3 Yekolá solo na ntina na Yesu

“Nzambe alingaki mokili mingi na boye ete apesaki Mwana na ye mobotami-se-moko, mpo moto nyonso oyo azali komonisa kondima na kati na ye abomama te kasi azala na bomoi ya seko.”​—Yoane 3:16.

MOKAKATANO EZALI NINI? Bato mosusu bakoki kotinda yo okanisa ete Yesu azalaki moto ya solo te. Basusu bandimaka ete Yesu azalaki moto ya solo, kasi balobaka ete azalaki kaka moto lokola bato nyonso mpe akufá banda kala.

NDENGE NINI OKOKI KOLONGA MOKAKATANO YANGO? Mekolá ndakisa ya moyekoli Natanaele.a Moninga na ye Filipo ayebisaki ye ete amoni Masiya​—“Yesu, mwana ya Yozefe, moto ya Nazalete.” Nzokande, Natanaele andimaki maloba ya Filipo mbala moko te. Kutu, alobaki boye: “Likambo ya malamu ekoki nde kobima na Nazalete?” Atako atyaki ntembe, andimaki ntango Filipo ayebisaki ye ete “yaká komona” yo moko. (Yoane 1:43-51) Okozwa matomba soki yo moko otaleli na mozindo makambo etali Yesu. Okoki kosala nini?

Talelá masolo ya kala oyo emonisi ete Yesu azalaki moto ya solo. Josèphe ná Tacite bazalaki bato minene ya istware oyo bazalaki na bomoi na ekeke ya liboso, kasi bazalaki baklisto te. Balobaki ete Yesu Klisto azalaki mpenza na bomoi awa na mabelé. Mpo na kolobela ndenge Amperɛrɛ Néron afundaki baklisto ete batumbaki engumba Loma na mobu 64 ya ntango na biso (T.B.), Tacite akomaki boye: “Néron alobaki ete foti ezali na motó ya bato oyo bazalaki kobengama baklisto, oyo bato bazalaki koyina mpo na makambo na bango ya mabe mpenza, mpe anyokolaki bango na ndenge ya nsɔmɔ. Nkombo baklisto euti na Klisto, oyo anyokwamaki makasi na mabɔkɔ ya Ponsi Pilato, moko ya baguvɛrnɛrɛ na biso, ntango Tibɛli azalaki mokonzi.”

Mpo na makambo oyo bato ya istware ya ekeke ya liboso mpe ya mibale balobaki mpo na Yesu mpe baklisto ya liboso, buku moko (Encyclopædia Britannica, ebimeli ya 2002) elobi boye: “Masolo yango oyo ekomamaki na bato oyo bazalaki baklisto te ezali komonisa ete na ntango ya kala, ata banguna ya lingomba ya boklisto bazalaki kotya ntembe te ete Yesu azalaki mpenza awa na mabelé, kasi ntembe ezangá ntina mpo na likambo yango ebandaki na nsuka ya ekeke ya 18, na ekeke ya 19 mpe na ebandeli ya ekeke ya 20.” Na 2002, lisolo moko oyo ebimaki na zulunalo moko (The Wall Street Journal) elobaki ete: “Bato mingi ya mayele, longola kaka mwa ndambo ya bato oyo bandimaka te ete Nzambe azali, basili kondima ete Yesu moto ya Nazalete azalaki mpenza na bomoi.”

Talelá makambo oyo emonisi ete Yesu asekwaki mpenza. Ntango banguna ya Yesu bakangaki ye, baninga na ye basundolaki ye mpe moninga na ye Petelo awanganaki ye mpo abangaki bato. (Matai 26:55, 56, 69-75) Ntango bakangaki Yesu, bayekoli na ye bapanzanaki. (Matai 26:31) Nzokande, mwa moke na nsima, bayekoli na ye bakómaki na molende makasi. Petelo ná Yoane balobaki na mpiko liboso ya bato oyo basalaki likita mpo na koboma Yesu. Bayekoli ya Yesu bakómaki na molende mingi, yango wana bapalanganisaki mateya na ye na Ampire ya Loma mobimba; bandimaki ata kokufa na esika ya kowangana bindimeli na bango.

Nini esalaki ete bayekoli bákóma na mpiko ndenge wana? Ntoma Paulo alobaki ete Yesu asekwaki mpe “abimelaki Kefa [Petelo], mpe na nsima bazomi na mibale.” Paulo abakisaki ete: “Na nsima na yango abimelaki bandeko koleka nkama mitano na mbala moko.” Bato mingi oyo bamonaki Yesu ntango asekwaki bazalaki naino na bomoi ntango Paulo akomaki maloba wana. (1 Bakolinti 15:3-7) Bato ya ntembe bakoki koboya kondima litatoli ya moto moko to ya bato mibale. (Luka 24:1-11) Kasi, litatoli ya bato koleka nkama mitano oyo bamonaki Yesu ntango asekwaki ezalaki elembeteli monene ete Yesu asekwaki mpenza.

MBANO NINI OKOZWA? Baoyo bandimelaka Yesu mpe batosaka ye, masumu na bango ekolimbisama mpe bakozala na lisosoli ya pɛto. (Malako 2:5-12; 1 Timote 1:19; 1 Petelo 3:16-22) Soki bakufi, Yesu alaki ete akosekwisa bango “na mokolo ya nsuka.”​—Yoane 6:40.

Mpo na koyeba makambo mosusu, talá mokapo 4, “Yesu Klisto azali nani?,” mpe mokapo 5, “Lisiko​—Likabo ya Nzambe oyo eleki makabo nyonso,” na buku Biblia eteyaka mpenza nini?b

[Maloba na nse ya lokasa]

[Elilingi na lokasa 7]

Na ndakisa ya Natanaele, luká koyeba makambo oyo emonisi ete Yesu azalaki mpenza moto