Mituna ya batángi

Ndenge nini toyebi ete bwanya oyo Masese 8:22-31 elobeli ezali Yesu Klisto, liboso abotama lokola moto?

Na Mokanda ya Masese, oyo ekomamaki na lisalisi ya elimo santu, totángaka boye na ntina na bwanya: “[Yehova] atongaki ngai na ebandeli ya nzela na ye, liboso ya misala na ye ya kala. . . . Nabotamaki naino [bangomba] efandisamaki te, naino nkeka ezalaki te. . . . Ebongisaki ye lola, ngai nazalaki wana; . . . nazalaki pembeni na ye lokola [kapita-mosali, NW]; mokolo na mokolo nazalaki esengo na ye, kosepela liboso na ye ntango nyonso; . . . mpe esengo na ngai ezalaki kati na bana ya bato.”

Bakoki koloba makambo nyonso wana mpo na bwanya te, ezala ya Nzambe to ya bato. Mpo na nini? Mpamba te bwanya oyo balobeli awa, “etongamaki” to ekelamaki, na ebandeli ya nzela ya Yehova. Yehova Nzambe abandá te mpe azalaka ntango nyonso na bwanya. (Nzembo 90:1, 2) Bwanya na ye ezali na ebandeli te; ekelamaki te, etongamaki mpe te. ‘Ebotamaki’ te. Lisusu, balobi ete bwanya yango elobaka mpe esalaka makambo lokola moto.​—Masese 8:1.

Masese elobi ete banda kala bwanya ezalaki liboso ya Yehova, Mozalisi, lokola “kapita-mosali.” Na ntembe te, bwanya yango ezali Yesu. Lokola Yesu asalaki elongo na Yehova ntango molai mpenza liboso aya awa na mabelé, Liloba ya Nzambe elobi ete: “Ye azali liboso ya biloko mosusu nyonso mpe na nzela na ye biloko mosusu nyonso ezalisamaki.”​—Bakolose 1:17; Emoniseli 3:14.

Ebongi mpenza Mwana ya Nzambe abengama bwanya, mpamba te ye nde amonisaki mikano mpe bikateli ya bwanya ya Yehova. Liboso abotama lokola moto, Yesu azalaki Liloba to Molobeli ya Nzambe. (Yoane 1:1) Biblia ebengi ye “nguya ya Nzambe mpe bwanya ya Nzambe.” (1 Bakolinti 1:24, 30) Oyo nde lolenge kitoko ya kolobela Mwana ya Nzambe, oyo bolingo na ye mpo na bato etindaki ye akaba bomoi na ye mpo na kosikola bango!​—Yoane 3:16.

[Elilingi na lokasa 31]

“Nabotamaki naino [bangomba] efandisamaki te”