Ezali na makambo oyo ekoki kosepelisa bino

BANDA na selile oyo eleki moke tii na bagalaksi mineneminene oyo esangisamá na maboke ya mike mpe ya minene, biloko oyo ezalisamá ebongisamá malamu. Ezali mpenza likambo ya kokamwa te, mpo Mozalisi ‘azali Nzambe ya mobulu te.’ (1 Ko. 14:33) Ndenge oyo Nzambe abongisá makambo mpo na losambo na ye ezali mpe kokamwisa. Tótala makambo oyo Yehova asalá. Asalá ebongiseli moko na molɔ́ngɔ́ mobimba oyo ezali na bamilio na bamilio ya bikelamu ya mayele​—bato na mabele mpe baanzelu—​oyo bazali na bonsomi ya kopona mpe basangani na losambo ya pɛto. Ezali mpenza likambo ya kokamwa!

Na Yisraele ya kala, Yerusaleme, epai tempelo ya Yehova ezalaki mpe epai mokonzi azalaki kofanda, ezalaki komonisa eteni ya ebongiseli ya Nzambe awa na mabele. Moyisraele moko oyo amemamaki moombo na Babilone amonisaki mayoki na ye mpo na engumba mosantu na maloba oyo: “Lolemo na ngai ekangama na edáda na ngai, soki nakanisi yo te, soki natomboli Yerusaleme te koleka eloko ya liboso oyo esepelisaka ngai.”​—Nz. 137:6.

Yo mpe oyokaka bongo mpo na ebongiseli ya Nzambe lelo? Epesaka yo esengo koleka eloko mosusu nyonso? Bana na yo bayebi lisolo ya eteni ya ebongiseli ya Nzambe awa na mabele mpe ndenge ebongiseli yango etambolaka? Bayebi mpe basepelaka ndenge bazali na lisangá ya bandeko oyo bazali Batatoli ya Yehova na mokili mobimba? (1 Pe. 2:17) Mpo na nini te kosalela makanisi oyo ezali awa na nse na mpokwa oyo bosalaka Losambo na libota mpo libota na bino eyeba malamu mpe esepela mingi koleka na ebongiseli ya Yehova?

Koyebisa misala ya “mikolo ya kala”

Mbula na mbula, mabota ya Bayisraele bazalaki kosala fɛti ya Elekeli. Ntango fɛti yango etyamaki, Moize apesaki bato malako oyo: “Soki, na nsima, mwana na yo akotuna yo ete: ‘Likambo oyo elimboli nini?’ bongo osengeli koloba na ye ete: ‘Yehova abimisaki biso na Ezipito, na ndako ya boombo, na nguya ya lobɔkɔ na ye.’” (Kob. 13:14) Mabota ya nsima esengelaki te kobosana makambo oyo Yehova asalelaki Bayisraele kala. Ntembe ezali te ete batata mingi ya Bayisraele batosaki mitindo ya Moize. Bambula mingi na nsima, Moyisraele moko abondelaki boye: “Ee Nzambe, toyoki na matoi na biso, bankɔkɔ na biso bayebisi biso mosala oyo osalaki na mikolo na bango, na mikolo ya kala.”​—Nz. 44:1.

Mpo na bilenge lelo, makambo oyo Batatoli ya Yehova basalaki eleki sikoyo mbula 100 to koleka ekoki komonana lokola misala ya “mikolo ya kala.” Ndenge nini okoki kosalisa bana na yo bámona ete makambo yango ezali mpenza solo? Mpo na kosala yango, baboti mosusu basalelaka buku Les Témoins de Jéhovah : Prédicateurs du Royaume de Dieu, Annuaire, masolo ya bomoi oyo ebimaka na bazulunalo na biso, mpe balapolo mosusu oyo elobelaka lisolo ya Batatoli ya Yehova, na ndakisa DVD na biso ya sika oyo elobeli basaleli ya Nzambe na ntango na biso. Bavideo oyo elobeli minyoko ya bandeko na biso na bamboka oyo kala ezalaki Union soviétique mpe na Allemagne na ntango ya Banazi eteyaka mabota ete basengeli kotyela Yehova motema na ntango ya komekama. Bósalela mpe biloko ya ndenge wana na mpokwa oyo bosalaka Losambo na libota. Ekosalisa bana na yo bázala na kondima makasi ntango bosembo na bango emekami.

Nzokande, bana baumelaka kobaye te ntango bazali koyoka lisolo ya makambo eleká. Na yango, luká mpe kolobisa bana na yo. Na ndakisa, okoki kosɛnga mwana na yo ya mobali apona ekólo moko oyo alingi, asala bolukiluki mpo na koyeba ndenge lisolo ya Batatoli ya Yehova ebandaki na ekólo yango, mpe ayebisa libota mobimba makambo mosusu oyo ayekoli na likambo yango. Na lisangá na bino, ekoki kozala na bakristo oyo basaleli Nzambe na bosembo bambula mingi, mpe okoki kobenga bango báya na mpokwa moko oyo bosalaka losambo na libota. Mbala mosusu mwana na yo ya mwasi akoki kotuna bango mituna mpe kosɛnga bango bálobela makambo oyo bango moko bakutanaki na yango. To okoki kosɛnga mwana asala mayemi ya makambo minene oyo esalemá na losambo na biso, na ndakisa ndenge Betele moko etongamaki, ya makambo oyo esalemaki na liyangani moko oyo esangisaki mikili mingi, to ndenge bazalaki kosalela fono na mosala ya kosakola ndako na ndako.

Koyekola ndenge “eteni moko moko ezali kosala mosala na yango”

Ntoma Paulo akokanisaki lisangá ya bokristo na “nzoto [oyo] ekangamá . . . malamu, pe misisa esimbá nzoto mobimba. Eteni moko moko ezali kosala mosala na yango, pe nzoto mobimba ezali kokola pe kokóma makasi na bolingo.” (Ef. 4:16, Bible na lingala ya lelo oyo) Koyekola ndenge nzoto ya moto esalaka, ebakisaka botɔndi mpe limemya na biso epai ya Mozalisi na biso. Ndenge moko mpe, ntango tozali kotalela ndenge lisangá ya mokili mobimba etambolaka, tokamwaka “bwanya ya Nzambe oyo ezali ndenge na ndenge mpenza.”​—Ef. 3:10.

Yehova alimboli ndenge ebongiseli na ye esalaka. Na ndakisa mpo na ndenge eteni ya likoló esalaka, ayebisi biso ete apesaki Yesu Kristo emoniseli, mpe Yesu “atindaki anzelu na ye mpe na nzela na ye, amonisaki yango na bilembo epai ya moombo na ye Yoane, oyo atatolaki.” (Em. 1:1, 2) Soki Nzambe ayebisi ndenge eteni ya ebongiseli na ye oyo emonanaka te etambolaka, akolinga te ete tóyeba ndenge “eteni moko moko ezali kosala mosala na yango” awa na mabele?

Na ndakisa, soki mosika te mokɛngɛli ya zongazonga akoya kotala lisangá na bino, mpo na nini te kolobela na libota na bino misala mpe mikumba ya bakɛngɛli-batamboli? Ndenge nini basalisaka mokomoko na biso? Bokoki mpe kotalela mituna lokola oyo: Mpo na nini kopesa lapolo ya mosala ya kosakola ezali na ntina? Mbongo oyo etambwisaka ebongiseli ya Nzambe eutaka wapi? Ndenge nini Lisangani ya Mikóló-Bakambi ebongisamá, mpe ndenge nini epesaka biso bilei ya elimo?

Soki toyebi ndenge eteni ya ebongiseli ya Yehova awa na mabele etambolaka, tokozwa matomba soki misato: Botɔndi na biso mpo na baoyo basalaka mosala makasi mpo na bolamu na biso ekobakisama. (1 Tes. 5:12, 13) Tokolinga kolanda bibongiseli oyo ezali kozwama na lisangá ya Nzambe. (Mis. 16:4, 5) Mpe tokobanda kotyela baoyo bazali kokamba biso motema mingi koleka, wana tozali komona ndenge bazali kozwa bikateli mpe bibongiseli na kolanda Makomami.​—Ebr. 13:7.

“Bótala malamumalamu bandako milai na yango ya kofanda”

“Bótambola zingazinga ya Siona mpe bóbaluka zingazinga na yango, bótánga bandako na yango ya milai. Bótya mitema na bino na mwa ngomba na yango oyo basalá mpo na libateli. Bótala malamumalamu bandako milai na yango ya kofanda, mpo bóyebisa yango na mabota oyo ekoya na nsima.” (Nz. 48:12, 13) Awa, mokomi ya nzembo alendisaki Bayisraele bátala Yerusaleme malamumalamu. Okoki kokanisa makambo kitoko oyo mabota ya Bayisraele babombaki na makanisi ntango basalaki mibembo na engumba mosantu mpo na bafɛti ya mbula na mbula mpe bamonaki tempelo na yango kitoko? Na ntembe te, etindaki bango ‘báyebisa yango na mabota oyo ekoya na nsima.’

Kanisá mokonzi-mwasi ya Sheba, oyo liboso aboyaki kondima bansango oyo ayokaki mpo na kitoko ya bokonzi ya Salomo mpe bwanya oyo azalaki na yango. Nini endimisaki mwasi yango ete makambo oyo ayokaki ezalaki solo? Alobaki boye: “Nandimaki maloba yango te kino nayei komona na miso na ngai moko.” (2 Nt. 9:6) Ya solo, likambo oyo tomoni ‘na miso na biso moko’ ekoki kosimba mpenza motema na biso.

Ndenge nini okoki kosalisa bana na yo bámona makambo kitoko ya ebongiseli ya Yehova ‘na miso na bango moko’? Soki Betele ezali pembeni na esika bofandi, bósala makasi bókende kotala yango. Na ndakisa, Mandy ná Bethany bakolaki na ntaka ya kilomɛtrɛ soki 1 500 longwa na Betele ya ekólo na bango. Atako bongo, baboti na bango bazalaki kobongisa mibembo mbala na mbala mpo bákende kotala bandako ya Betele, mingimingi ntango Mandy ná Bethany bazalaki kokola. Balobi boye: “Liboso tókende kotala Betele, tozalaki kokanisa ete ezali esika moko ya mibeko makasimakasi mpe esika ya mikóló kaka. Kasi, tokutaki bilenge oyo bazalaki kosala mosala makasi mpo na Yehova mpe bazalaki kosepela na yango! Tomonaki ete ebongiseli ya Yehova esukaki te kaka na esika oyo tozalaki kofanda, mpe mbala nyonso oyo tozalaki kokende kotala Betele, tozalaki kokóma makasi na elimo.” Kotala ebongiseli ya Nzambe malamumalamu etindaki Mandy ná Bethany bákóma babongisi-nzela, mpe babengaki bango kutu bákende kosala na Betele mpo na mwa ntango.

Ezali na biloko mosusu oyo ekoki kosalisa biso ‘tómona’ ebongiseli ya Yehova, biloko oyo ezalaki te na Yisraele ya kala. Na bambula oyo eleki, basaleli ya Nzambe bazwaki bavideo mpe ba-DVD oyo elobeli makambo ndenge na ndenge ya ebongiseli ya Nzambe, na ndakisa: Les Témoins de Jéhovah : organisés pour proclamer la bonne nouvelle, Toute la communauté des frères, Jusqu’aux extrémités de la terre, mpe Unis grâce à l’enseignement divin. Soki yo ná libota na yo bomoni mosala makasi ya bato oyo basalaka na Betele, ya bandeko oyo basalaka mpo na kopesa basusu lisungi, ya bamisionɛrɛ, mpe ya bandeko oyo babongisaka mpe batambwisaka mayangani, na ntembe te, botɔndi mpo na lisangá ya bandeko na mokili mobimba ekobakisama na mitema na bino.

Lisangá mokomoko ya basaleli ya Nzambe esalaka mingi mpo na kosakola nsango malamu mpe kosunga bakristo oyo bazali na teritware na yango. Kasi, yo ná libota na yo bózwa ntango ya kokanisa “lisangá mobimba ya bandeko na bino na mokili mobimba.” Yango ekosalisa bino ná bana na bino bótikala “makasi na kondima,” mpe bóyeba ete ezali na makambo oyo ekoki kosepelisa bino.​—1 Pe. 5:9.

[Etanda/​Elilingi na lokasa 18]

Ebongiseli ya Nzambe​—Likambo oyo ebongi koyekola

Tozali na biloko mingi oyo ekoki kosalisa biso nyonso tóyekola lisolo ya ebongiseli ya Yehova mpe ndenge etambolaka. Mituna oyo elandi ekoki kosalisa bino:

☞ Ndenge nini mosala ya bakɛngɛli-batamboli ebandaki na mikolo na biso?​—Linɔ́ngi ya Mosɛnzɛli ya 15 Novɛmbɛ 1996, nkasa 10-15.

☞ Likambo nini ya ntina mingi esalemaki na “Mokolo ya bana” na liyangani ya monene oyo esalemaki na 1941?​—Linɔ́ngi ya Mosɛnzɛli ya 15 Yuli 2001, lokasa 8.

☞ Ndenge nini Lisangani ya Mikóló-Bakambi ezwaka bikateli?​—‘Tópesa litatoli malamumalamu’ mpo na Bokonzi ya Nzambe, nkasa 108-114.