“Bókoba kosɛnga, mpe bakopesa bino”

“Nkolo, teyá biso kobondela.” (Luka 11:1) Moyekoli moko ya Yesu nde ayebisaki ye bongo. Na eyano na ye, Yesu asalelaki bandakisa mibale oyo eteyi biso ndenge ya kobondela mpo Nzambe ayoka biso. Osilá komituna soki Nzambe ayokaka mabondeli na yo? Boye, eyano ya Yesu ekosepelisa yo.​—Tángá Luka 11:5-13.

Ndakisa ya liboso elobeli moto oyo azali kobondela. (Luka 11:5-8) Na lisolo yango, mobali moko ayambi mopaya na katikati ya butu mpe azali na bilei ya kopesa ye te. Mpo na mobali yango, ezali likambo ya ntina mingi. Atako ngonga epusani, akei epai ya moninga na ye mpo na kodefa mwa mampa. Na ebandeli, moninga yango aboyi kotɛlɛma mpo bato ya libota na ye balali mpɔngi makasi. Kasi mobali yango azalaki na mbamba makasi mpe akobaki kosɛnga tii nsukansuka moninga na ye alamukaki mpe apesaki ye mwa bilei.a

Ndakisa yango eteyi biso nini mpo na libondeli? Yesu amonisi biso ete tosengeli kozala mbamba, elingi koloba, tókoba kosɛnga, koluka, mpe kobɛta kɔkɔkɔ. (Luka 11:9, 10) Mpo na nini? Yesu alingi nde koloba ete Nzambe akakatanaka mpo na koyoka mabondeli na biso? Te. Na bokeseni na moninga oyo azalaki koboya kofungola porte, Yesu alingaki koloba ete Nzambe azalaka na mposa makasi ya koyanola mabondeli ya baoyo babondelaka na kondima. Mbamba na biso emonisaka ete tozali na kondima ya ndenge wana. Soki tozali kokoba kosɛnga, tokomonisa ete tozali mpenza na mposa ya eloko yango mpe tozali mpenza na kondima ete Nzambe akoki kopesa biso yango soki eyokani na mokano na ye.​—Marko 11:24; 1 Yoane 5:14.

Ndakisa ya mibale elobeli Yehova “Moyoki ya libondeli.” (Nzembo 65:2) Yesu atunaki boye: “Tata nani na kati na bino oyo soki mwana na ye asɛngi mbisi, akopesa ye mbala mosusu nyoka na esika ya mbisi? To soki mpe asɛngi maki, akopesa ye nkotó?” Eyano ezali polele mpo tata moko te oyo alingaka bana na ye akoki kopesaka bango eloko ya mabe. Na nsima, Yesu alimboli ndakisa yango boye: Soki batata ya kozanga kokoka ‘bapesaka makabo ya malamu’ epai ya bana na bango, ‘bongo Tata na likoló akopesa te elimo santu’​—likabo oyo eleki makabo nyonso epai ya bana na ye oyo bazali awa na mabele, oyo bazali kosɛnga ye yango?b​—Luka 11:11-13; Matai 7:11.

Ndakisa oyo eteyi biso nini mpo na Yehova, “Moyoki ya libondeli”? Yesu alingi tótalelaka Yehova lokola tata oyo akipaka bana na ye mpe azalaka na mposa makasi ya kokokisa bamposa na bango. Na yango, basambeli ya Yehova bakoki koyebisa ye bamposa ya mitema na bango na libondeli. Lokola bayebi ete alukaka bolamu na bango, bakoki mbala moko kondima eyano oyo apesi na libondeli na bango ata soki ezali te ndenge bazalaki kokanisa.c