Mpo na nini Moyoki ya mabondeli atiki bampasi ezala?

ATAKO bato mosusu babondelaka, bandimaka mpenza te ete Nzambe azali. Mpo na nini? Ekoki kozala mpo na bampasi mingi oyo ezali na mokili. Osilá komituna mpo na nini Nzambe atiki ete bampasi ezala?

Nzambe asalaki mpenza bato na nzoto ya kozanga kokoka mpe asalaki bango mpo bámonaka mpasi ndenge ezali lelo? Elingaki kozala mpasi komemya Nzambe oyo alingaka ete bato bányokwama. Kasi, tózwa ndakisa oyo: Soki ozali kotala motuka moko ya sika mpe ozali kosepela na ndenge oyo basali yango, kasi omoni ete nsima ya motuka yango ebebá, okoloba ete ezali foti ya moto oyo asalaki yango? Te! Kutu okoloba ete moto oyo asalaki yango, asalaki yango “malamu mpenza” mpe ete moto moko to eloko moko nde ebebisi yango.

Ndenge moko mpe, ntango tozali kotala biloko kitoko oyo ezali na mokili mpe ndenge esalemá na mobulu te, mpe na ngámbo mosusu tozali komona mobulu mpe kozanga bosembo oyo ezali konyokola bato, tokoloba nini? Biblia eteyaka ete Nzambe asalaki mwasi ná mobali ya liboso na nzoto ya kokoka, kasi na nsima, bango moko bamibebisaki. (Kolimbola Mibeko 32:4, 5) Likambo ya esengo ezali ete Nzambe alaki kobongisa makambo, kozongisela bato ya botosi nzoto ya kokoka. Kasi, mpo na nini azali koumela boye?

Mpo na nini azali koumela boye?

Ezali mpo na ntembe oyo ebimaki na likambo etali nani asengeli koyangela bato. Yehova akelaki bato te mpo bámitambwisa bango moko. Ye nde asengelaki kozala Moyangeli na bango. Biblia elobi boye: “Ezali te likambo ya moto oyo azali kotambola ete atambwisa lokolo na ye.” (Yirimia 10:23) Likambo ya mawa, mobali ná mwasi ya liboso baponaki kotombokela boyangeli ya Nzambe. Lokola babukaki mobeko, bakómaki bato ya masumu. (1 Yoane 3:4) Yango esalaki ete bábungisa nzoto ya kokoka oyo bazalaki na yango mpe bámimemela mpasi mpe bámemela bakitani na bango mpasi yango.

Na boumeli ya bankóto ya bambula, Yehova atiki bato bámiyangela, mpe makambo oyo esalemi emonisi ete bato bazali na likoki te ya komiyangela bango moko. Yango emonisi ete baguvɛrnema nyonso ya bato ebimiselaka bato mpasi. Ata guvɛrnema moko te elongi kolongola bitumba, mobulu, kozanga bosembo, to maladi.

Ndenge nini Nzambe akobongisa makambo?

Biblia elaki ete mosika te Nzambe akotya mokili ya sika epai bosembo ekozala. (2 Petro 3:13) Kaka baoyo bazali kosalela bonsomi na bango ya kopona mpo na komoniselana bolingo mpe kolinga Nzambe nde bakozwa libaku ya kofanda na mokili yango.​—Kolimbola Mibeko 30:15, 16, 19, 20.

Biblia elobi mpe ete na “mokolo ya kosambisama” oyo ekómi pene mpenza, Nzambe akolongola bampasi mpe bato oyo babimisaka yango. (2 Petro 3:7) Na nsima, Yesu Kristo, Mokonzi oyo Nzambe atye, akoyangela bato ya botosi. (Danyele 7:13, 14) Makambo nini boyangeli ya Yesu ekosala? Biblia elobi ete: “Bato ya komikitisa bakozwa mabele, mpe bakosepela mpenza na kimya mingi.”​—Nzembo 37:11.

Lokola Yesu azali Mokonzi kuna na likoló, akolongola makambo nyonso ya mabe; ezala maladi, bobange, mpe liwa, oyo ebimaki ntango bato batombokelaki Yehova, “liziba ya bomoi.” (Nzembo 36:9) Yesu akobikisa baoyo nyonso bazali kondima boyangeli na ye. Na boyangeli na ye, bilaka oyo Biblia epesaki ekokokisama:

◼ “Moto moko te oyo afandi kuna akoloba: ‘Nazali na maladi.’ Bato oyo bafandi na mokili yango bakolimbisama libunga na bango.”​—Yisaya 33:24.

◼ “[Nzambe] akopangwisa mpisoli nyonso na miso na bango, mpe liwa ekozala lisusu te, ná lilaka ná koganga ná mpasi ekozala lisusu mpe te. Makambo ya kala eleki.”​—Emoniseli 21:4.

Koyeba ete mosika te Nzambe akokokisa bilaka na ye mpe akosilisa bampasi ezali mpenza kobɔndisa! Sikoyo, tosengeli mpenza kotya motema ete ayokaka mabondeli na biso atako mpo na mwa ntango, atiki bampasi ezala.

Nzambe azali. Akoki koyoka yo, ata ntango ozali koloba makambo oyo ezali kopesa yo mpasi to mawa. Akosepela komona yo na bomoi ntango oyo bantembe mpe bampasi na yo nyonso ekozala lisusu te.