Bazwi eloko moko ya malamu koleka

BAMILIO ya bakristo baboyaka kosala fɛti ya Noele. Bayokaka ndenge nini na ekateli na bango? Bamonaka ete bazangaka eloko moko? Bana na bango bayokaka mpe bongo? Talá oyo Batatoli ya Yehova na bisika ndenge na ndenge na mokili balobi mpo na likambo yango.

Kokanisa Yesu Kristo: “Liboso nakóma Motatoli ya Yehova, nazalaki mpenza kokende eglize te. Nazalaki kokende kaka na mokolo ya Noele to ya Pasika. Kasi, ata na ntango yango, nazalaki mpenza kokanisa Yesu Kristo te. Nasalaka lisusu fɛti ya Noele te, kasi nakendaka makita ya bokristo mbala mibale na pɔsɔ mpe nateyaka kutu basusu oyo Biblia elobaka mpo na Yesu!”​—EVE, AUSTRALIE.

Koyoka esengo oyo eutaka na kopesa: “Nayokaka esengo mpenza soki moto apesi ngai kado oyo nazalaki komizela na yango te. Nalingaka mpenza bongo! Nalingaka mpe kosalela basusu bakarte mpe mayemi mpo esepelisaka bango, epesaka ngai mpe esengo.”​—REUBEN, IRLANDE DU NORD.

Kosunga bato oyo bakelelá: “Tosepelaka kolambela bato ya maladi. Mbala mosusu tomemelaka bango bafololo, gato to mwa kado moko mpo na kosepelisa bango. Tosepelaka kosala bongo mpo tokoki kotala bango ntango nyonso oyo tolingi.”​—EMILY, AUSTRALIE.

Kolekisa ntango ná bato ya libota: “Ntango tokutanaka esika moko ná bato ya libota na biso, yango esalisaka bana na biso báyeba banɔkɔ, batata-mwasi, bamama-leki, bankɔkɔ, mpe bana na bango; ezalaka ntango moko ya esengo. Lokola esɛngaka te ete tósala yango kaka na dati moko boye na mbula, totungisamaka mpenza te, mpe bato ya libota na biso bayebi ete tokendeke kotala bango mpo tolingaka bango.”​—WENDY, ÎLES CAÏMANS.

Koluka kimya: “Na eleko ya Noele, emonanaka lokola ete makambo ya kosala ezalaka mingi, yango wana bato moke nde bakanisaka mpo na kimya. Nazali na kimya mpo nayebi makambo oyo Biblia elaki bato. Nayebi ete bana na ngai bakozala na avenire moko ya malamu.”​—SANDRA, ESPAGNE.