Oyo nde ntango ya kopona

“Nzambe azalisaki moto na elilingi na ye mpenza, na elilingi ya Nzambe azalisaki ye; azalisaki bango mobali mpe mwasi.”​—Genese 1:27.

MALOBA wana ya ebandeli ya Biblia emonisi moko ya misala minene oyo Nzambe ‘asalaki kitoko na ntango na yango’​—kokelama ya Adama ná Eva, mobali mpe mwasi oyo bazalaki bato ya kokoka. (Mosakoli 3:11) Mozalisi na bango Yehova Nzambe alobaki na bango boye: “Bóbotaka mpe bózala na kobota mingi, mpe bótondisa mokili mpe bótya yango na nse na bino; mpe bózala na bokonzi na likoló ya mbisi na mai, mpe ya ndɛkɛ na likoló, mpe likoló ya nyama nyonso ya bomoi ekotambolaka na mokili.”​—Genese 1:28.

Na maloba wana, Nzambe ayebisaki mwasi mpe mobali ya liboso mokano na ye. Basengelaki kobota bana mpe kobatela mabelé, kokómisa yango paladiso mpo na bango moko mpe bana na bango. Ekanamaki te ete bakozala na bomoi mikolo boye mpe bakokufa nsima ya mikolo boye. Nzokande, Nzambe apesaki bango elikya moko kitoko. Soki báponaka malamu mpe bákobaka kozala na boyokani malamu na Nzambe, balingaki kozala na kimya ya solosolo mpe esengo mpo na libela.

Baponaki mabe mpe mpo na yango, bato nyonso bakómá konuna mpe kokufa. Yango wana, Yobo alobaki ete: “Moto oyo abotami na mwasi azali na mikolo mingi te mpe atondi na mpasi.” (Yobo 14:1) Likambo nini ya mabe esalemaki?

Biblia elobi ete: “Lisumu ekɔtaki na mokili mpo na moto moko mpe liwa mpo na lisumu, ndenge moko mpe liwa epalangani epai ya bato nyonso mpamba te bango nyonso basalaki lisumu.” (Baloma 5:12) “Moto” wana ezali Adama, oyo abukaki na nko mobeko ya Nzambe oyo ezalaki kilo te. (Genese 2:17) Lokola aponaki mabe, Adama abungisaki libaku ya kozala na bomoi libela na libela na paladiso awa na mabelé. Abungisaki mpe libula kitoko ya bana na ye mpe atikelaki bango lisumu mpe liwa. Emonanaki ete elikya ezalaki te. Ezalaki bongo?

Ntango ya kozongisa makambo nyonso ya sika

Bankóto ya bambula na nsima, mokomi ya nzembo akomaki na lisalisi ya elimo santu ete: “Bayengebene bakosangola mokili mpe bakofanda wana libela.” (Nzembo 37:29) Mpo na komonisa ete elaka oyo apesamaki na Edene ekokokisama, Liloba ya Nzambe elobeli makambo oyo akosala mosika te ete: “Akopangwisa mpisoli nyonso na miso na bango, mpe liwa ekozala lisusu te, ná mawa ná koganga ná mpasi ekozala lisusu mpe te. Makambo ya kala esili koleka.” Na nsima, Nzambe ye moko alobi boye: “Talá! Nazali kosala biloko nyonso biloko ya sika.”​—Emoniseli 21:4, 5.

Lokola likambo na likambo ezali na ntango na yango, motuna ya ntina yango oyo: Ntango nini makambo nyonso ekozonga ya sika, mpo bilaka kitoko ya Nzambe ekokokisama? Batatoli ya Yehova, babimisi ya zulunalo oyo, bazali kosala nyonso mpo na kosalisa bato báyeba ete tozali na eleko oyo Biblia ebengi “mikolo ya nsuka” mpe ete ntango oyo Nzambe ‘akosala biloko nyonso ya sika’ ekómi pene. (2 Timote 3:1) Tozali kolendisa yo oyekola Biblia mpo oyeba bilaka kitoko oyo ekoki kokokisama mpe mpo na yo. Tozali mpe kolendisa yo ondima libyangi oyo ete: “Bóluka [Yehova] naino akoki komonana, bóbyanga ye naino abɛlɛmi penepene.” (Yisaya 55:6) Na esika okanisa ete bomoi na yo etángamá, yebá ete elikya na yo ya kozala na bomoi ya seko ezali na mabɔkɔ na yo moko!

[Likanisi ya paragrafe na lokasa 8]

“Talá! Nazali kosala biloko nyonso biloko ya sika”