Mokanda euti na Irlande

Nazalaki koluka moto moko

MOKOLO yango ezalaki mpenza malili. Mwa matangá ya mbula ezalaki kokwea na bavitre ya motuka mpe ezalaki kopekisa ngai namona bamboka malamumalamu. Nsima ya kotambola kilomɛtrɛ 16, nakómaki na ngomba moko mpe nazalaki komona na mosika Westport, mwa engumba oyo ezali pembeni ya mbu na wɛsti ya Irlande. Na nsima, moi ebimaki mpe ekaukisaki mai oyo ezalaki na bavitre ya motuka mpe nakokaki sikoyo komona mwa bisanga yango malamu. Bisanga mingi ezalaka na bato te, kasi basali-bilanga bakendeke koleisa banyama na bango na bisanga yango mosusu.

Pembenipembeni ya mbu, bangomba ekendá mosika tii na wɛsti. Banzete ndenge na ndenge ebotá na bangomba yango mpe nsima ya nzanga bangomba yango ezalaki kongɛnga lokola kwivre. Na mosika, nazalaki komona ngomba Croagh Patrick, oyo bato ya mboka yango babengaka Reek. Nakɔtaki na mwa engumba Westport oyo ezalaka na bato ebele, nalekaki na mwa banzela na yango ya nkaka, nalekaki ngomba Reek, mpe nakómaki na mboka moko oyo Batatoli ya Yehova bazalaki kokóma mingi te.

Moto oyo nakendeki koluka ayebaki te ete nakokende kotala ye. Nazwaki mokanda moko oyo elobaki ete moto yango alongwaki esika azalaki mpe ete azali na mposa ya kokoba koyekola Biblia na Batatoli ya Yehova. Namitunaki: ‘Moto yango azali na mbula boni? Azali monzemba to abalá? Makambo nini alingaka?’ Nabwakaki liso na sakosi na ngai mpo natala soki nazali na Biblia mpe mikanda oyo elimbolaka yango. Nakanisaki makambo oyo nakoki koloba mpo na kokolisa mposa na ye ya koyeba nsango ya Bokonzi.

Ngomba Reek etikalaki nsima na ngai. Bifelo ya mabanga, oyo mingi na yango etongamaki na eleko ya nzala makasi oyo ezalaki na ekeke ya 19, etandamaki na bilanga oyo baloná te mpe ekendá tii na mbu. Mwa liboso, namonaki ndɛkɛ moko (mouette) ezali kopumbwa malɛmbɛmalɛmbɛ. Na mosika, namonaki banzete mibale oyo egumbamá lokola mokɔngɔ ya mobange.

Na mboka yango, banimero ya bandako mpe bankombo ya babalabala ezalaka te. Adrɛsi ya moto oyo nazalaki koluka ezalaki kaka na nkombo ya ndako mpe ya mboka.a Kasi, likanisi na ngai ezalaki ya kokutana na moto oyo asalaka na posita oyo ayebi esika moto mokomoko ya mboka yango afandaka. Miniti 30 na nsima, nakómaki na biro ya posita. Na porte, bakomaki ete: “Tokangi.” Lokola biro yango ezalaki ya kokangama, natunaki moto moko oyo azalaki kotɛka na butiki mpe alakisaki ngai ngámbo oyo nasengelaki kokende.

Nsima ya kotambola lisusu kilomɛtrɛ 8, nakómaki esika alakisaki ngai​—esika nzela ebukisá na lobɔkɔ ya mobali, mpe mwa nzela moko ekendá na lobɔkɔ ya mwasi. Nabɛtaki na porte ya ndako moko oyo ezalaki pembeni wana. Mwasi moko ya mobange abimaki mpe alobaki na ngai na lolendo nyonso ete afandaka wana banda kala kasi ayebi te epai moto oyo nazalaki koluka afandaka. Alobaki ete abenga naino na telefone bongo akokɔtisa ngai na ndako.

Ntango azalaki kosolola, miso na ye ezalaki kaka epai na ngai, na ntembe te azalaki komituna soki nazali nani mpe nalingi nini. Namonaki mwa ekeko moko ya Ngɔndɔ Malia na porte na ye mpe elilingi moko monene ya Yesu na efelo. Sapɛlɛ ezalaki likoló ya mesa moko na kuku. Mpo na kokitisa ye motema, nayebisaki ye ete, “Baninga ya moto yango batindi ngai nayebisa ye nsango moko ya ntina mingi.”

Mobali na ye ayaki esika tozalaki mpe abandaki kobɛtela ngai masolo ya mboka na bango. Ntango tozalaki kosolola, mwasi wana abengaki moto ya liboso, kasi ezalaki ye te, mpe ayebisaki ngai nazela abenga bato mosusu. Emonanaki ete ata moto moko te ayebaki moto oyo nazalaki koluka mpe ndako na ye. Natalaki montre na ngai mpe namonaki ete ngonga epusanaki mpenza. Namonaki ete nakoya koluka ye mokolo mosusu. Napesaki bango mersi ndenge basalisaki ngai, nakɔtaki na motuka, mpe nabandaki kozonga.

Nakendaki lisusu koluka moto yango na pɔsɔ oyo elandaki. Na mbala oyo, nakutanaki na moto ya posita mpe ayebisaki ngai ndenge nakokaki kosala mpo namona moto yango. Miniti 15 na nsima, nakómaki esika nzela ekabwaná, ndenge moto yango alobaki. Nakendaki na lobɔkɔ ya mwasi, mpe nabalukaki mbala ebele na mwa nzela oyo ezalaki wana; nazalaki koluka gbagba moko ya kala ya mabanga. Namonaki yango te. Nsukansuka, namonaki esika mosusu oyo bayebisaki ngai, mpe kuna, likoló ya ngomba namonaki ndako oyo nabomaki nzoto mpo na koluka yango.

Nakanisaki mwa moke ndenge nakoyebisa ye nsango malamu. Mobali moko ya mobange afungolaki porte. Alobaki boye: “Mawa, ndako oyo ozali koluka yango wana kuna.” Alakisaki ngai ndako moko oyo ebombamaki na kati ya banzete. Na esengo nyonso, nakendaki kuna mpe nabɛtaki na porte. Ntango nazalaki kozela, nazalaki kotala Mbu ya Atlantique, oyo ezalaki mosika te. Mopɛpɛ ezalaki makasi mpe mbonge ezalaki kobɛta na libongo. Moto moko te azalaki pembeni wana ezala mpe na ndako oyo nazalaki kobɛta.

Nakendaki lisusu kuna mbala mibale liboso nakutana na elenge moko ya mobali. Elenge yango alobaki na ngai ete: “Ndako yango, yango oyo, kasi moto oyo ozali koluka azalaka lisusu awa te, alongwá mpe nayebi esika akendá te.” Nayebisaki elenge yango ntina oyo nazalaki koluka moto yango mpe namonaki ete asololá naino na Batatoli ya Yehova te. Bayibaki biloko na ye mpe azalaki komituna mpo na nini Nzambe atikaki báyiba ye mpe apesaki nzela na makambo mosusu ya mabe. Andimaki mbala moko bazulunalo Linɔ́ngi ya Mosɛnzɛli mpe Lamuká! oyo elobelaki makambo yango.

Biblia elobi ete tosengeli koluka bato oyo bazali na mposa ya koyeba solo. Likambo ya mawa, nakutanaki te na moto oyo nazalaki koluka. Atako bongo, nakanisaka ata moke te ete nasalaki mosala ya mpunda. Na Irlande, bato mingi bazali na mposa ya koyoka nsango ya Bokonzi, mpe na lisalisi ya Yehova, mwa mboto ya solo oyo nalonaki epai ya elenge mobali wana, ekoki kobota mbuma mokolo mosusu.

[Maloba na nse ya lokasa]