BIYANO NA MITUNA YA BIBLIA

Soki moto akufi, nyonso esili?

Liwa ezali lokola mpɔngi mpo bakufi bayebaka eloko te mpe bakoki kosala eloko moko te. Kasi, Mozalisi ya bomoi akoki kozongisa bakufi na bomoi na nzela ya lisekwa. Mpo na komonisa ete akosala yango, Nzambe apesaki Yesu nguya ya kosekwisa bato ebele oyo bakufaki.​—Tángá Mosakoli 9:5; Yoane 11:11, 43, 44.

Nzambe alaki ete bakufi oyo bazali na makanisi na ye bakosekwa na mokili ya sika. Baoyo bakosekwa, basengeli kozala naino na nkunda tii ntango Nzambe akozongisa bango lisusu na bomoi. Nzambe-Mozwi-ya-Nguya-Nyonso azali na mposa makasi ya kosalela nguya na ye mpo na kozongisa bakufi na bomoi.​—Tángá Yobo 14:14, 15.

Lisekwa ekozala ndenge nini?

Ntango Nzambe akosekwisa bato, bakozala na likoki ya komiyeba, koyeba baninga mpe mabota na bango. Ata soki nzoto ya moto epɔli na mabele, Nzambe akoki kosekwisa moto yango na nzoto ya sika.​—Tángá 1 Bakorinti 15:35, 38.

Kasi, kaka bato moke nde bakosekwa mpo na bomoi na likoló. (Emoniseli 20:6) Bato mingi oyo bakosekwa bakozonga na bomoi na mabele oyo ekozonga paradiso. Bato yango bakobanda bomoi ya sika na elikya ya kozala na bomoi libela na libela.​—Tángá Nzembo 37:29; Misala 24:15.