“Tosengeli kotosa Nzambe lokola azali moyangeli na esika ya kotosa bato”

‘Nzambe na biso ayebi kobikisa biso’

MOKONZI Nebukadanesala asalisaki ekeko moko molai mpenza; ekeko yango ezalaki ya wolo mpe batɛlɛmisaki yango na mokili ya Dula, pembeni ya engumba Babilone. Mokonzi aponaki mokolo moko oyo basengelaki kolakisa ekeko yango mpe bakonzi minene ya Babilone basengelaki kozala wana. Bango nyonso basengelaki kofukama liboso ya ekeko yango ntango miziki ekobɛta. Nebukadanesala apesaki mitindo ete moto nyonso oyo akoboya kosambela ekeko yango akobwakama na litumbu ya mɔtɔ makasi. Nani oyo akokaki koboya kotosa maloba ya mokonzi?

Bato nyonso bakamwaki na komona Sadalaka, Mesaka mpe Abedenego, bilenge Baebele misato oyo bazalaki basambeli ya Yehova, baboyi kofukamela ekeko yango. Bayebaki ete soki bafukameli ekeko yango, babuki mobeko ya Yehova, Nzambe kaka moko oyo bango bazalaki kosambela. (Deteronome 5:8-10) Ntango mokonzi Nebukadanesala atunaki bango ntina oyo baboyaki kofukamela ekeko, babangaki te mpe bayebisaki ye boye: “Soki ezali boye mbɛ Nzambe na biso, oyo biso tosaleli ye, ayebi kobikisa biso na litumbu ya mɔtɔ ya kongala; mpe akobikisa biso na lobɔkɔ na yo. Ee mokonzi, oyeba ete ata boye te, biso tokosalela banzambe na yo te, mpe tokosambela elilingi ya wolo etɛmisaki yo te.”​—Danyele 3:17, 18.

Babwakaki Baebele wana misato na litumbu ya mɔtɔ makasi, kasi babikaki na ndenge ya likamwisi. Nzambe atindaki anzelu na ye mpo na kobikisa basaleli na ye wana ya sembo. Sadalaka, Mesaka mpe Abedenego bandimaki ata liwa na esika ya kobuka mobeko ya Yehova.a Ekateli na bango ekokani na ekateli oyo bantoma ya Yesu Klisto bazwaki mbula koleka nkama motoba na nsima. Liboso ya Sanedrina, to esambiselo monene ya Bayuda, balobaki boye: “Tosengeli kotosa Nzambe lokola azali moyangeli na esika ya kotosa bato.”​—Misala 5:29.

Mateya ya ntina mingi mpo na biso

Sadalaka, Mesaka, mpe Abedenego batikelaki biso ndakisa malamu mpenza ya kondima, botosi, mpe bosembo. Baebele wana misato bamonisaki kondima epai ya Yehova. Lokola bateyamaki malamu, lisosoli na bango epekisaki bango básambela banzambe ya lokuta to bákumisa ekólo. Lelo oyo mpe, baklisto ya solo bamonisaka polele ete batyelaka Nzambe motema. Balandaka lisosoli na bango oyo eteyami malamu mpe baboyaka losambo ya lokuta to milulu oyo mibeko ya Nzambe epekisi.

Baebele misato batyelaki Yehova motema mpe batikaki ata likambo moko te, ezala bozwi to lokumu oyo bakokaki kozwa na Babilone, epekisa bango kotosa Yehova. Bilenge yango bandimaki konyokwama, ata mpe kokufa, na esika ya kobebisa boyokani na bango na Nzambe. Lokola Moize, ‘batikalaki ngwi lokola nde bazali komona Moto oyo amonanaka te.’ (Baebele 11:27) Bazwaki ekateli ya kotikala sembo epai na Yehova na esika ya kobuka mobeko na ye mpo bábikisa bomoi na bango. Ekoki mpenza kozala ete ntoma Paulo akanisaki bango ntango alobelaki bato ya sembo oyo “bakangaki bokasi ya mɔtɔ.” (Baebele 11:34) Ndenge moko mpe lelo oyo, basaleli ya Yehova bamonisaka kondima mpe botosi epai ya Nzambe ata ntango bakutani na komekama.

Ndakisa ya Sadalaka, Mesaka, mpe Abedenego eteyi biso mpe ete Nzambe apambolaka basaleli na ye oyo bazali sembo. Mokomi ya nzembo ayembaki boye: “[Yehova] . . . akobatela bayengebene na ye.” (Nzembo 37:28) Lelo oyo, ntango tokutani na komekama, tosengeli komizela te ete Nzambe abikisa biso na ndenge ya likamwisi lokola asalaki mpo na Baebele misato. Atako bongo, tokoki kozala na elikya ete ata tokutani na mokakatano nini, Tata na biso ya likoló akozanga te kosunga biso. Akoki kosilisa mokakatano yango, akoki kopesa biso makasi ya koyikela yango mpiko, to mpe kosekwisa biso soki totikali sembo tii na liwa. (Nzembo 37:10, 11, 29; Yoane 5:28, 29) Ntango nyonso oyo kondima, botosi, mpe bosembo na biso emekami, tolongaka soki toponi kotosa Nzambe na esika ya kotosa bato.

[Maloba na nse ya lokasa]

[Etanda/​Elilingi na lokasa 9]

OYEBAKI YANGO?

• Baebele misato bazalaki na mbula pene na 30 ntango bosembo na bango emekamaki.

• Bangalisaki lisusu mɔtɔ ya litumbu makasi koleka.—Danyele 3:19.