Kebá na lolendo!

LIKAMBO moko oyo elekaki na bomoi ya Mokonzi Davidi ezali komonisa ntina ya koboya lolendo mpe kolona komikitisa ya solosolo. Likambo yango esalemaki ntango Davidi autaki kolonga bato oyo bazalaki kofanda na Yelusaleme mpe akómisaki yango engumba-mokonzi. Mpo na Davidi, Yehova nde azalaki mpenzampenza Mokonzi ya Yisalaele; yango wana asɛngaki ete bámema na Yelusaleme Sanduku oyo ezalaki komonisa ete Nzambe azali na kati na bango. Yango ezalaki likambo ya ntina mingi na miso ya Davidi; yango wana abombaki esengo na ye te ntango azalaki kolanda banganga-nzambe oyo bamemaki Sanduku. Bato ya Yelusaleme bamonaki mokonzi na bango azali ‘kobina . . . na nguya na ye nyonso.’​—1 Ntango 15:15, 16, 29; 2 Samwele 6:11-16.

Nzokande, Mikala, mwasi ya Davidi, azalaki te na kati ya bato oyo bazalaki kosepela mpe kolanda bato oyo bamemaki sanduku. Mikala atɛlɛmaki na fenetre ya ndako mpo na kotala bango. Kasi, na esika asepela na ndenge mobali na ye azalaki kokumisa Yehova, ye “atyolaki [Davidi] na motema na ye.” (2 Samwele 6:16) Mpo na nini Mikala ayokaki mabe? Na ntembe te azalaki komipesa valɛrɛ mingi mpo azalaki mwana ya Saulo, mokonzi ya liboso ya Yisalaele, mpe mwasi ya Davidi, mokonzi ya mibale ya Yisalaele. Mbala mosusu na makanisi na ye, lokola mobali na ye azalaki mokonzi, ebongaki te amisambwisa ndenge wana mpe asepela lokola bato mosusu nyonso. Maloba oyo mwasi yango alobaki na Davidi ntango azongaki na ndako emonisi ete azalaki na lolendo. Na lityo nyonso, alobaki na ye ete: “Mokonzi ya Yisalaele azalaki na nkembo boni lelo! Ye oyo amimonisi na miso ya basi ya baombo na ye lokola moto ya mpamba akomimonisa nde koyoka nsɔni te!”​—2 Samwele 6:20.

Davidi asalaki nini? Davidi apamelaki Mikala mpe alobaki na ye ete Yehova aboyaki tata na ye Saulo mpe aponaki ye. Abakisaki boye: “Ata nakotyolama koleka oyo, mpe nakokóma mabe na miso na ngai moko, nde epai ya basi baoyo yo otángi bango nkombo, nakokumisama.”​—2 Samwele 6:21, 22.

Maloba ya Davidi emonisi ete akokaki kokanisa ata moke te kotika kosalela Yehova na elimo ya komikitisa. Makanisi na ye esalisi biso tómona ntina oyo Yehova abengaki ye “moto oyo motema na ngai esepeli na ye.” (Misala 13:22; 1 Samwele 13:14) Davidi alandaki ndakisa ya Yehova Nzambe, ndakisa ya komikitisa oyo eleki nyonso. Kutu, liloba oyo Davidi asalelaki ntango alobaki na Mikala ete “nakokóma mabe” euti na verbe ya Liebele oyo Biblia esaleli mpo na komonisa ndenge oyo Nzambe amikitisaka liboso ya bato. Atako Yehova aleki likoló na molɔ́ngɔ́ mobimba, Nzembo 113:6, 7 elobi ete ‘amikitisaka [tii na esika ya moto oyo azali na nse] mpo na kotala epai na lola mpe kati na nse. Akonɛtola mobola na mputulu, akobimisa mozangi na esika ebwakami ye.’

Lokola Yehova amikitisaka, tokoki kokamwa te ndenge Biblia elobi ete ayini bato oyo bazali na “miso ya nzombo,” to bato ya lolendo. (Masese 6:16, 17) Lokola Mikala azalaki na ezaleli mabe wana mpe azangaki limemya epai ya mokonzi oyo Nzambe aponaki, etumbu na ye ezalaki ete akobota mwana te na Davidi. Abotaki mpe te bomoi na ye mobimba. Likambo yango ezali likebisi monene mpo na biso! Baoyo nyonso balingi ete Nzambe asepela na bango basengeli kotosa maloba oyo: “Bólata elimo ya komikitisa na kati na bino, mpamba te Nzambe atɛmɛlaka bato ya lolendo, kasi amonisaka boboto monene na ye epai ya bato ya komikitisa.”​—1 Petelo 5:5.