Esengeli bana báyekola makambo ya Nzambe?

“Mangomba oyo tozali na yango ezali kaka kotinda biso toyinanaka, kasi te tólinganaka.”​—MOKOMI JONATHAN SWIFT, MOTO YA ANGLETERRE.

SWIFT amonisaki likanisi wana na siɛklɛ ya 18, kasi bato mingi lelo oyo bakondima likanisi yango. Kutu, bato mosusu bandimaka ete baboti basengeli te kozala na lotomo ya koteya bana na bango makambo ya Nzambe. Bamonaka ete bana oyo babɔkwami na ndako oyo bato bazali bandimi, bateyamaka malamu te.

Okanisi nini? Na makambo oyo elandi, oyo wapi ebongi mpenza?

● Baboti basengeli kozala na lotomo ya koteya bana makambo ya Nzambe te.

● Baboti basengeli kozela bana bákola liboso báteya bango makambo ya Nzambe.

● Ntango bana bazali bilenge, baboti basengeli koteya bango makambo ya Nzambe oyo bango moko bandimaka. Kasi, ntango bana yango bakoli, baboti basengeli kolendisa bango bákanisa na mozindo na makambo yango bango moko.

● Bana basengeli kolanda makambo ya Nzambe oyo baboti na bango bandimaka kozanga koluka koyeba soki ezali solo to te.

Lingomba ebebisaka bana?

Moboti nyonso oyo alingaka mwana na ye akolinga te kobebisa ye. Kasi, makambo oyo ezali kosalema ezali te kolongisa bato oyo balobaka ete bana basengeli te koyekola makambo ya Nzambe? Na boumeli ya bambula, bato ya siansi bayekoli mingi mpo na koyeba soki makambo ya Nzambe oyo baboti bateyaka bana ebebisaka bango to te. Bamoni nini na boyekoli yango?

Bato ya siansi bamoni ete na esika makambo ya Nzambe ebebisa mwana, ekoki nde kosalisa ye akola malamu. Lisolo moko oyo ebimaki na zulunalo moko (Social Science Researcha) na mobu 2008 elobaki boye: “Lingomba esalisi baboti ná bana bákóma na boyokani makasi.” Lisolo yango elobaki mpe boye: “Emonani ete lingomba mpe makambo ya Nzambe esalisaka mpenza bana mpe ezali na ntina mingi mpo libota ezala na boyokani.” Talá ndenge makanisi yango eyokani na maloba ya Yesu Kristo: “Esengo na baoyo bayebi bobola na bango ya elimo.”​—Matai 5:3.

Tokoloba boni na likanisi ya bato oyo balobaka ete bana basengeli naino kokola liboso báyekola makambo ya Nzambe mpe ya lingomba? Bato oyo balobaka bongo babosanaka likambo oyo: Bɔɔngɔ ya mwana ezali lokola katini oyo ezali na eloko te, oyo ezali kozela bátondisa yango. Baboti nde basengeli kopona kotondisa “katini” yango na ndako na bizaleli ya malamu mpe mateya ya Biblia oyo bamoni ete ebongi to kotika bato ya libándá bátondisa bɔɔngɔ ya mwana na mateya ya kilikili.

Sekele ezali nini?

Makambo oyo esalemá emonisi ete mangomba ekoki kotinda bato bákóma kokanisela basusu mabe mpe koyina bango. Na yango, ndenge nini baboti bakoki kosala mpo likambo oyo Jonathan Swift alobaki ekóma te? Ndenge nini bakoki koteya bana na bango mateya oyo ekosalisa bango bálinga basusu?

Sekele ezali soki oluki eyano na mituna misato oyo: (1) Bana basengeli koyekola nini? (2) Nani akoki koteya bango? (3) Mayele nini esimbaka?

[Maloba na nse ya lokasa]