Pusaná penepene na Nzambe
Ayebi ndelo na biso
MWASI moko alobaki boye mpo na milende oyo azalaki kosala mpo na kosepelisa Nzambe: “Nasalaka mpenza makasi, kasi namonaka kaka ete nakoki te.” Yehova andimaka milende oyo basaleli na ye basalaka mpo na kosepelisa ye? Atalaka makoki mpe makambo ya bomoi na bango? Mpo na kozwa eyano na mituna yango, tótalela oyo Mibeko ya Moize elobaki mpo na makabo mosusu, ndenge ezali na Levitike 5:2-11.
Na Mibeko ya Moize, Nzambe asɛngaki bambeka ndenge na ndenge mpo na bolimbisi ya masumu. Bandakisa oyo ezali awa elobeli moto oyo asali lisumu kozanga kokana to koyeba. (Vɛrsɛ 2-4) Ntango ayebi likambo yango, asengelaki koyambola lisumu na ye mpe kopesa mbeka ya ekweli—“mwana ya mpate to ntaba.” (Vɛrsɛ 5, 6) Kasi, ezali boni soki moto yango azali mobola mpe azangi mwana mpate to ntaba mpo na kopesa mbeka? Mobeko elobaki ete asengeli kodefa nyama yango mpe kokɔta nyongo? Asengelaki nde kosala mosala tii akozwa mbongo ya kosomba nyama yango, mpe kozelisa bolimbisi ya masumu na ye?
Mpo na komonisa bolingo ya Yehova, Mobeko elobaki boye: “Kasi soki na ntina na bobola ye akoki kopesa mwana ya mpate te, mbɛ mpo na mbeka ya ekweli na ye akoya na bibenga mibale to na bana na bibenga mibale.” (Vɛrsɛ 7) Maloba “soki . . . akoki kopesa mwana ya mpate te” ekoki mpe kobongolama na “soki . . . lobɔkɔ na ye ekoki kozwa te.” Soki Moyisalaele azali mobola mpenza mpe akoki kozwa mwana ya mpate te, Nzambe azalaki kondima eloko oyo moto yango akokaki kopesa—bibenga mibale to bana ya bibenga mibale.
Kasi, ezali boni soki moto yango azalaki ata na likoki te ya kozwa bandɛkɛ yango mibale? Mobeko elobaki boye: “Mpo na mbeka mpo na lisumu esali ye, akoya na ndambo moko ya zomi ya efa moko ya mfufu [kɔpɔ mwambe to libwa] etutami mokemoke mpo na mbeka ya lisumu.” (Vɛrsɛ 11) Mpo na moto oyo azalaki mobola mpenza, Yehova azalaki kondima apesa mbeka oyo ezangi makila.a Na Yisalaele, bobola ezalaki kopekisa moto moko te kozwa bolimbisi ya masumu to likoki ya kozongisa kimya na Nzambe.
Mobeko mpo na mbeka ya ekweli eteyi biso nini mpo na Yehova? Azali Nzambe ya mawa, oyo ayebi makoki ya basambeli na ye. (Nzembo 103:14) Alingaka tópusana penepene na ye mpe tózala na boyokani malamu na ye ata soki makambo mosusu, na ndakisa bobange, maladi, mikumba ya libota to mikumba mosusu, ezali kopekisa biso tósala mingi. Koyeba ete Yehova Nzambe asepelaka ntango tozali kosala nyonso oyo tokoki na mosala na ye, ekitisaka biso mpenza motema.
[Maloba na nse ya lokasa]
a Motuya ya mbeka mpo na bolimbisi ya masumu ezalaki na makila ya nyama yango, oyo ezalaki mosantu na miso ya Nzambe. (Levitike 17:11) Yango elingi nde koloba ete mbeka ya mfufu oyo mobola azalaki kopesa ezalaki na ntina te? Te. Yehova azalaki komona kaka mbeka yango te, kasi azalaki nde kotala elimo ya komikitisa mpe ya malamu oyo moto yango azalaki komonisa. Lisusu, masumu ya ekólo mobimba, ata mpe ya babola ezalaki kolimbisama na makila ya banyama oyo bazalaki kopesa Nzambe na mokolo ya mbɔndi oyo ezalaki kosalema mbula na mbula.—Levitike 16:29, 30.