Mituna ya batángi

Ntoma Paulo alobaki ete “Yisalaele mobimba ekobikisama.” (Lom. 11:26) Alingaki nde koloba ete Bayuda nyonso bakokóma baklisto?

Te, alingaki koloba bongo te. Ekólo mobimba ya bato oyo bazalaki bakitani ya Abalayama baboyaki kondima Yesu lokola Masiya. Na bambula oyo elandaki liwa ya Yesu, emonanaki polele ete Bayuda nyonso te nde bakobongwana mpo na kokóma baklisto. Atako bongo, Paulo alobaki solo ete “Yisalaele mobimba ekobikisama.” Na ndenge nini?

Yesu alobaki na bakonzi ya mangomba ya Bayuda ya ntango na ye boye: “Bokonzi ya Nzambe ekolongolama epai na bino mpe ekopesama na ekólo moko oyo ekobota bambuma na yango.” (Mat. 21:43) Lokola ekólo Yisalaele eboyaki kondima Yesu, Yehova atyaki likebi na ye na ekólo moko ya sika, ekólo ya elimo. Paulo abengaki yango “Yisalaele ya Nzambe.”​—Gal. 6:16.

Bavɛrsɛ mosusu ya Makomami ya Grɛki ya boklisto emonisi ete “Yisalaele ya Nzambe” esangisi baklisto 144 000, bapakolami na elimo. (Lom. 8:15-17; Emon. 7:4) Emoniseli 5:9, 10 emonisi ete bato mosusu oyo bazali Bayuda te bakozala na kati ya etuluku yango, mpamba te elobi ete baklisto bapakolami bauti “na mabota nyonso mpe na minɔkɔ nyonso mpe na mikili nyonso mpe na bikólo nyonso.” Basangani ya Yisalaele ya elimo baponami libosoliboso mpo na kozala “bokonzi mpe banganga-nzambe . . . , mpe basengeli koyangela mabelé.” Atako Yehova aboyaki ekólo Yisalaele, bato ya ekólo yango oyo balingi bakokaki kozongisa boyokani elongo na Nzambe. Bantoma mpe baklisto mosusu ya ekeke ya liboso basalaki bongo. Bayuda yango, ndenge moko na bato ya bikólo mosusu, basengelaki kosombama na makila ya Yesu Klisto.​—1 Tim. 2:5, 6; Ebe. 2:9; 1 Pet. 1:17-19.

Atako Bayuda mingi na ekeke ya liboso babungisaki libaku ya koyangela elongo na Yesu, yango ebebisaki mokano ya Nzambe te. Mokano ya Nzambe ekokaki kobeba te mpamba te Yehova alobaki na nzela ya mosakoli na ye ete: “Boye na liloba oyo ekobima na monɔkɔ na ngai; [ekozonga] epai na ngai mpamba te, kasi ekosukisa oyo ekani ngai, ekolonga na likambo litindaki ngai yango.”​—Yis. 55:11.

Maloba yango emonanaki solo na oyo etali mokano ya Nzambe ya kopona bato 144 000 mpo báyangela elongo na Mwana na ye na likoló. Biblia emonisi polele ete Nzambe akopakola bato 144 000. Ata moko te akozanga!​—Emon. 14:1-5.

Na yango, ntango Paulo akomaki ete “Yisalaele mobimba ekobikisama,” alingaki koloba te ete Bayuda nyonso bakokóma baklisto. Kasi, alingaki nde koloba ete mokano ya Nzambe ya kopona bato 144 000, Bayisalaele ya elimo, mpo báyangela na likoló elongo na Mwana na ye Yesu Klisto, ekokokisama mpenza. Na ntango oyo Nzambe abongisi, bato yango nyonso, “Yisalaele mobimba,” bakobikisama mpe nsukansuka bakoyangela lokola bakonzi mpe banganga-nzambe na Bokonzi ya Masiya.​—Ef. 2:8.

[Bililingi na lokasa 28]

Bapakolami bauti “na mabota nyonso mpe na minɔkɔ nyonso mpe na mikili nyonso mpe na bikólo nyonso”