Mituna ya batángi

Mitángo oyo etyamaka na lapolo ya mbula na mbula elakisaka mpenza nini?

Mbula na mbula, tozelaka na esengo lapolo ya mosala oyo ebimaka na Annuaire. Ezalaka mpenza esengo komona makambo oyo basaleli ya Yehova na mokili mobimba basali na mosala ya kosakola mpe ya koteya Bokonzi. Kasi, mpo tósepela mingi mpenza na lapolo yango, tosengeli koyeba malamumalamu mitó ya makambo oyo ezali wana mpe mitángo oyo batye. Tótalela mwa bandakisa.

Mobu ya mosala. Yango ebandaka na sanza ya Sɛtɛmbɛ ya mbula moko kino Augusto ya mbula oyo elandi. Annuaire ezalaka na lapolo ya mobu ya mosala ya mbula oyo euti koleka. Na yango, Annuaire 2011 ezali na lapolo ya mobu ya mosala 2010, oyo ebandaki na mokolo ya 1 Sɛtɛmbɛ 2009 tii na mokolo ya 31 Augusto 2010.

Motángo ya basakoli nyonso mpe mwayene ya basakoli. “Basakoli” ezali Batatoli ya Yehova oyo bazwá batisimo ná basakoli ya Bokonzi oyo bazwá naino batisimo te. “Motángo ya basakoli nyonso” ezali motángo oyo eleki monene ya balapolo ya sanza moko boye na boumeli ya mobu ya mosala; balapolo ya basanza mosusu oyo eyaki na retare mpe etyamaki te na lapolo ya sanza yango ekoki mpe kokɔta na kati. Na yango, basakoli mosusu bakoki kotángama mbala mibale. Nzokande, motángo yango oyo eleki monene, esangisi te basakoli oyo basakolaki mpenza kasi babosanaki kopesa lapolo. Yango emonisi ntina oyo mosakoli nyonso asengeli kopesa lapolo na ye nokinoki sanza nyonso. “Mwayene ya basakoli” ezali motángo ya balapolo ya basanza nyonso kabolá na 12.

Ngonga nyonso. Annuaire 2011 emonisi ete Batatoli ya Yehova balekisaki ngonga miliare moko na ndambo na mosala ya kosakola. Nzokande, yango ezali te ngonga nyonso oyo tolekisaki na losambo na biso. Na ndakisa, esangisi te ntango oyo bankulutu balekisaka mpo na kolendisa bandeko, oyo toyanganaka na makita, toyekolaka Biblia mpe tomanyolaka biso moko.

Mosolo oyo ebimisamaki. Na mobu ya mosala 2010, Batatoli ya Yehova babimisaki mosolo koleka dolare milio 155 mpo na kosalisa babongisi-nzela monene, bamisionɛrɛ, mpe bakɛngɛli-batamboli mpo bákokisa mosala na bango. Nzokande, mitángo ya mbongo yango ekɔtisi te mbongo oyo tobimisaki mpo na konyata mikanda na biso oyo elimbolaka Biblia; ekɔtisaki mpe te mbongo oyo tobimisaki mpo na kosalisa bandeko koleka 20 000 oyo basalaka na Babetele mpe babiro ya filiale na mokili mobimba.

Bato balyaki limpa mpe bamɛlaki vinyo na Ekaniseli. Ezali motángo ya Batatoli oyo bazwá batisimo, oyo balyaki limpa mpe bamɛlaki vinyo na Ekaniseli na mokili mobimba. Motángo yango elakisi nde bakristo oyo batyami mafuta na elimo oyo bazali naino na mabele? Mpenzampenza te. Mwa makambo mingi, na ndakisa bindimeli oyo moto azalaki na yango na lingomba na ye ya kala, to soki moto azali na maladi ya motó to ya makanisi, akoki kokanisa ete azali na elikya ya kokende na likoló. Na yango, tozali na likoki te ya koyeba motángo ya sikisiki ya bakristo oyo batyami mafuta na elimo, oyo bazali awa na mabele; kutu tozali na mposa ya koyeba yango te. Lisangani ya Mikóló-Bakambi ezalaka te na liste ya bankombo ya bato nyonso oyo balyaka limpa mpe bamɛlaka vinyo na Ekaniseli.a

Kasi oyo toyebi ezali ete ndambo ya “baombo ya Nzambe na biso” oyo batyami mafuta na elimo bakozala naino awa na mabele ntango mipɛpɛ ya bolɔzi monene ekofungolama. (Em. 7:1-3) Tii na ntango yango, bakristo oyo batyami mafuta na elimo bakokoba kotambwisa mosala ya kosakola mpe koteya bato. Lapolo ya mbula na mbula eyebisaka biso makambo oyo basaleli ya Yehova na mokili mobimba bazali kosala na mosala yango oyo eleki ntina mpe naino esalemá boye te.

[Maloba na nse ya lokasa]