Mpo na nini nzambe atiki nzela na mabe?

TOZALI komona polele ete mabe mpe bampasi etondi mpenza na mokili. Bato mingi bazali kokufa na bitumba, ezala basivili to basoda. Koboma bato mpe mobulu ezali bipai nyonso. Mbala mosusu, outi kokutana na makambo ya kozanga bosembo kaka mpo ozali moto ya mposo mosusu to ya ekólo mosusu. Soki okanisi makambo nyonso ya mabe oyo ozali komona to oyo okutani na yango, na ntembe te okomituna, ‘Mpo na nini Nzambe atiki nzela na mabe?’

Bato bamitunaka motuna yango banda kala. Eleki sikoyo mbula soki 3600, Yobo, moto moko oyo asalelaki Nzambe na bosembo, atunaki boye: “Mpo na nini bato ya masumu bakobika?” (Yobo 21:7) Na siɛklɛ ya nsambo liboso ya ntango na biso (L.T.B), mosakoli Yilimia atungisamaki mpo na misala ya mabe oyo bato ya ekólo na ye bazalaki kosala; atunaki boye: “Mpo na nini nzela ya bato mabe ekolonga? Mpo na nini baoyo bakokosaka mingi bazali na esengo?” (Yilimia 12:1) Yobo mpe Yilimia bayebaki ete Nzambe azali sembo. Atako bongo, bamitunaki mpo na nini mabe ezali mingi. Mbala mosusu yo mpe omitunaka bongo.

Bato mosusu balobaka ete Nzambe nde alingi ete mabe mpe bampasi ezala. Basusu bamitunaka boye: ‘Soki Nzambe azali na nguya nyonso, azali sembo, mpe bolingo, mpo na nini asukisaka mabe mpe bampasi te? Mpo na nini atiki mabe ezala tii lelo oyo?’ Lisolo oyo elandi ekopesa biyano na mituna yango mpe na mituna mosusu ya ntina mingi.

[Maloba mpo na kolimbola eutelo ya bafɔtɔ na lokasa 3]

AP Photo/Adam Butler