta lisolo ya mosakoli Elisa epai ya mwasi ya nkolo na ye. Mpo na yango, nkolo na ye abikisamaki na ndenge ya likamwisi mpe azwaki litatoli ete Nzambe ya solo azali na Yisalaele. (2 Mikonzi 5:1-17) Yesu mpe abangaki te kopesa litatoli ata ntango azalaki mwana moke. Na makambo nyonso oyo Yesu asalaki na bomwana na ye, Yehova aponaki kaka likambo moko ekomama na Biblia; ezali na ntango Yesu azalaki na mbula 12 mpe azalaki kotuna balakisi na tempelo na Yelusaleme mpe bato yango bakamwaki mayele oyo azalaki na yango ya banzela ya Yehova.—Luka 2:46-49.
12, 13. (a) Yesu asalaki nini na tempelo mwa mikolo liboso akufa, mpe yango esalaki nini epai ya bato oyo bazalaki wana? (b) Yesu ayokaki ndenge nini ntango bana mike basanzolaki ye?
12 Ntango Yesu akómaki mokóló, apesaki mpe bilenge mposa ya kosanzola Yehova. Na ndakisa, mwa mikolo liboso akufa, Yesu akendaki na tempelo na Yelusaleme. Biblia elobi ete kuna asalaki “makambo ya kokamwisa.” Abenganaki bato oyo bakómisaki esika yango ya bosantu libulu ya miyibi. Lisusu, abikisaki bato bakufá miso ná batɛngumi. Bato nyonso oyo bazalaki wana, mingimingi bakonzi ya mangomba, basengelaki mpenza kosanzola Yehova ná Mwana na ye Masiya. Kasi, bato mingi ya ntango wana basalaki yango te. Bayebaki ete Yesu azalaki motindami ya Nzambe, kasi bazalaki kobanga bakonzi ya mangomba. Nzokande, ezali na bato oyo basanzolaki ye na mpiko nyonso. Boyebi soki ezalaki banani? Biblia elobi boye: “Ntango banganga-nzambe bakonzi mpe bakomeli bamonaki makambo ya kokamwisa oyo [Yesu] asalaki mpe bana mibali oyo bazalaki koganga na tempelo mpe koloba ete: ‘Bikisá, tobondeli yo, Mwana ya Davidi!’ bayokaki mabe mpe balobaki na [Yesu] ete: ‘Ozali koyoka makambo bango bazali koloba?’”—Matai 21:15, 16; Yoane 12:42.
13 Banganga-nzambe yango bakanisaki ete Yesu akopekisa bana oyo bazalaki kosanzola ye. Asalaki yango? Te! Yesu azongiselaki banganga-nzambe boye: “Ɛɛ. Botángá naino te likambo oyo ete, ‘Uta na minɔkɔ ya bana mike mpe ya bana oyo bazali komɛla mabɛlɛ obimisi lisanzoli’?” Tomoni mpenza ete Yesu ná Tata na ye basepelaki na masanzoli ya bilenge wana. Bana yango basalaki likambo oyo mikóló oyo bazalaki wana basengelaki kosala. Atako bazalaki bilenge, bamonaki ete basengeli kosala ndenge wana. Bamonaki makambo ya kokamwa oyo moto yango asalaki, ndenge azalaki koloba na mpiko mpe na kondima, mpe bamonaki bolingo mingi oyo azalaki na yango mpo na Nzambe mpe mpo na bato na ye. Azalaki mpenza “Mwana ya Davidi,” to Masiya oyo alakamaki, ndenge ye moko azalaki koloba. Bilenge yango bapambolamaki mpo na kondima na bango na ndenge bazwaki libaku malamu ya kokokisa esakweli moko.—Nzembo 8:2.
14. Ndenge nini makoki oyo bilenge bazali na yango esalisaka bango básanzola Nzambe?
14 Bandakisa yango ekoki koteya biso nini? Emonisi ete bilenge bakoki mpenza kosanzola Yehova. Mbala mingi, bilenge bamonaka makambo ya solo na kozanga mindɔndɔ, bazalaka na molende mpo na komonisa kondima na bango. Lisusu, bazalaka na likabo oyo Masese 20:29 elobeli: “Nkembo ya bilenge ezali nguya na bango.” Ya solo, bino bilenge bozali na nguya to makasi, likoki oyo bokoki kosalela mpo na kosanzola Yehova. Ndenge nini bokoki kosalela yango?
Ndenge nini bokoki kosanzola Yehova?
15. Nini esengeli kotinda moto asanzola Yehova malamu?
15 Kosanzola Yehova malamu ebandaka na motema. Bokoki te kosanzola mpenza Yehova soki bozali kosala yango kaka mpo bato mosusu bazali kotinda bino. Bóbosana te ete mobeko oyo eleki monene elobi boye: “Osengeli kolinga Yehova Nzambe na yo na motema na yo mobimba mpe na molimo na yo mobimba mpe na makanisi na yo nyonso.” (Matai 22:37) Boyekoli na bino ya Liloba ya Yehova esalisi bino mpenza bóyeba ye malamu? Soki boyekoli Liloba ya Nzambe malamu, bokolinga Yehova mingi. Lolenge ebongi mpo na komonisa bolingo yango ezali kosanzola ye. Soki mposa yango efandi na mitema na bino mpe ekómi makasi, ekotinda bino bósanzola Yehova na esengo.
16, 17. Bizaleli ya moto esalaka mosala nini na oyo etali kosanzola Yehova? Pesá ndakisa.
16 Liboso ya kokanisa makambo oyo bokoloba mpo na kosanzola ye, bókanisa naino ndenge oyo bokosala yango. Soki elenge mwasi Moyisalaele ya ntango ya Elisa azalaki na momeseno ya koloba maloba mabe, azalaki kobanga mikóló te, to azalaki lokuta, okanisi ete balingaki kondima maloba oyo alobaki mpo na mosakoli ya Yehova? Elingaki kozala mwa mpasi. Ndenge moko mpe, bato bakondima koyoka bino soki bamonaka ete botosaka mikóló, bozalaka sembo, mpe na bizaleli malamu. (Baloma 2:21) Tótalela ndakisa moko.
17 Na Portugal, elenge mwasi moko ya mbula 11 akutanaki na mokakatano na kelasi mpo azalaki koboya kosala bafɛti ya mokili oyo Biblia endimi te. Na limemya nyonso, alimbwelaki molakisi na bango ntina oyo aboyaki kosala bafɛti yango, kasi molakisi atyolaki ye. Molakisi yango azalaki mbala na mbala koyokisa ye nsɔni mpe kosɛka lingomba na ye. Atako bongo, elenge mwasi yango azalaki kaka kopesa ye limemya. Bambula mingi na nsima, elenge mwasi yango akómaki mobongisi-nzela ya sanza na sanza. Na liyangani moko ya etúká, ntango azalaki kotala bato oyo bazalaki kozwa batisimo, amonaki moto moko oyo ayebi. Ezalaki molakisi na bango! Ntango bakutanaki, bayambanaki mpe balelaki na esengo; mwasi yango ayebisaki mwana-kelasi na ye ya kala ete abosanaki te limemya oyo azalaki komonisa. Ntango Motatoli moko akendaki koteya ye, ayebisaki ye ete abosanaka te bizaleli malamu ya mwana moko oyo atángisaká. Mwasi yango akómaki koyekola Biblia, mpe nsukansuka ayambaki solo. Bomoni ete bizaleli na bino ekoki mpenza kosanzola Yehova!
18. Elenge akoki kosala nini soki azali kokakatana mpo na kobanda masolo ya Biblia to kolobela nkombo ya Yehova Nzambe?
18 Obangaka kobanda lisolo mpo na koyebisa baninga na yo ya kelasi makambo oyo ondimaka? Yebá ete ozali yo moko te. Kasi, okoki kosala makambo oyo ekotinda bato mosusu bátuna yo mituna mpo na mateya ya lingomba na yo. Na ndakisa, soki epekisami te, okoki komema mikanda oyo elimbolaka Biblia mpe kotánga yango na ngonga ya bopemi to na ntango mosusu oyo okoki kosala yango. Baninga na yo ya kelasi bakoki koluka koyeba makambo nini ozali kotánga. Ntango ozali kopesa bango biyano mpe koyebisa bango makambo ya malamu oyo ezali na lisolo oyo ozali kotánga to mokanda oyo ozali na yango, ekoki kopesa yo libaku ya kosolola na bango makambo ya Biblia. Kobosanaka te kotuna mituna mpo na koyeba makambo oyo baninga na yo bandimaka. Yokáká bango malamu mpe yebisáká bango makambo oyo oyekoli na Biblia. Ndenge lisolo oyo ezali na lokasa 29 emonisi yango, bilenge mingi bazali kosanzola Nzambe na kelasi. Yango ezali kopesa bango esengo mingi mpe ezali kosalisa bato mingi báyeba Yehova.
19. Ndenge nini elenge akoki kokóma na makoki mingi na mosala ya ndako na ndako?
19 Kosakola ndako na ndako ezali ndenge malamu mingi ya kosanzola Yehova. Soki obimaka naino na mosala yango te, tolendisi yo omityela mokano ya kosala yango! Soki osalaka yango, okoki nde komityela mikano mosusu? Na ndakisa, na esika ozongelaka kaka maloba ndenge moko na porte nyonso oyo bokómi, luká ndenge oyo okoki kobakisa mayele na yo, sɛngá na baboti na yo mpe bandeko mosusu oyo bamesaná na mosala yango básalisa yo. Yekolá kosalela mingi Biblia, kozongela bato oyo basepelaki, mpe kobanda koyekola Biblia na bato. (1 Timote 4:15) Soki ozali komipesa na kosanzola Yehova na balolenge yango, okokóma na mayele mingi, mpe okosepela mingi na mosala ya kosakola.
Ntango nini bosengeli kobanda kosanzola Yehova?
20. Mpo na nini bilenge basengeli kokanisa te ete bakoki naino te mpo na kosanzola Yehova?
20 Na mituna misato oyo etunami na lisolo oyo, motuna oyo nde ezali pɛtɛɛ mpo na koyanola. Yoká eyano ya polele oyo Biblia epesi: “Kanisá Mozalisi na yo Monene na mikolo ya bolenge na yo.” (Mosakoli 12:1, NW) Osengeli mpenza kobanda kosanzola Yehova sikoyo. Elenge mosusu akoki koloba boye: “Nazali naino mwana moke, nakoki naino te kosanzola Yehova. Nayebi naino makambo mingi te. Nazali kozela nakola naino.” Soki okanisaka bongo, ozali moto ya liboso te. Na ndakisa, elenge Yilimia alobaki na Yehova boye: “Aha, Nkolo [Yehova], talá; nayebi koloba te zambi ngai nazali bobele elenge.” Yehova akitisaki ye motema mpe ayebisaki ye abanga te. (Yilimia 1:6, 7) Ndenge moko mpe, tosengeli kobanga eloko moko te ntango tozali kosanzola Yehova. Mabe moko te ekoki kokómela biso oyo Yehova akokoka te kosilisa.—Nzembo 118:6.
21, 22. Mpo na nini bakokanisi bilenge oyo bazali kosanzola Yehova na mamwɛ, mpe mpo na nini ezali likambo ya kolendisa?
21 Yango wana, tozali kolendisa bino bilenge: Bókakatana te mpo na kosanzola Yehova! Ntango bozali naino bilenge nde ntango eleki malamu ya kopesa mabɔkɔ na mosala eleki ntina oyo ezali kosalema na mabelé mobimba. Ntango bondimi kosala mosala yango, bokɔti na lisangá ya malamu mingi ya bikelamu oyo bazali kosanzola Yehova na molɔ́ngɔ́ mobimba. Yehova akosepela mingi soki bino mpe bozali na kati ya lisangá yango. Bóyoka maloba oyo mokomi ya Nzembo alobaki na Yehova: “Bato na yo bakomipesa na yo na bolingo nyonso, na mokolo ya nguya na yo, na nkembo ya bulɛɛ, bilenge na yo bakoya epai na yo lokola mamwɛ longwa na ntango ya ntɔngɔntɔngɔ.”—Nzembo 110:3.
22 Mamwɛ ya ntɔngɔntɔngɔ ezalaka kitoko na kotala! Lisusu, epesaka mwa mpiɔ, engɛngaka, mpe ezipaka etando monene mpenza. Yehova mpe amonaka bino ndenge wana, bino bilenge oyo bozali kosanzola ye na mikolo oyo ya nsuka. Ntembe ezali te ete nzela boponi ya kosanzola Yehova esepelisaka motema na ye. (Masese 27:11) Yango wana, bótika ata eloko moko te epekisa bino kosanzola Yehova!
Okopesa eyano nini?
• Wapi mwa bantina oyo esengeli kotinda biso tósanzola Yehova?
• Biblia elobeli ndakisa ya banani oyo emonisi ete bilenge bakoki mpenza kokumisa Yehova?
• Ndenge nini bilenge bakoki kosanzola Yehova lelo oyo?
• Ntango nini bilenge basengeli kobanda kosanzola Yehova, mpe mpo na nini?
[Bililingi na lokasa 25]
Soki moninga na yo moko ayebi kosala malamu likambo moko boye, okobɛta lisolo na ye epai ya bato mosusu te?
[Elilingi na lokasa 27]
Baninga na yo ya kelasi bakoki koluka koyeba bindimeli na yo
[Elilingi na lokasa 28]
Soki olingi kobongisa ndenge oyo osalaka mosala ya kosakola, luká toli epai ya Motatoli oyo amesani na mosala yango