Makambo oyo Yehova asakolaka ekokisamaka

“NGAI nazali Nzambe mpe mosusu azali te; ngai nazali Nzambe, mosusu azali lokola ngai te, oyo akosakola makambo na nsuka longwa na ebandeli, mpe longwa ntango na kala makambo masalemi naino te.” (Yisaya 46:9, 10) Maloba yango ezali ya Yehova, ye oyo azali na likoki ya kosakola makambo oyo ekoya.

Eyebani ete moto akoki te kosakola na bosikisiki makambo oyo ekoya. Lokola Biblia ezali buku ya bisakweli, yango esengeli kotinda bato nyonso ya mitema sembo báluka koyeba ntina oyo Biblia elobi ete Nzambe nde Mobandisi na yango. Tótalela bisakweli mosusu ya Biblia oyo esili kokokisama.

Bikólo ya ntango ya kala

Nzambe asakolaki ete Edome, Moaba, mpe Amona ekobebisama libela. (Yilimia 48:42; 49:17, 18; 51:24-26; Obadia 8, 18; Sefania 2:8, 9) Kolimwa ya bikólo yango emonisi ete bisakweli ya Liloba ya Nzambe ezali solo.

Bato mosusu bakoki koloba ete moto nyonso akoki kosakola ete ekólo moko, atako ezali na nguya, nsukansuka ekolimwa. Kasi, bato oyo balobaka bongo babosanaka ete Biblia esukaki kaka te na kosakola kolimwa ya bikólo yango. Na ndakisa, elobaki na bosikisiki ndenge oyo Babilone esengelaki kokwea. Biblia esakolaki ete Bamede nde bakolonga engumba yango, Sirise nde akozala mokonzi ya basoda yango, mpe ete ebale oyo ezalaki kobatela engumba yango ekokauka.​—Yisaya 13:17-19; 44:27–45:1.

Biblia ezalaki ntango nyonso kosakola te ete ekólo oyo ekokwea ekolimwa mpo na libela. Ntango Nzambe asakolaki ete bato ya Babilone bakolonga Yelusaleme, alobaki mpe ete engumba yango ekotongama lisusu, atako Babilone eyebanaki ete ezali engumba oyo etikaka baombo na yango te. (Yilimia 24:4-7; 29:10; 30:18, 19) Esakweli yango ekokisamaki mpe lelo oyo Bayuda bazali na ekólo na bango.

Longola yango, Yehova asakolaki ete Ezipito ekozala lisusu te ekólo oyo eleki makasi na mokili mobimba, kasi ete “na nsima ekozala na bafandi lokola na ntango ya kala.” Na nsima, ekólo yango ‘ekozala bokonzi ya lokumu te.’ (Yilimia 46:25, 26; Ezekiele 29:14, 15) Likambo yango mpe ekokisamaki. Lisusu, Yehova asakolaki ete ekólo Grɛsi ekozala lisusu ekólo ya nguya te, kasi alobaki te ete ekólo yango ekolimwa libela. Kolimwa ya bikólo oyo Yehova alobaki ete ekozala lisusu te mpe kozala ya bikólo oyo Yehova alobaki te ete ekolimwa libela ezali koteya biso nini? Ezali koteya biso ete Liloba ya Nzambe ezali na bisakweli ya solo oyo ebongi kotyela motema.

Makambo ya kokamwa

Ndenge touti komona yango, Yehova ayebisaki makambo mingi na oyo etali kokwea ya Babilone. Ndenge moko mpe, ntango asakolaki kokwea ya Tulo na nzela ya mosakoli Ezekiele, alobaki ete mabanga ya engumba yango, banzete mpe mabelé na yango ekobwakama “na kati ya mai.” (Ezekiele 26:4, 5, 12) Esakweli yango ekokisamaki na mobu 332 liboso ya ntango na biso (L.T.B.), ntango basoda ya Alesandala Monene babwakaki bitiká ya Tulo na mai mpo na kotonga nzela oyo ememaki na eteni ya engumba yango oyo ezalaki mwa esanga mpe bazwaki esanga yango.

Longola yango, esakweli oyo ezali na Danyele 8:5-8, 21, 22 ná 11:3, 4 elobelaki mpe makambo mingi na ntina na “mokonzi ya [Grɛsi].” Esakolaki ete ntango mokonzi yango akokóma makasi, akokufa mpe bokonzi na ye ekokabolama na biteni minei, oyo ekoyangelama na bakitani na ye te. Bambula koleka 200 na nsima, Alesandala Monene akómaki mokonzi ya nguya. Masolo ya kala emonisi ete akufaki na mbalakaka mpe bakonzi minei ya basoda na ye bakabolaki bokonzi na biteni minei​—bakitani na ye bayangelaki te.

Bato mosusu balobaka ete esakweli yango ekomamaki nsima ya kosalema ya makambo yango. Kasi, tótalela naino lisusu esakweli yango oyo ezali na mokanda ya Danyele. Soki totaleli yango lokola esakweli, tokomona ete makambo mikemike yango nyonso ezali mpenza kokamwisa. Kasi, soki totaleli yango kaka lokola lisolo moko oyo ekomamaki nsima ya kosalema ya makambo oyo elobeli, tokomona ete ezangi makambo mingi. Soki moto moko ya lokuta oyo azalaki na bomoi nsima ya Alesandala alukaki kokoma lisolo oyo ekomonana lokola esakweli, mpo na nini alobaki te ete nsima ya liwa ya Alesandala bana na ye mibale ya mibali bakoluka kozwa bokonzi mpe bakobomama? Mpo na nini alobaki te ete bambula mingi esengelaki koleka liboso ete bakonzi minei ya basoda ya Alesandala bákabola ekólo? Mpo na nini atángaki te nkombo ya mokonzi yango monene mpe ya bakonzi yango minei ya basoda?

Bato oyo balobaka ete bisakweli ya Biblia ekomamaki nsima ya kosalema ya makambo oyo elobeli, bakanisaka bongo mpamba te, kozanga ete bátalela bilembeteli, bamonaka ete moto akoki te kosakola makambo oyo ekoya. Lokola bandimaka te ete Biblia ezali Liloba ya Nzambe, balukaka kolimbola makambo nyonso na ndenge ya bomoto. Nzokande, na bwanya na ye, Nzambe ayebisaki makambo mingi na bisakweli oyo ezali na Biblia mpo na komonisa ete eutaki epai na ye.a

Bisakweli ya Biblia ekoki kolendisa kondima na yo soki ozwi ntango ya kokanisa na bisakweli yango mosusu mpe ndenge oyo ekokisamaki. Tolendisi yo oyekola bisakweli ya Biblia. Bitanda oyo ezali na nkasa 343 tii 346 na buku “Makomami nyonso mapemami na Nzambe mpe mazali na litomba” ekosalisa yo mpo na yango.b Soki ondimi kosala yango, zalá na mokano ya kolendisa kondima na yo. Kokende mbangumbangu te, kaka mpo na kosilisa kotánga. Kasi, kanisá mozindo na likambo oyo ete soki Yehova asakoli likambo, ezangaka te kokokisama.

[Maloba na nse ya lokasa]

[Etanda/​Elilingi na lokasa 24]

MITINDA OYO ESALISAKA NA BOMOI

Ezali mpe na makambo mosusu oyo osengeli kokanisa na yango. Nzambe oyo asakolaki na bosikisiki bikólo oyo esengelaki kokóma bikólo oyo eleki na nguya mpe kokwea na yango azali mpe Mopesi ya mitinda oyo ekoki kosalisa biso na bomoi. Mitinda yango mosusu yango oyo:

Okobuka oyo ozali kolona.​—Bagalatia 6:7.

Esengo ya kopesa eleki esengo ya kozwa.​—Misala 20:35.

Mpo moto azala na esengo asengeli kokokisa bamposa na ye ya elimo.​—Matai 5:3.

Soki osaleli mitinda yango na bomoi na yo, okomona ete ezali mpenza solo.

[Bililingi na lokasa 22, 23]

Liloba ya Nzambe esakolaki ete bikólo oyo ekolimwa libela . . .

EDOME

BABILONE

. . . kasi bikólo oyo te

GRƐSI

EZIPITO

[Eutelo ya bafɔtɔ]

Pictorial Archive (Near Eastern History) Est.

Fɔtɔ ya Edouard Boubat mpo na OMS

[Elilingi na lokasa 23]

Alesandala Monene